ବରଗଡ଼,୨୩।୯(ପ୍ରେମାନନ୍ଦ ଖମାରୀ)- ବରଗଡ଼ ମ୍ୟୁନିସିପାଲଟି ଅଧିନ ଶକ୍ତି ନଗରସ୍ଥିତ ନେହେରୁ ଆସୋସିଏସନ ସମ୍ମଖରେ ଜନସ୍ବାସ୍ଥ୍ୟ ବିଭାଗ (ପିଏଚଡ଼ି) ପକ୍ଷରୁ ଯୋଗାଇ ଦିଆଯାଉଥିବା ପାନୀୟଜଳ ପାଇଁ ଉଦ୍ଦିଷ୍ଟ ପାଣି ପାଇପ ଫାଟି ଯାଇଥିଲା। ଫଳରେ ପାନୀୟଜଳ ଦୂଷିତ ହେଉଥିବାବେଳେ ନିକଟସ୍ଥ ସମଲେଶ୍ୱରୀ ନର୍ସରୀ ଗଳି ରାସ୍ତାରେ ପାଣି ଅନବରତ ବହି ଚାଲିଥିଲା। ଏପରିକି ପାଇପରେ ଯୋଗାଇ ଦିଆଯାଉଥିବା ପାନୀୟଜଳ ଦୂଷିତ ହେବା ସହିତ ନାନା ରୋଗ ବ୍ୟାପିବା ଆଶଙ୍କା ରହିଥିଲା। ଏ ସମ୍ପର୍କରେ ସୋମବାର ଧରିତ୍ରୀ ପୋର୍ଟାଲରେ ସଚିତ୍ର ଖବର ପ୍ରକାଶ ପାଇଥିଲା। ଖବର ପ୍ରକାଶ ପାଇବା ପରେ ସ୍ବେଚ୍ଛାସେବୀ ଦୀପା ବାରିକ ଏବଂ ରମେଶ ମେହେର ପ୍ରକାଶିତ ଖବରକୁ ନେଇ ତ୍ୱରିତ ପଦକ୍ଷେପ ନେବା ପାଇଁ ସୋସିଆଲ ମିଡ଼ିଆ ପ୍ଲାଟଫର୍ମ ‘ଏକ୍ସ’ ମାଧ୍ୟମରେ ବିଭାଗୀୟ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ ମଧ୍ୟ କରିଥିଲେ। ଏହାପରେ ମଙ୍ଗଳବାର ସକାଳୁ ପିଏଚଡ଼ି କର୍ମଚାରୀମାନେ ପହଞ୍ଚି ଫାଟିଥିବା ପାଣି ପାଇପର ମରାମତି କରିଛନ୍ତି।
