ଭୁବନେଶ୍ୱର,୧୯ା୧୧: ଢେଙ୍କାନାଳ ଜିଲା କାମାକ୍ଷାନଗର ଉପଜିଲାପାଳ ନାରାୟଣ ଚନ୍ଦ୍ର ନାୟକ ଶେଷରେ ଗିରଫ ହୋଇଛନ୍ତି। ଆୟ ବର୍ହିଭୂତ ସଂପତ୍ତି ଠୁଳ ମାମଲାରେ ତାଙ୍କୁ ଭିଜିଲାନ୍ସ ଗିରଫ କରିଛି। ସୋମବାର ନାରାୟଣଙ୍କ ବିଭିନ୍ନ ଜାଗାରେ ଚଢ଼ାଉ କରିଥିଲା। ଏହି ଚଢ଼ାଉରେ ତାଙ୍କ ୩ଟି ବହୁତଳ କୋଠା, ୧୩ଟି ପ୍ଲଟ ଠାବ ହୋଇଥିଲା।
ନାରାୟଣ ଭିଜିଲାନ୍ସ ସ୍କାନର୍କୁ ଆସିବା ପରେ ତାଙ୍କ ସମ୍ପତ୍ତି ସାମ୍ରାଜ୍ୟର ଗୁମର ପଦାକୁ ଆସିଛି। ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ସୋମବାର ନାରାୟଣଙ୍କ ଘର ସମେତ ଖୋର୍ଦ୍ଧା, ଢେଙ୍କାନାଳ, ଭଦ୍ରକ, ମୟୂରଭଞ୍ଜ ଜିଲାର ୧୦ସ୍ଥାନରେ ଭିଜିଲାନ୍ସ ନିର୍ଦ୍ଦେଶାଳୟ ପକ୍ଷରୁ ଏକକାଳୀନ ଚଢ଼ାଉ ହୋଇଥିଲା। ଯାଞ୍ଚ ହେଉଥିବା ସ୍ଥାନ ମଧ୍ୟରେ ଭଦ୍ରକ ଜିଲା ଭଣ୍ଡାରୀପୋଖରୀ ଥାନା ଅନ୍ତର୍ଗତ ଜୋରାଢ଼ିଆ ଗ୍ରାମସ୍ଥିତ ସହଯୋଗୀଙ୍କ ଘର, ମୟୂରଭଞ୍ଜ ଜିଲା ରାଇରଙ୍ଗପୁର ଧଳପୁରସ୍ଥିତ ଅନ୍ୟଜଣେ ସହଯୋଗୀଙ୍କ ଘର, ଭଦ୍ରକ ବାରୁଆଣିରେ ଥିବା ସମ୍ପର୍କୀୟଙ୍କ ଘର, ଭଦ୍ରକ ବାସୁଦେବପୁରସ୍ଥିତ କପାଗାଡ଼ିଆ ଗ୍ରାମରେ ଥିବା ପୈତୃକ ଘର, କାମାକ୍ଷା ନଗରସ୍ଥିତ ସରକାରୀ କ୍ୱାର୍ଟର, କାର୍ଯ୍ୟାଳୟ ଆଦି ରହିଛି। ଭୁବନେଶ୍ୱର ସ୍ବତନ୍ତ୍ର ଭିଜିଲାନ୍ସ ଜଜ୍ଙ୍କ କୋର୍ଟଙ୍କ ପକ୍ଷରୁ ଜାରି ସର୍ଚ୍ଚ ଓ୍ବାରେଣ୍ଟ ବଳରେ ଏହି ଯାଞ୍ଚ ହୋଇଥିଲା। ଏଥିରେ ଭିଜିଲାନ୍ସ ନିର୍ଦ୍ଦେଶାଳୟର ୭ଜଣ ଡିଏସ୍ପି, ୩ ଇନ୍ସପେକ୍ଟର, ୮ ଏଏସ୍ଆଇ ଏବଂ ଅନ୍ୟ କର୍ମଚାରୀ ନିୟୋଜିତ ଅଛନ୍ତି। ସା ସୁଦ୍ଧା ନାରାୟଣଙ୍କ ଘରୁ ନଗଦ ୧ ଲକ୍ଷ ୪୮ ହଜାର ୬୮୦ ଟଙ୍କା ସମେତ ବିପୁଳ ସମ୍ପତ୍ତି ଠାବ ହୋଇଥିଲା।
