ଭଞ୍ଜନଗର,୨୪/୧୨(ବାବୁଲା ପ୍ରଧାନ)-ଜାତୀୟ ଖାଉଟି ଦିବସ ପାଳନ ଅବସରରେ ଉପଭୋକ୍ତା ଓକିଲାତି ସଂଘ ବୋର୍ଡ, ଅବସର ସୈନିକ ସଂଘ, ଗ୍ରାହକ ପଞ୍ଚାୟତ ମିଳିତ ସହଯୋଗରେ ବୁଧବାର ଭଞ୍ଜନଗର କାରଗିଲ ସହିଦ ଭବନରେ ଗ୍ରାହକ ଦିବସ ପାଳନ ହୋଇଯାଇଛି । ଭଞ୍ଜନଗର ଉପଖଣ୍ଡ ଅତିରିକ୍ତ ଯୋଗାଣ ଅଧିକାରୀ ଶୁଭରାଜ ସାମନ୍ତରା ମୁଖ୍ୟ ଅତିଥି ଭାବେ ଯୋଗଦେଇ କାର୍ଯ୍ୟକ୍ରମକୁ ଉଦଘାଟନ କରିଥିଲେ । ଏହି ଅବସରରେ ସେ କହିଥିଲେ ଯେ ଖାଉଟି ସଚେତନ ହେଲେ ସେମାନେ ଠକେଇର ଶିକାର ହେବେ ନାହିଁ । ତେଣୁ ଗ୍ରାହକମାନେ ପ୍ରଥମେ ସଚେତନ ହେବାକୁ ପଡିବ। ନୀତି ନିୟମ ଜାଣିବା ଦରକାର ବୋଲି କହିଥିଲେ।
ସମ୍ମାନୀୟ ଅତିଥି ଭାବେ ଉପଖଣ୍ଡ ସୂଚନା ଲୋକ ସମ୍ପର୍କ ଅଧିକାରୀ ସନ୍ତୋଷ କୁମାର ନାୟକ ଯୋଗଦେଇ ଡିଜିଟାଲ ଭାରତ ଯୋଜନାରେ ଇ ସେବା ମାଧ୍ୟମରେ ଗ୍ରାହକ ମାନେ ଟଙ୍କା କାରବାର କରିବା ଉପରେ ଗୁରୁତ୍ବ ଦେଇଥିଲେ । ବ୍ୟାଙ୍କ, ବୀମା, ବିଦ୍ୟୁତ, ମୋବାଇଲ, ଇଣ୍ଟରନେଟ୍, ଶିକ୍ଷା, ସ୍ୱାସ୍ଥ୍ୟ,ଡାକ, ଷ୍ଟକ ବଜାର,ରେଲ ଓ ବିମାନ , ପରିବହନ ସେବାରେ ଯାତ୍ରୀମାନେ ଅନେକ ସମୟରେ ଠକେଇର ଶିକାର ହେଉଛନ୍ତି। ଭଞ୍ଜନଗର ପେଟ୍ରୋଲ ପମ୍ପ ରେ ଫ୍ରି ଏୟାର ସେବା ମିଳୁନାହିଁ। ପରିସ୍ରାଗାର, ଲେଟିନ ସଫା ରହୁନାହିଁ। ଏଥିପ୍ରତି ପେଟ୍ରୋଲ ପମ୍ପ ମାଲିକ୍ମାନେ ଦୃଷ୍ଟି ଦେଉନାହାନ୍ତି। ସହରରେ ଥିବା ହୋଟେଲ ଗୁଡିକରେ ନିମ୍ନ ମାନର ଖାଦ୍ୟ ବିକ୍ରି ହେଉଛି। ବିଭିନ୍ନ ହୋଲସେଲ ଦୋକାନରେ ମଧ୍ଯ ନିମ୍ନ ମାନର ଜିନିଷ ବିକ୍ରି ହେଉଛି। ଔଷଧ ଦୋକାନରେ ମଧ୍ଯ ଏହି ସମସ୍ୟା।
ସହରର ଅଧିକାଂଶ ସ୍ଥାନରେ ନକଲି ଜିନିଷ ବିକ୍ରି ହେଉଛି। ଖାଦ୍ୟ ଇନ୍ସପେକ୍ଟର ନିଜ ଦାୟିତ୍ୱ ସୁଚାରୁପେ ତୁଲାଉ ନାହାନ୍ତି। ଫଳରେ ନକଲି ଜିନିଷରେ ଅସଲି ଗ୍ରାହକ ଠକେଇ ଶିକାର ହେଉଛନ୍ତି । ତେଣୁ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେବାପାଇଁ ବୈଠକରେ କିଛି ବକ୍ତା ଦାବି କରିଥିଲେ। ବୋର୍ଡ ସମ୍ପାଦକ ପ୍ରକାଶ ସାହୁ ତାଲିମ ଦେଇ ଗ୍ରାହକ ମାନଙ୍କୁ ମିଳୁଥିବା ସୁବିଧା ଏବଂ ଅନ୍ୟାନ୍ୟ ବିଷୟରେ ସଚେତନ କରାଇଥିଲେ। ଭଞ୍ଜନଗରରେ ଖାଉଟି ଅଦାଲତ ସ୍ଥାପନ ପାଇଁ ଅଧିକାଂଶ ବକ୍ତା ଦାବୀ କରିଥିଲେ। ସ୍ମାର୍ଟ ମିଟରକୁ ମଧ୍ଯ ବିରୋଧ କରାଯାଇଥିଲା । ଗ୍ରାହକ ପଞ୍ଚାୟତ ସଭାପତି ତ୍ରିନାଥ ଗୌଡ ଧନ୍ୟବାଦ ଅର୍ପଣ କରିଥିଲେ ।
