ଲୋଇସିଂହା,୩ା୧(ସୁଶାନ୍ତ ବାରିକ):ବଲାଙ୍ଗୀର ଜିଲା ଲୋଇସିଂହା ଥାନା ଅନ୍ତର୍ଗତ ଝାରମୁଣ୍ଡା ଆଞ୍ଚଳିକ ଧନୁଯାତ୍ରାର ଉଦ୍ଯାପାନୀ ସନ୍ଧ୍ୟାରେ ରାମଦୋଳିରୁ ପଡି ଜଣେ ଯୁବକଙ୍କ ମୃତ୍ୟୁ ଘଟିଛି। ସେ ହେଲେ ଲୋଇସିଂହା ବ୍ଲକ୍ ସରଗାଡ଼ ଗ୍ରାମର ମିଲନ ସାହୁ(୨୪)। ବଲାଙ୍ଗୀର ଭୀମଭୋଇ ମେଡିକାଲ କଲେଜରେ ପୋଲିସ ମୃତଦେହ ବ୍ୟବଚ୍ଛେଦ କରାଇବା ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା। ଗୁରୁବାର ଗ୍ରାମ ଶ୍ମଶାନରେ ମୃତଦେହ ସତ୍କାର କରାଯାଇଛି। ଏନେଇ ଥାନାରେ ଏକ ଅପମୃତ୍ୟୁ ମାମଲା(ନଂ.୧/୨୬) ରୁଜୁ ହୋଇଛି। ସ୍ଥାନୀୟ ପୋଲିସ ଓ ଆୟୋଜକ କମିଟିର ଅବେହଳାରୁ ମିଲନଙ୍କ ମୃତ୍ୟୁ ଘଟିଥିବା ଅଭିଯୋଗ କରି ସ୍ଥାନୀୟ ସମିତି ସଭ୍ୟ ବୀରେନ୍ଦ୍ର ସାହୁ ଉଦ୍ବେଗ ପ୍ରକାଶ କରିଛନ୍ତି। ଏହି ଅବହେଳା ପାଇଁ ଦାୟୀ ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ସେ ବଲାଙ୍ଗୀର ଏସ୍ପିଙ୍କୁ ନିବେଦନ କରିଛନ୍ତି।
ସୂଚନା ଅନୁଯାୟୀ, ବୁଧବାର ମିଲନ ଓ ତାଙ୍କର କେତେକ ସାଙ୍ଗ ଝାରମୁଣ୍ଡା ଧନୁଯାତ୍ରା ଦେଖିବାକୁ ଆସି ରାମଦୋଳିରେ ବସିଥିଲେ। ରାତି ପ୍ରାୟ ୧୦ଟାରେ ମିଲନ ଦୋଳିରୁ ଖସି ଗୁରୁତର ହୋଇଥିଲେ ା ହେଲେ ଦୋଳି ମାଲିକ କିମ୍ବା ଯାତ୍ରା ଆୟୋଜକ କମିଟି ପକ୍ଷରୁ ତାଙ୍କୁ ଉଦ୍ଧାର ପାଇଁ ବ୍ୟବସ୍ଥା କରାଯାଇ ନ ଥିଲା ା ଯାତ୍ରା ଆୟୋଜକ କମିଟି ଆମ୍ବୁଲାନ୍ସ ଆସୁଛି କହି ପ୍ରାୟ ୫୦ ମିନିଟ୍ ସମୟ ଗଡାଇ ଦେଇଥିଲେ। ଶେଷରେ ସାଥୀରେ ଆସିଥିବା ସାଙ୍ଗମାନେ ମିଲନଙ୍କୁ ବାଇକ୍ରେ ସରଗାଡ ଗ୍ରାମକୁ ଆଣି ବଲାଙ୍ଗୀର ମେଡିକାଲକୁ ନେଇଥିଲେ। ସେଠାରେ ମିଲନଙ୍କୁ ଡାକ୍ତର ମୃତ ଘୋଷଣା କରିଥିଲେ ା ଯାତ୍ରାବେଳେ ଆୟୋଜକ କମିଟି ତରଫରୁ ପ୍ରାଥମିକ ଚିକିତ୍ସା ବ୍ୟବସ୍ଥା କରାଯାଇ ନ ଥିବାରୁ ମିଲନଙ୍କ ମୃତ୍ୟୁ ଘଟିଥିବା ତାଙ୍କ ପରିବାର ଓ ଗ୍ରାମବାସୀ ଅଭିଯୋଗ କରିଛନ୍ତି। ଏହି ଅଘଟଣ ପରେ ଆୟୋଜକ କମିଟି ସଦସ୍ୟ ଫେରାର ହୋଇଯାଇଛନ୍ତି। ଏ ସମ୍ପର୍କରେ ଆଇଆଇସି ସିପୋରା ସରାୟ ଲୁଗୁନ କହିଛନ୍ତି, ଦୋଳି ମାଲିକ ଏବଂ ଯାତ୍ରା ପଡିଆ ଠିକା ନେଇଥିବା ମାଲିକ ମୃତକଙ୍କ ପରିବାରକୁ ଭେଟି ୩ ଲକ୍ଷ ୫୦ ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରିଛନ୍ତି। ଆୟୋଜକ କମିଟି ପକ୍ଷରୁ ପ୍ରାଥମିକ ଚିକିତ୍ସା ବ୍ୟବସ୍ଥା କରାଯିବା କଥା, ହେଲେ ତାହା ହୋଇ ନ ଥିଲା। ଅପରପକ୍ଷେ ଉପଜିଲାପାଳ ଆଲୋକ ପଟେଲ କହିଛନ୍ତି, ଧନୁଯାତ୍ରା ପାଇଁ ଅନୁମତି ଥିବାବେଳେ ଦୋଳି ପାଇଁ ଅନୁମତି ନ ଥିଲା। ପୋଲିସ ପାଟ୍ରୋଲିଂ ସତ୍ତ୍ୱେ କିପରି ଦୋଳି ଚାଲିଥିଲା ତାହା ପ୍ରଶାସନିକ ତଦନ୍ତ ସାପେକ୍ଷ।
ପ୍ରକାଶ ଥାଉକି କିଶୋର ଚନ୍ଦ୍ର ସାହୁଙ୍କ ଏକମାତ୍ର ପୁଅ ମିଲନ। କିଶାର ଜଣେ କିଡ୍ନୀ ରୋଗୀ। ମିଲନ ଡ୍ରାଇଭିଂ କରି ପରିବାର ପ୍ରତିପୋଷଣ ସହ ବାପାଙ୍କ ଚିକିତ୍ସା କରାଉଥିଲେ। ମିଲନଙ୍କ ମୃତ୍ୟୁ ପରେ ତାଙ୍କ ପରିବାର ଅସହାୟ ହୋଇ ପଡିଛନ୍ତି। ସାଢେ ୩ ଲକ୍ଷ ଆର୍ଥିକ ସହାୟତା ଦେଇ ଘଟଣାକୁ ଚପାଇବା ଉଦ୍ୟମକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
Dharitri – Odisha’s No.1 Odia Daily
