ନୂଆଦିଲ୍ଲୀ,୭।୨: ପ୍ରଧାନମନ୍ତ୍ରୀଙ୍କ ଆହ୍ବାନକ୍ରମେ ଭାରତରେ ମେଡ୍ ଇନ୍ ଇଣ୍ଡିଆ କୋଭିଡ୍ ଟିକା ପ୍ରସ୍ତୁତ କରାଯାଇଥିଲା। ବର୍ତ୍ତମାନ ସୁଦ୍ଧା ଏହି ଟିକାର କୌଣସି ପାର୍ଶ୍ୱ ପ୍ରତିକ୍ରିୟା କିମ୍ବା ଅଘଟଣ ଭଳି ଖବର ଆସିନାହିଁ। ଭାରତରେ ବର୍ତ୍ତମାନ ସୁଦ୍ଧା ୨ କୋଟିରୁ ଊର୍ଦ୍ଧ୍ୱ ଆଗଧାଡ଼ିର କରୋନା ଯୋଦ୍ଧା ଏହି ଟିକା ନେଇ ସାରିଛନ୍ତି। ଏହି ଖବର ପ୍ରଚାର ଓ ପ୍ରସାର ହେବା ପରେ ବିଶ୍ୱର ବିଭିନ୍ନ ରାଷ୍ଟ୍ରରୁ ଭାରତର ଟିକା ଉପଯୋଗୀ ଓ ଏହାର ବ୍ୟବହାର ପାଇଁ ବିଭିନ୍ନ ଫୋରମରେ ଆଲୋଚନା କରିଛନ୍ତି। ଭାରତ ଏପର୍ଯ୍ୟନ୍ତ ୧୫ଟି ଦେଶକୁ କୋଭିଡ୍-୧୯ ଟିକା ଯୋଗାଇ ଦେଇଛି ଏବଂ ଅନ୍ୟ ୨୫ଟି ଦେଶ ଅପେକ୍ଷାର ଅଛନ୍ତି ବୋଲି ବୈଦେଶିକ ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ଶନିବାର ଏକ ପ୍ରେସ୍ ସମ୍ମିଳନୀରେ କହିଛନ୍ତି।
ଏ ସମ୍ପର୍କରେ ମନ୍ତ୍ରୀ କହିଛନ୍ତି, ଟିକା ପାଇଁ ତିନିଟି ବର୍ଗର ଦେଶ ରହିଛନ୍ତି। ଭାରତରୁ ଟିକା ପାଇବାକୁ ଆଗ୍ରହୀ ତିନି ବର୍ଗ ହେଲେ ଗରିବ, ସମ୍ବେଦନଶୀଳ ଦେଶ ଓ ଅନ୍ୟାନ୍ୟ ଦେଶ ଯାହା ଫାର୍ମାସ୍ୟୁଟିକାଲ କମ୍ପାନୀ ସହିତ ସିଧାସଳଖ କାରବାର କରିଥାଏ। ବର୍ତ୍ତମାନ ସୁଦ୍ଧା ୧୫ଟି ଦେଶକୁ ଟିକା ଯୋଗାଇ ଦିଆଯାଇଛି। ଟିକା ପାଇଁ ଆହୁରି ୨୫ଟି ଦେଶ ସରକାରୀ ନିୟମାବଳୀ ଅନୁସାରେ ବିଭିନ୍ନ ପର୍ଯ୍ୟାୟରେ ରହିଛନ୍ତି। ଏହି ଘଟଣା
ଆଜି ଭାରତକୁ ବିଶ୍ୱ ମାନଚିତ୍ରରେ ଉଚ୍ଚସ୍ତରକୁ ନେବା ସହିତ ଦେଶର ଗୌରବକୁ ଆହୁରି ବଢ଼ାଛି ବୋଲି ଜୟଶଙ୍କର କହିଥିଲେ। ସେହିଭଳି ଭାରତ ପକ୍ଷରୁ କେତେକ ଗରିବ ଦେଶକୁ ଅନୁଦାନ ଭିତ୍ତିରେ ଏହି ଟିକା ଯୋଗାଇ ଦିଆଯାଇଥିବା ବେଳେ କେତେକ ଦେଶ ଏହି ଟିକା ପ୍ରସ୍ତୁତକାରୀଙ୍କଠାରୁ ଭାରତ ସରକାରଙ୍କ ପକ୍ଷରୁ ଧାର୍ଯ୍ୟ ମୂଲ୍ୟ ଦେଇ ନେବାକୁ ଚାହୁଁଛନ୍ତି। ସେହିପରି ଅନ୍ୟ କେତେକ ଦେଶ ଭାରତୀୟ ଟିକା ଉତ୍ପାଦନକାରୀ କମ୍ପାନୀ ସହିତ ସିଧାସଳଖ ଚୁକ୍ତି କରିଛନ୍ତି ଏବଂ ବ୍ୟବସାୟିକ ଭିତ୍ତିରେ ବୁଝାମଣା କରିଛନ୍ତି ବୋଲି ସୂଚନା ମିଳିଛି। ପୁଣେର ସିରମ୍ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆ, ଭାରତ ବାୟୋଟେକ୍ ଏବଂ ଅକ୍ସଫୋର୍ଡର କୋଭିଶିଲ୍ଡ, କୋଭାକ୍ସିନ୍ ଦୁଇଟି କୋଭିଡ୍ ଟିକା ପାଇଁ ଅନୁମତି ମିଳିସାରିଛି।
