ବଞ୍ଚୋ,୨୫ା୨(ପ୍ରଦୋଷ ବିଶ୍ୱାଳ): କେନ୍ଦୁଝର ଜିଲାର ଆନନ୍ଦପୁର ଉପଖଣ୍ଡ ସ୍ବତନ୍ତ୍ର ଜିଲା ମାନ୍ୟତା ପାଇବା ପାଇଁ ସମସ୍ତ ସର୍ତ୍ତ ପୂରଣ କରୁଥିବା ସତ୍ତ୍ୱେ ଏହା ଅବହେଳିତ ହୋଇରହିଛି। ଦୁଇ ବର୍ଷ ଅନ୍ତରରେ ପୁଣି ଆନନ୍ଦପୁରକୁ ସ୍ବତନ୍ତ୍ର ଜିଲା ଦାବି ପ୍ରସଙ୍ଗ ଚର୍ଚ୍ଚାକୁ ଆସିଛି। ଏବେ ରାଜ୍ୟରେ ଓ କେନ୍ଦ୍ରରେ ଭାଜପା ସରକାର ଜିଲା ଦାବି ପ୍ରସଙ୍ଗରେ ଗୁରୁତ୍ୱ ଅନେକ ବୋଲି ଅନୁଭବ କରି ଆନନ୍ଦପୁର ବିକାଶ ପରିଷଦ ନିଜର ହକ୍ ପାଇଁ ଅଣ୍ଟାଭିଡ଼ିଛି। ଆନନ୍ଦପୁରକୁ ସ୍ବତନ୍ତ୍ର ଜିଲା ମାନ୍ୟତା ପ୍ରଦାନ ଦାବି କରାଯାଇ ବିକାଶ ପରିଷଦ ଆନୁକୂଲ୍ୟରେ ଏକ ଦାବିପତ୍ର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଉପଜିଲାପାଳଙ୍କ ନିକଟରେ ଦେଇଛନ୍ତି।
ଆନନ୍ଦପୁର ବିକାଶ ପରିଷଦର ସଭାପତି ରମାକାନ୍ତ ନାୟକଙ୍କ ସଂଯୋଜନାରେ ଆୟୋଜିତ ଦାବିପତ୍ର ବୁଧବାର ଦିଆଯାଇଛି। ଉପଦେଷ୍ଟା ମହେଶ୍ୱର ସାହୁ, ମଦନ ପାଣି, ଭାଗିରଥୀ ଦାଶ, ଶତ୍ରୁଘ୍ନ ସାହୁ, ନିରାକାର ଦଳେଇ, ସୋମନାଥ ମିଶ୍ର, ରମେଶ କୁମାର ସିଂହ, ଇଲାଟେନ୍ଦୁ ଧୀର, ଲୋକନାଥ ସିଂହ, ଗଗନସିଂହ, ଦେବେନ୍ଦ୍ର ନାଥ ମିଶ୍ର, କୀର୍ତ୍ତନ ବିହାରୀ ସାହୁ, କୃଷ୍ଣଚନ୍ଦ୍ର ରଣା, ଯଜ୍ଞ ପ୍ରସାଦ ସାହୁ, ତ୍ରିଲୋଚନ ଦାଶ, ସତ୍ୟାନନ୍ଦ ମିଶ୍ର, ମମତା ଜେନା, ପଦ୍ମନାଭ ପାତ୍ର,ସନ୍ତୋଷ ରାଉତ,ସୁଦାମ ମଙ୍ଗଳ ପ୍ରମୁଖଙ୍କ ସମେତ ବହୁ ସଂଖ୍ୟାରେ ସ୍ଥାନୀୟ ସଚେତନ ନାଗରିକ ଆୟୋଜିତ ବୈଠକରେ ସମ୍ମିଳିତ ହୋଇ ଜିଲା ଦାବି ଉପସ୍ଥାପନ କରିଥିଲେ। ଜିଲା ଦାବି ଆନ୍ଦୋଳନର ପ୍ରାଥମିକ ସ୍ତରରେ ଆଜି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଆନନ୍ଦପୁର ଉପଜିଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଛି। ପରବର୍ତ୍ତୀ ସମୟରେ ବିଭିନ୍ନ ପଦକ୍ଷେପ ଗ୍ରହଣ କରାଯିବାକୁ ମ୍ୟାପ୍ ପ୍ରସ୍ତୁତ କରାଯାଇଛି।