ନୂଆଦିଲ୍ଲୀ,୪।୪: ଚଳିତ ଆର୍ଥିକ ବର୍ଷ ( ୨୦୨୨-୨୩ ବଷ)ରେ ୧୬.୬୧ ଲକ୍ଷ କୋଟି ଟଙ୍କାର ପ୍ରତ୍ୟକ୍ଷ ଟିକସ ସଂଗ୍ରହ କରାଯାଇଛି , ଯାହାକି ୨୦୨୧-୨୨ ତୁଳନାରେ ପ୍ରାୟ ୧୮% (୧୭.୬୩%) ବୋଲି କୁହାଯାଉଛି। ଏପରିକି ୨୦୨୨-୨୩ ଆର୍ଥିକ ବର୍ଷରେ ବଜେଟ୍ ଆକଳନ ଠାରୁ ଅଧିକ ଅସ୍ଥାୟୀ (ପ୍ରୋଭିଜନାଲ) ପ୍ରତ୍ୟକ୍ଷ ଟିକସ ସଂଗ୍ରହ ହୋଇଛି। ବିଶେଷ କରି ୨୦୨୧-୨୨ ବର୍ଷରେ ୧୪.୧୨ ଲକ୍ଷ କୋଟି ଟଙ୍କାର ଟିକସ ସଂଗ୍ରହ କରାଯାଇଥିଲା। ସେହିଭଳି ୨୦୨୨-୨୩ ଆର୍ଥିକ ବର୍ଷର କେନ୍ଦ୍ର ବଜେଟରେ ୧୪.୨୦ ଲକ୍ଷ କୋଟି ଟଙ୍କାର ପ୍ରତ୍ୟକ୍ଷ ଟିକସ ସଂଗ୍ରହ କରାଯିବା ନେଇ ଆକଳନ କରାଯାଇଥିଲା। ହେଲେ ପରବର୍ତ୍ତୀ ସମୟରେ ସେଥିରେ ସଂଶୋଧନ କରାଯାଇ ସଂଶୋଧିତ ଆକଳନ ଅନୁଯାୟୀ ୧୬.୫୦ ଲକ୍ଷ କୋଟି ଟଙ୍କାର ପ୍ରତ୍ୟକ୍ଷ ଟିକସ ଆଦାୟ ହେବା ନେଇ ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ତେବେ ବଜେଟ ଆକଳନଠାରୁ ୧୬.୯୭% ଅଧିକ ଏବଂ ସଂଶୋଧିତ ଆକଳନଠାରୁ ୦.୬୯ ପ୍ରତିଶତ ଅଧିକ ଅସ୍ଥାୟୀ ପ୍ରତ୍ୟକ୍ଷ ଟିକସ ସଂଗ୍ରହ (ରିଫଣ୍ଡଗୁଡ଼ିକର ଶୁଦ୍ଧ ବା ନିଟ୍ ଅଫ୍ ଦ ରିଫଣ୍ଡ) କରାଯାଇଛି। ରିଫଣ୍ଡ ପରିଶୋଧ କରିବା ପୂର୍ବରୁ ୨୦୨୨-୨୩ ଆର୍ଥିକ ବର୍ଷରେ ପ୍ରତ୍ୟକ୍ଷ ଟିକସର ସକଳ ସଂଗ୍ରହ (ଅସ୍ଥାୟୀ) ପରିମାଣ ୧୯.୬୮ ଲକ୍ଷ କୋଟି ଟଙ୍କା ରହିଛି, ଯାହାକି ୨୦୨୧-୨୨ ଆର୍ଥିକ ବର୍ଷରେ ସଂଗୃହୀତ ଟିକସ ପରିମାଣ ୧୬.୩୬ ଲକ୍ଷ କୋଟି ଟଙ୍କା ଠାରୁ ୨୦.୩୩% ଅଧିକ ବୋଲି କୁହାଯାଉଛି। ୨୦୨୨-୨୩ ଆର୍ଥିକ ବର୍ଷରେ ସକଳ କର୍ପୋରେଟ ଟିକସ ସଂଗ୍ରହ (ଅସ୍ଥାୟୀ) ୧୦,୦୪,୧୧୮ କୋଟି ଟଙ୍କା ରହିଛି ଏବଂ ଏହା ପୂର୍ବ ଆର୍ଥିକ ବର୍ଷରେ ସଂଗୃହୀତ ସକଳ କର୍ପୋରେଟ୍ ଟିକସ ପରିମାଣ ୮,୫୮,୮୪୯ କୋଟି ଟଙ୍କା ଠାରୁ ୧୬.୯୧% ଅଧିକ ରହିଛି। ୨୦୨୨-୨୩ ଆର୍ଥିକ ବର୍ଷରେ ଏସଟିଟି ସମେତ ସକଳ ବ୍ୟକ୍ତିଗତ ଆୟକର ଆଦାୟ (ଅସ୍ଥାୟୀ) ୯,୬୦,୭୬୪ କୋଟି ଟଙ୍କା ରହିଛି ଏବଂ ଏହା ପୂର୍ବବର୍ଷ ସଂଗୃହୀତ ବ୍ୟକ୍ତିଗତ ଆୟକର (ଏସଟିଟି ସମେତ) ପରିମାଣ ୭,୭୩,୩୮୯ ଠାରୁ ୨୪.୨୩% ଅଧିକ ରହିଥିବା ବେଳେ ୨୦୨୨-୨୩ ଆର୍ଥିକ ବର୍ଷରେ ୩,୦୭,୩୫୨ କୋଟି ଟଙ୍କାର ରିଫଣ୍ଡ ଜାରି କରାଯାଇଛି। ୨୦୨୧-୨୨ ଆର୍ଥିକ ବର୍ଷରେ ଜାରି ହୋଇଥିବା ରିଫଣ୍ଡ ପରିମାଣ ୨,୨୩,୬୫୮ କୋଟି ଟଙ୍କା ଠାରୁ ୩୭.୪୨% ଅଧିକ ବୋଲି କୁହାଯାଉଛି।
