ବେଗୁନିଆ,୨୧ା୨(ଡି.ଏନ୍.ଏ.): କ୍ଷତିଗ୍ରସ୍ତ ମିଳିତ ମଞ୍ଚ ଡାକରାରେ ରବିବାର ଖୋର୍ଦ୍ଧା ଜିଲା ବେଗୁନିଆ ବଜାରସ୍ଥିତ ମା’ଦୁର୍ଗା ଦେବୀଙ୍କ ପୀଠ ପରିସରରେ ଏକ ବୈଠକ ଅନୁଷ୍ଠିତ ହୋଇଯାଇଛି। ମଞ୍ଚ ରାଜ୍ୟ ସମ୍ପାଦକ ମଧୁସୂଦନ ବିଶ୍ବାଳଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ବେଗୁନିଆ ବ୍ଲକ ଅଞ୍ଚଳର ବହୁ କ୍ଷତିଗ୍ରସ୍ତ ଜମାକାରୀ ଯୋଗଦେଇଥିଲେ। ଘରୋଇ କମ୍ପାନୀଙ୍କ ଠାରୁ କିପରି ଟଙ୍କା ଫେରିପାଇବେ ସେ ନେଇ ଆଲୋଚନା କରାଯାଇଥିଲା। ଆସନ୍ତା ୭ଦିନ ମଧ୍ୟରେ ଟଙ୍କା ନ ଫେରାଗଲେ ଜିଲାପାଳଙ୍କ କାର୍ଯ୍ୟାଳୟ ଆଗରେ ଆନ୍ଦୋଳନ କରାଯିବ ବୋଲି ଜମାକରୀମାନେ ଚେତାବନୀ ଦେଇଛନ୍ତି। ଏନେଇ ସୋମବାର ଏକ ପତ୍ର ଜିଲାପାଳ ଓ ରାଜ୍ୟ ସରକାରଙ୍କୁ ପ୍ରଦାନ କରାଯିବ। ସୂଚନାଥାଉ କି, ବେଗୁନିଆ ଅଞ୍ଚଳରୁ ଅନେକ ଘରୋଇ ଅର୍ଥ ଲାଗାଣକାରୀ ସଂସ୍ଥା ୫୦କୋଟିରୁ ଊର୍ଦ୍ଧ୍ୱ ଟଙ୍କା ଠକି ନେଇଯାଇଛନ୍ତି। ଦୀର୍ଘ ୮ବର୍ଷ ହେବ ଜମାକାରୀମାନେ ନାହିଁ ନ ଥିବା ହଇରାଣ ହେଉଛନ୍ତି। ୨୦୧୩ରୁ ଲଢ଼େଇ ଜୋରଦାର କରୁଥିବା ମିଳିତ ମଞ୍ଚର ଦାବିକୁ ସରକାର ଶୁଣିଥିଲେ। ୩୦୦କୋଟି ଟଙ୍କାର କପର୍ସଫଣ୍ଡ ଗଠନ କରି ବହୁ କମ୍ପାନୀର ସମ୍ପତ୍ତି ବାଜ୍ୟାପ୍ତି କରିଥିଲେ। ଜମାକାରୀଙ୍କ ଟଙ୍କା ଏବେ ଯାଏ ଫେରିପାଇ ନ ଥିବା ଜଣାପଡ଼ିଛି। ବୈଠକରେ ଅନୁରାଧା ସୁବୁଦ୍ଧି, ଦୟାନିଧି ସାହୁ, ରିନାରାଣୀ ବଳବନ୍ତରାୟ, ନଳିନୀ ସାହୁ, ଗୀତାଞ୍ଜଳି ସ୍ବାଇଁ, ପ୍ରଦୀପ ପଣ୍ଡା ପ୍ରମୁଖ ଉପସ୍ଥିତ ଥିଲେ।
