ନୂଆଦିଲ୍ଲୀ,୪।୪: ଆଇପିଏଲ ୨୦୨୫ ମଧ୍ୟରେ, ଏକ ଖବର ଚାଞ୍ଚଲ୍ୟ ସୃଷ୍ଟି କରିଥିଲା ଯେତେବେଳେ ଜଣାପଡିଲା ଯେ ଯଶସ୍ବୀ ଜୟସୱାଲ ମୁମ୍ବାଇ ଦଳ ଛାଡି ଘରୋଇ ଟୁର୍ଣ୍ଣାମେଣ୍ଟରେ ଗୋଆ ପାଇଁ ଖେଳିବାକୁ ଚାହୁଁଛନ୍ତି। ସେ ଏ ବିଷୟରେ ଏମସିଏ (ମୁମ୍ବାଇ କ୍ରିକେଟ ଆସୋସିଏସନ)କୁ ଏକ ଇମେଲ ମଧ୍ୟ ଲେଖିଥିଲେ ଏବଂ NOC ମାଗିଥିଲେ। ଏହା ପରେ, ଜୟସୱାଲ ଏହାକୁ ନିଶ୍ଚିତ କରିଥିଲେ ଏବଂ କହିଥିଲେ ଯେ ସେ ନୂଆ ସୁଯୋଗ ପାଇଁ ଗୋଆ ଦଳରେ ଯୋଗ ଦେବାକୁ ନିଷ୍ପତ୍ତି ନେଇଛନ୍ତି। ସେ ଗୋଆର ଅଧିନାୟକ ହେବେ। ଏବେ ଏକ ନୂଆ ରିପୋର୍ଟ ଆସିଛି, ଯେଉଁଥିରେ ଏକ ଆଶ୍ଚର୍ଯ୍ୟଜନକ ଖୁଲାସା ହୋଇଛି।
ରିପୋର୍ଟ ଅନୁଯାୟୀ, ରଣଜୀ ଟ୍ରଫିରେ ଜମ୍ମୁ-କଶ୍ମୀର ବିପକ୍ଷରେ ପରାଜୟ ପରେ ପ୍ରଶିକ୍ଷକ ଯଶସ୍ବୀ ଜୟସୱାଲଙ୍କୁ ଟାର୍ଗେଟ କରିଥିଲେ। ସୂଚନାଯୋଗ୍ୟ, ବିସିସିଆଇ ସମସ୍ତଙ୍କୁ ଜଣାଇ ଦେଇଥିଲା ଯେ ଯେଉଁ କ୍ରିକେଟରମାନେ ଅନ୍ତର୍ଜାତୀୟ କ୍ରିକେଟ ଖେଳୁନାହାଁନ୍ତି ସେମାନେ କୌଣସି କାରଣ ବିନା ଘରୋଇ କ୍ରିକେଟକୁ ମିସ କରିପାରିବେ ନାହିଁ। ଏହା ପରେ, ଜୟସୱାଲ ମୁମ୍ବାଇ ପାଇଁ ଖେଳିଥିଲେ, କିନ୍ତୁ ଜମ୍ମୁ ଏବଂ କଶ୍ମୀର ବିପକ୍ଷ ସେହି ମ୍ୟାଚ ରେ, ସେ ପ୍ରଥମ ଇନିଂସରେ କେବଳ ୪ରନ ଏବଂ ଦ୍ୱିତୀୟ ଇନିଂସରେ ୨୬ରନ କରିଥିଲେ। ମୁମ୍ବାଇ ଏହି ମ୍ୟାଚ ୫ ୱିକେଟରେ ହାରିଗଲା।
ରିପୋର୍ଟ ଅନୁଯାୟୀ, ଯଶସ୍ବୀ ଏବଂ ରାହାଣେଙ୍କ ମଧ୍ୟରେ ଫାଟ ୨୦୨୨ମସିହାରୁ ଆରମ୍ଭ ହୋଇଥିଲା ଯେତେବେଳେ ପଶ୍ଚିମ ଜୋନ ଅଧିନାୟକ ରାହାଣେ ଦକ୍ଷିଣ ଜୋନ ର ରବି ତେଜାଙ୍କ ସହିତ ଅତ୍ୟଧିକ ସ୍ଲେଜିଂ ପାଇଁ ଯଶସ୍ବୀ ଜୟସୱାଲଙ୍କୁ ପଡ଼ିଆରୁ ବାହାରକୁ ପଠାଇ ଦେଇଥିଲେ।
ରିପୋର୍ଟରେ କୁହାଯାଇଛି ଯେ ଜମ୍ମୁ ଏବଂ କଶ୍ମୀର ବିପକ୍ଷରେ ଉଭୟ ଇନିଂସରେ ବିଫଳ ହେବା ପରେ ମୁମ୍ବାଇ ଦଳର ଅଧିନାୟକ ଅଜିଙ୍କ୍ୟ ରାହାଣେ ଏବଂ ପ୍ରଶିକ୍ଷକ ଓମକାର ସାଲଭି ଜୟସୱାଲଙ୍କ ପ୍ରତିବଦ୍ଧତା ଉପରେ ପ୍ରଶ୍ନ ଉଠାଇଥିଲେ। ରିପୋର୍ଟ ଅନୁଯାୟୀ, ବାମହାତୀ ଖେଳାଳି ରାହାଣେଙ୍କ କିଟ ବ୍ୟାଗକୁ ରାଗିଯାଇ ଗୋଇଠା ମାରି ଦେଇଥିଲେ।
ଉଭୟ ଖେଳାଳି ବର୍ତ୍ତମାନ ଇଣ୍ଡିଆନ ପ୍ରିମିୟର ଲିଗର ୧୮ତମ ସିଜିନରେ ଖେଳୁଛନ୍ତି। ଅଜିଙ୍କ୍ୟ ରାହାଣେ କୋଲକାତା ନାଇଟ ରାଇଡର୍ସର ଅଧିନାୟକ, ତାଙ୍କ ଦଳ ଗୁରୁବାର ସିଜିନର ଦ୍ୱିତୀୟ ମ୍ୟାଚ ଜିତିଛି।
