ଭୁବନେଶ୍ୱର, ୧୬।୩(ସୁନିତ୍ ମିଶ୍ର):ରାଜ୍ୟ ସଭା ନିର୍ବାଚନ ଲାଗି ସବୁ ଦଳ ନିଜ ବିଧାୟକମାନଙ୍କୁ ଗୋଠକରି ରଖିବାକୁ ସମସ୍ତ ଉଦ୍ୟମ ଚଳାଇଛନ୍ତି। ମାତ୍ର ବିରୋଧୀ ଦଳ ବିଜେଡି ଏବଂ କଂଗ୍ରେସର କେତେଜଣ ବିଧାୟକ ସେମାନଙ୍କ ଗୋଠରେ ନ ରହି ଗତ ୩ ଦିନ ହେଲା ଦେଖାଦେଉ ନ ଥିବା ଜଣାପଡ଼ିଛି। ଉଭୟ ବିଜେଡି ଏବଂ କଂଗ୍ରେସ ପକ୍ଷରୁ ଏହି ଅଭିଯୋଗ କରାଯାଇଛି। ତେବେ ବିଜେଡି ପ୍ରାର୍ଥୀ ହୋଇଥିବା ସନ୍ତୃପ୍ତ ମିଶ୍ର ଏବଂ ମିଳିତ ବିରୋଧୀ ଦଳ ସମର୍ଥନରେ କମନ୍ ପ୍ରାର୍ଥୀ ହୋଇଥିବା ଡାକ୍ତର ଦତ୍ତେଶ୍ୱର ହୋତାଙ୍କୁ ନେଇ ନୂଆ ଚର୍ଚ୍ଚା ଆରମ୍ଭ ହୋଇଛି। ଦଳର ସବୁ ବିଧାୟକ କିପରି ଭୋଟ ଦେବେ ସେଥିନେଇ ବିଜେଡି ସଭାପତି ନବୀନ ପଟ୍ଟନାୟକ ଜୋର୍ଦାର ଉଦ୍ୟମ ଚଳାଇଛନ୍ତି। ଦଳ ଉପରେ ଅସନ୍ତୁଷ୍ଟ ଥିବା ସମସ୍ତଙ୍କୁ ବୁଝାଇବା ପାଇଁ ବିଜେଡି ପକ୍ଷରୁ ଚେଷ୍ଟା ଚାଲିଛି। ଗତ ୨ ଦିନ ତଳେ ବିଜେଡିର ପୂର୍ବତନ ବିଧାୟକ ପ୍ରଭାତ ବିଶ୍ୱାଳଙ୍କୁ ବୁଝାଇବା ପାଇଁ ୧୪ ଜଣ ବିଧାୟକ ତାଙ୍କ ଘରକୁ ଯାଇଥିଲେ।
ଉଲ୍ଲେଖଯୋଗ୍ୟ, ପ୍ରଭାତଙ୍କ ପୁତ୍ର ସୌଭିକ ବିଶ୍ୱାଳ ଏବେ କଟକ-ଚୌଦ୍ୱାର ଆସନରୁ ବିଜେଡି ବିଧାୟକ ଅଛନ୍ତି। ଯେଉଁମାନେ ପ୍ରଭାତଙ୍କୁ ବୁଝାଇବା ଲାଗି କଟକ ଯାଇଥିଲେ, ସେହି ବିଧାୟକମାନଙ୍କୁ ଶନିବାର ନବୀନ ନିବାସ ଡକାଇ ନବୀନ ପଟ୍ଟନାୟକ ପଚାରିଥିଲେ, ପ୍ରଭାତଙ୍କୁ ବୁଝାଇବା ପାଇଁ ଯାଇଥିଲ, ସେଠାରେ କ’ଣ ହେଲା। ବିଧାୟକମାନେ ଉତ୍ତରରେ କହିଥିଲେ, ଦିଲ୍ଲୀରେ ଗୋଟିଏ ଟ୍ରଷ୍ଟ ଖୋଲି ଦଳୀୟ ଟଙ୍କା ହଡ଼ପ କରାଯାଇଥିବା କଥା ପ୍ରଭାତ କହୁଛନ୍ତି।
