ମଦନପୁର,୧୯ା୯(ଜଗଦୀଶ ପ୍ରସାଦ ରଣା): କଳାହାଣ୍ଡି ଜିଲା ମ. ରାମପୁର ବ୍ଲକ ମଦନପୁର ଧବଳେଶ୍ବର ପୀଠ ନିକଟସ୍ଥ କଲ୍ୟାଣମଣ୍ଡପଠାରେ ମଦନପୁର ପଞ୍ଚାୟତ ସମିତି ସଂଗ୍ରାମ କମିଟିର ସଂଯୋଜକ ସୁଦର୍ଶନ ପାଢ଼ୀଙ୍କ ସଭାପତିତ୍ୱରେ କର୍ଲାମୁଣ୍ଡା ବ୍ଲକର ୨ଟି ଏବଂ ମ. ରାମପୁର ବ୍ଲକର ୯ଟି ମୋଟ୍ ୧୧ଟି ପଞ୍ଚାୟତର ପଞ୍ଚାୟତ ପ୍ରତିନିଧି, ବୁଦ୍ଧିଜୀବୀ, ଆଇନଜୀବୀ, ପୂର୍ବତନ ସରପଞ୍ଚ, ବରିଷ୍ଠ ନାଗରିକ, ଚାଷୀ, ସ୍ବେଚ୍ଛାସେବୀ ଅନୁଷ୍ଠାନ, ବ୍ୟବସାୟୀ, ଗଣମାଧ୍ୟମ ପ୍ରତିନିଧି ଓ ଯୁବଗୋଷ୍ଠୀଙ୍କୁ ନେଇ ମଦନପୁରକୁ ନୂତନ ବ୍ଲକ ଗଠନ ନିମନ୍ତେ ଏକ ସର୍ବଦଳୀୟ ସ୍ବତନ୍ତ୍ର ବୈଠକ ହୋଇଥିଲା। ଏଥିରେ ଓଡ଼ିଶା ସରକାରଙ୍କ ନିୟମ ଅନୁସାରେ ଜନସଂଖ୍ୟା, ଭୌଗୋଳିକ ସ୍ଥିତି, ସରକାରୀ ଜାଗା, ପ୍ରତ୍ୟେକ ଦୃଷ୍ଟିକୋଣରୁ ସମସ୍ତ ଗାଇଡ୍ଲାଇନ୍ ପୂରଣ କରୁଥିବାରୁ ଏବଂ ୧୧ଟି ପଞ୍ଚାୟତର ମଧ୍ୟସ୍ଥ ସ୍ଥାନ ହୋଇଥିବାରୁ ମଦନପୁରକୁ ବ୍ଲକ ପାଇଁ ଦାବିଦାର ବୋଲି ଆଲୋଚନା କରିବା ସହିତ ଆଗାମୀ ଦିନର କାର୍ଯ୍ୟଖସଡ଼ା, ଗ୍ରାମ୍ୟ କମିଟି, ନାରୀ ଶକ୍ତି କମିଟି ଗଠନ ପାଇଁ ଯୋଜନା କରାଯାଇଥିଲା। ଉକ୍ତ କାର୍ଯ୍ୟକ୍ରମ ଆବାହକ ହରି ମହାନନ୍ଦ ପରିଚାଳନା କରିଥିବାବେଳେ ବିଭିନ୍ନ ପଞ୍ଚାୟତରୁ ଭୀମସେନ ସାହୁ, ଜୟରାମ ମହାନନ୍ଦ, ବିଶ୍ୱମ୍ବର ରଣା, ସୁନନ୍ଦ ପଧାନ,ସହଦେବ ପାଢ଼ୀ, ଜନ୍ମେଜୟ ରଣା, ଗଙ୍ଗାଧର ରଣା, ବିକ୍ରମ ପଧାନ, କ୍ଷେତ୍ରମୋହନ ସାହୁ, ସୁନୀଲ ଧଙ୍ଗଡ଼ା ମାଝୀ, ସରୋଜ ବେହେରା, ପ୍ରଦୀପ କୁମାର ସାହୁ, ବନମାଳୀ ସିଂ, ଯୁବନେତା ଆଶିଷ ଦଣ୍ଡିଆ ନିଜ ସହଯୋଗ ଓ ମତାମତ ପ୍ରଦାନ କରିଥିଲେ। ମଦନପୁରକୁ ନୂତନ ବ୍ଲକ ଘୋଷଣା ନ କରିବା ପର୍ଯ୍ୟନ୍ତ ଏ ସଂଗ୍ରାମ ଜାରି ରହିବ ବୋଲି କମିଟି ପକ୍ଷରୁ ସୂଚନା ଦିଆଯାଇଛି।