ଭିଜିଲାନ୍ସ ସୂଚନା ଅନୁଯାୟୀ, ନାରାୟଣଙ୍କ ଭୁବନେଶ୍ୱର ଝାରପଡ଼ାସ୍ଥିତ ୪ ହଜାର ୮୦୦ ବର୍ଗଫୁଟରେ ଥିବା ନିର୍ମାଣାଧୀନ ୩ ମହଲା କୋଠା, ଭଦ୍ରକ ଜିଲା କୁଆଁସରେ ୬ ହଜାର ୯୦୦ ବର୍ଗଫୁଟରେ ଥିବା ୩ ମହଲା କୋଠା, ଗେଲପୁରରେ ୬ ହଜାର ୨୦୦ ବର୍ଗଫୁଟରେ ନିର୍ମାଣାଧୀନ ଦୁଇ ମହଲା କୋଠା ଠାବ ହୋଇଛି। ସେହିପରି ଭୁବନେଶ୍ୱର, ଭଦ୍ରକ ଓ ପୁରୀରେ ୧୪ଟି ବହୁମୂଲ୍ୟ ପ୍ଲଟ୍ ଠାବ ହୋଇଛି। ଏହି ପ୍ଲଟ୍ଗୁଡ଼ିକ ମଧ୍ୟରେ ଭୁବନେଶ୍ୱରରେ ୭, ଭଦ୍ରକରେ ୬ ଓ ପୁରୀ ଜିଲା ପିପିଲିରେ ଗୋଟିଏ ରହିଛି। କ୍ରୟ ସମ୍ବନ୍ଧିତ ଦଲିଲ୍ରେ ପ୍ଲଟଗୁଡ଼ିକର ମୂଲ୍ୟ ୧.୪ କୋଟି ଉଲ୍ଲେଖ ଥିବାବେଳେ ଏହାର ପ୍ରକୃତ ମୂଲ୍ୟ ବହୁ ଅଧିକ ହେବ ବୋଲି ଭିଜିଲାନ୍ସ ସନ୍ଦେହ କରୁଛି। ପ୍ଲଟ୍ ଓ କୋଠାର ପ୍ରକୃତ ମୂଲ୍ୟ ଜାଣିବାକୁ ଭିଜିଲାନ୍ସ ଟେକ୍ନିକାଲ୍ ଓ୍ବିଙ୍ଗ୍ ପ୍ରୟାସ ଜାରି ରଖିଛି। ସେହିପରି ବ୍ୟାଙ୍କ, ଜୀବନବୀମା ଓ ପୋଷ୍ଟାଲ ଜମା ୩୪ ଲକ୍ଷ ୫୭ ହଜାର ୫୨ ଟଙ୍କା ଥିବା ବେଳେ ଘରୁ ୩୬୬ ଗ୍ରାମର ଅଳଙ୍କାର, ଗୋଟିଏ ଦୁଇ ଚକିଆ ଯାନ ଠାବ ହୋଇଛି।
ତେବେ ନାରାୟଣଙ୍କ ଚାକିରି କାଳ ସମ୍ବନ୍ଧରେ ଭିଜିଲାନ୍ସ ପକ୍ଷରୁ ମଧ୍ୟ ସୂଚନା ଦିଆଯାଇଛି। ନାରାୟଣ ୧୯୯୭ରେ ଓପିଏସ୍ସି-ଓଏସ୍ସିଏସ୍ ଜରିଆରେ ସରକାରୀ ଚାକିରିରେ ଯୋଗ ଦେଇଥିଲେ। ପରେ ସେ କଳାହାଣ୍ଡିରେ ଆସିଷ୍ଟାଣ୍ଟ ସେଟେଲ୍ମେଣ୍ଟ ଅଫିସର ଓ ଭବାନୀପାଟଣା ଅତିରିକ୍ତ ତହସିଲଦାର ଭାବେ ୧୯୯୯ରୁ ୨୦୦୪ ଯାଏ ୫ବର୍ଷ କାମ କରିଥିଲେ। ପରେ ନାରାୟଣ ବିଡିଓ ଭାବେ ଖରିଆର, ଦଶରଥପୁର ଓ ବାଲିଅନ୍ତା ବ୍ଲକରେ ୨୦୧୪ରୁ ୨୦୨୩ ଯାଏ କାମ କରିଥିଲେ। ୨୦୧୧ରେ ନାରାୟଣ ଓଏଏସ୍ କ୍ୟାଡରରେ ଯୋଗ ଦେଇଥିଲେ। ୨୦୨୩ରୁ ସେ କାମାକ୍ଷାନଗର ଉପଜିଲାପାଳ ଭାବେ କାମ କରୁଥିଲେ।
