ଦେବଗଡ,୧୨।୨(ଶଶାଙ୍କ ଶେଖର ଝାଙ୍କର): ବିଦ୍ୟାଳୟରେ ଶିକ୍ଷକଙ୍କ ଅଭଦ୍ରାମି। ବିଜ୍ଞାନ ପାଠ ବଦଳରେ ଛାତ୍ରୀଙ୍କୁ ପଚାରୁଛନ୍ତି ‘ହଗ୍-ଡେ’ ଓ ‘ପ୍ରପୋଜ୍-ଡେ’। ଦେବଗଡ଼ ଜିଲା ରିଆମାଳ ବ୍ଲକରୁ ଆସିଛି ଏଭଳି ଏକ ସମ୍ବେଦନଶୀଳ ଖବର। କୁଣ୍ଢେଇଗୋଳା ସରକାରୀ ଉଚ୍ଚ ବିଦ୍ୟାଳୟର ଜଣେ ବିଜ୍ଞାନ ଶିକ୍ଷକଙ୍କ ବିରୋଧରେ ଛାତ୍ରୀଙ୍କୁ ଅଶୋଭନୀୟ ବ୍ୟବହାର ଓ ମାନସିକ ନିର୍ଯାତନା ଦେଇଥିବା ନେଇ ସଙ୍ଗୀନ ଅଭିଯୋଗ ହୋଇଛି। ପ୍ରେମ ସପ୍ତାହ ଚାଲିଥିବା ବେଳେ ଶିକ୍ଷକ ଜଣକ ଛାତ୍ରୀମାନଙ୍କୁ ପାଠ ପଢ଼ାଇବା ପରିବର୍ତ୍ତେ ‘ପ୍ରେମର ପାଠ’ ପଢ଼ାଉଥିବା ନେଇ ଅଭିଭାବକମାନେ ଉତ୍ତେଜନା ପ୍ରକାଶ କରିଛନ୍ତି।
ବିଜ୍ଞାନ ଶିକ୍ଷକ ତପନ କୁମାର ମିଶ୍ର ଖାଇବାଛୁଟି ସମୟରେ କେତେକ ଛାତ୍ରୀଙ୍କୁ ‘ଗୁଲଗୁଲା’ ଓ ‘ସିଙ୍ଗଡା’ ଭଳି ଅଶୋଭନୀୟ ଶବ୍ଦରେ ସମ୍ବୋଧନ କରିଥିଲେ। ଏତିକିରେ ସେ ଅଟକି ନ ଥିଲେ। ଛାତ୍ରୀମାନଙ୍କୁ ଆଜି କି ଦିନ ବୋଲି ପଚାରିବା ସହ ‘ହଗ୍ ଡେ’, ‘ପ୍ରପୋଜ୍ ଡେ’ ଏବଂ ‘ଚକୋଲେଟ୍ ଡେ’ ବିଷୟରେ ଅଜବ ପାଠ ପଢ଼ାଇଥିଲେ। ଏପରିକି ସେ ଛାତ୍ରୀମାନଙ୍କୁ ଚକୋଲେଟ୍ ମାଗିବା ସହ ନାଲି ଆଖି ଦେଖାଇ ଧମକାଇଥିବା ମଧ୍ୟ ଅଭିଯୋଗ ହୋଇଛି।
ବୁଧବାର ଛାତ୍ରୀମାନେ ଏ ସମ୍ପର୍କରେ ଘରେ ଜଣାଇବା ପରେ, ଗୁରୁବାର ଅଭିଭାବକମାନେ ବିଦ୍ୟାଳୟରେ ପହଞ୍ଚି ବିଦ୍ୟାଳୟ ପରିଚାଳନା ସମିତି ସଭାପତି ନାରାୟଣ ସାହୁଙ୍କ ସମ୍ମୁଖରେ ଶିକ୍ଷକଙ୍କ ଉପରେ ବର୍ଷିଥିଲେ। ଏହାକୁ ନେଇ ସ୍କୁଲରେ ଏକ ବୈଠକ ବସିଥିଲା, ଯେଉଁଠାରେ ଶିକ୍ଷକଙ୍କ ଏତାଦୃଶ ଆଚରଣକୁ ନେଇ ତୀବ୍ର ନିନ୍ଦା କରାଯାଇଥିଲା।
ଜିଲା ଶିକ୍ଷା ଅଧିକାରୀ ଗେନ୍ଦ୍ରା କୁଜୁର ଏହି ଘଟଣା ସମ୍ପର୍କରେ ଜାଣିବା ପରେ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ପୁଷ୍ପାଞ୍ଜଳି କିସାନଙ୍କ ସହ ଆଲୋଚନା କରିଛନ୍ତି। ଆବଶ୍ୟକ ସ୍ଥଳେ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ନିର୍ଦ୍ଦେଶ ଦେଇଛନ୍ତି। ଗୁରୁବାର ସନ୍ଧ୍ୟାରେ ଜଣେ ଛାତ୍ରୀଙ୍କ ଅଭିଭାବକ କୁଣ୍ଢେଇଗୋଳା ଥାନାରେ ଶିକ୍ଷକ ତପନ ମିଶ୍ରଙ୍କ ବିରୋଧରେ ଲିଖିତ ଅଭିଯୋଗ କରିଛନ୍ତି।
ତେବେ ଏହି ସମସ୍ତ ଅଭିଯୋଗ ଉପରେ ସମ୍ପୃକ୍ତ ଶିକ୍ଷକଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ। ବିଦ୍ୟାଳୟରେ ଶିକ୍ଷକଙ୍କ ଏଭଳି ଆଚରଣ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।