ଏହାପରେ ନବୀନ ପଚାରିଲେ, କେଉଁ ଆକାଉଣ୍ଟ କାହା ନଁାରେ ଖୋଲାଯାଇଛି ବୋଲି ସେ କହୁଛନ୍ତି। ପୁଣିଥରେ ବିଧାୟକମାନେ କହିଥିଲେ, ଆପଣଙ୍କ ନାଁରେ ସେହି ଆକାଉଣ୍ଟ ଖୋଲାଯାଇଛି। ଗୋଟିଏ ଟ୍ରଷ୍ଟ ଜରିଆରେ ଏସବୁ ହେଉଛି, ଯେଉଁଥିରେ ପାଣ୍ଡିଆନ୍ ଅଧ୍ୟକ୍ଷ ଏବଂ ସନ୍ତୃପ୍ତ ମିଶ୍ର ସମ୍ପାଦକ ଅଛନ୍ତି। ଏସବୁ ଶୁଣିବା ପରେ ନବୀନ ତାଙ୍କ ବ୍ୟକ୍ତିଗତ ସହାୟକଙ୍କୁ କହିଥିଲେ, ସନ୍ତୃପ୍ତଙ୍କୁ ଏଠାକୁ ଡାକ। ସନ୍ତୃପ୍ତ ସେଠାରେ ପହଞ୍ଚିବା ପରେ ନବୀନ କୁଆଡ଼େ ପଚାରିଥିଲେ, ପ୍ରଭାତ କ’ଣ କହୁଛନ୍ତି, ତାଙ୍କ ସାଙ୍ଗରେ ଟେଲିଫୋନ ଯୋଗେ କାହିଁକି କଥା ହଉନ। ପ୍ରଭାତ ଯେଉଁ ଦିଲ୍ଲୀ ଆକାଉଣ୍ଟ କଥା କହୁଛନ୍ତି, ସେକଥାର ସତ୍ୟତା କ’ଣ ବୋଲି ନବୀନ ପଚାରିବାରକୁ ସନ୍ତୃପ୍ତ ସେହି କଥାକୁ ଖଣ୍ଡନକରି କୁଆଡ଼େ ଉତ୍ତର ଦେଲେ, ଏଭଳି କୌଣସି ଆକାଉଣ୍ଟ ନାହିଁ। ତେବେ ସାଧାରଣରେ ପ୍ରଶ୍ନ କରାଯାଇପାରେ, ଯଦି ନବୀନ ପଟ୍ଟନାୟକ ଏ ସମ୍ପର୍କରେ ଅବଗତ ନ ଥିଲେ ତେବେ ତାଙ୍କର ବିନା ଅନୁମତିରେ ଟ୍ରଷ୍ଟ ରେଜିଷ୍ଟ୍ରେଶନର ଠିକଣା ଭାବେ ନବୀନଙ୍କ ଦିଲ୍ଲୀ ଘର ଉଲ୍ଲେଖ କରାଗଲା କେମିତି। ଏସବୁ ଆଲୋଚନା ପରେ ସନ୍ତୃପ୍ତଙ୍କ ହାବଭାବ ଦେଖି ନବୀନ ନିବାସରୁ ବାହାରି ବିଧାୟକମାନେ ପ୍ରଭାତ ଉଠାଇଥିବା କଥା ସତ ବୋଲି କହିବା ଆରମ୍ଭ କରିଛନ୍ତି। ଏଥିସହ ସେମାନଙ୍କ ମଧ୍ୟରେ ଆଲୋଚନା ହେଉଛି, ଦଳରେ ଶୃଙ୍ଖଳିତ ବିଧାୟକ ଭାବେ ରହି ଦତ୍ତେଶ୍ୱର ହୋତାଙ୍କୁ ପ୍ରଥମ ପସନ୍ଦ ଭୋଟ ଅଧିକ କରିଦେବା।