ସିଡନୀ,୨୪।୧୦: ଅଷ୍ଟ୍ରେଲିଆ ଗସ୍ତରେ ବିରାଟ କୋହଲିଙ୍କ ବ୍ୟାଟ ନୀରବ ରହିଛି। ସେ ଦୁଇଟି ମ୍ୟାଚରେ ଖାତା ମଧ୍ୟ ଖୋଲି ନାହାଁନ୍ତି। ପ୍ରଥମ ଦିନିକିଆରେ ମିଚେଲ ଷ୍ଟାର୍କଙ୍କ ଦ୍ୱାରା କୋହଲିଙ୍କୁ ଶୂନ୍ୟରେ ଆଉଟ କରାଯାଇଥିଲା। ଦ୍ୱିତୀୟ ଦିନିକିଆରେ ସେ ଜାଭିୟର ବାର୍ଟଲେଟ ଦ୍ୱାରା ଏଲବିଡବ୍ଲ୍ୟୁ ହୋଇଥିଲେ। ଆଡିଲେଡରେ ଆଉଟ ହେବା ପରେ, ଷ୍ଟାଡିୟମରେ ଦର୍ଶକଙ୍କୁ କୋହଲି ତାଙ୍କର ଗ୍ଲୋଭ୍ସ ଦେଖାଉଥିବାର ଏକ ଫଟୋ ଭାଇରାଲ ହୋଇଥିଲା।
ଆଡିଲେଡ ଷ୍ଟାଡିୟମରେ ଏହି ଇଙ୍ଗିତ କୋହଲିଙ୍କ ଏକଦିବସୀୟ ଅବସର ବିଷୟରେ କଳ୍ପନାଜଳ୍ପନାକୁ ଖୋରାକ ଯୋଗାଇଥିଲା। କୋହଲିଙ୍କ ଆକ୍ସନ ଏକଦିବସୀୟ ଫର୍ମାଟରୁ ତାଙ୍କର ଅବସର ବିଷୟରେ କଳ୍ପନାଜଳ୍ପନା ସୃଷ୍ଟି କରିଥିବା ବେଳେ, କିମ୍ବଦନ୍ତୀ ଭାରତୀୟ ଖେଳାଳି ସୁନୀଲ ଗାଭାସ୍କର ଏକ ଗୁରୁତ୍ୱପୂର୍ଣ୍ଣ ବୟାନ ଦେଇଛନ୍ତି।
ସୁନୀଲ ଗାଭାସ୍କର କହିଛନ୍ତି, ବିରାଟଙ୍କ ୧୪,୦୦୦ରୁ ଅଧିକ ରନ ଏବଂ ୫୨ ଦିନିକିଆ ଶତକ ଅଛି। ସେ ହଜାର ହଜାର ରନ କରିଛନ୍ତି, ତେଣୁ ତାଙ୍କୁ କିଛି ବିଫଳତା ସହ୍ୟ କରିବାକୁ ପଡିବ।କ’ଣ ଘଟିଛି ତାହା ଉପରେ ଚିନ୍ତା କରନ୍ତୁ ନାହିଁ। ବିରାଟଙ୍କ ଭିତରେ ଏବେ ବି ବହୁତ କ୍ରିକେଟ ବାକି ଅଛି। ନିଶ୍ଚିତ ଭାବରେ ଆଡିଲେଡ ଅଷ୍ଟ୍ରେଲିଆରେ ଟେଷ୍ଟ ଏବଂ ଦିନିକିଆ ଫର୍ମାଟ ଉଭୟରେ ତାଙ୍କର ପ୍ରିୟ ପଡ଼ିଆ ହୋଇଛି, କିନ୍ତୁ ସେ ସିଡନୀରେ ଏକ ବଡ଼ ଇନିଂସ ଖେଳିପାରିବେ।
ସୁନୀଲ ଗାଭାସ୍କର, ବିରାଟ କୋହଲିଙ୍କ ଗ୍ଲୋଭ୍ସ-ଫ୍ଲାସିଂ ଆକ୍ସନ ବିଷୟରେ ଉଲ୍ଲେଖ କରି କହିଛନ୍ତି, କୋହଲିଙ୍କ ଇଙ୍ଗିତ ଆଡିଲେଡ୍ରେ ପ୍ରଶଂସକମାନଙ୍କ ପାଇଁ ଥିଲା, ଯେଉଁମାନେ ତାଙ୍କୁ ଠିଆ ହୋଇ ପ୍ରଶଂସା କରୁଥିଲେ। ଅଷ୍ଟ୍ରେଲିଆରେ ଦୁଇଟି ଶୂନ୍ୟରେ ଆଉଟ ହେବା ପରେ ବିରାଟ ତାଙ୍କର ଅବସର ଘୋଷଣା କରିବେ ନାହିଁ। ସିଡନୀ ମ୍ୟାଚ ଏବେ ବି ବାକି ଅଛି, ଏବଂ ତା’ପରେ, ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜ ଅଛି।
Dharitri – Odisha’s No.1 Odia Daily
