ପାଟଣା,୧ା୩(ବୀରକିଶୋର ଦାଶ): କେନ୍ଦୁଝର ଜିଲା ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ରବିବାର ମଧ୍ୟାହ୍ନରେ ରୋଗୀଙ୍କ ମୃତ୍ୟୁ ନେଇ ଉତ୍ତେଜନା ପ୍ରକାଶ ପାଇଛି। ଆମ୍ବୁଲାନ୍ସ ବିଳମ୍ବରେ ପହଞ୍ଚିବା ନେଇ ନେଇ ପାଟଣା ସ୍ବାସ୍ଥ୍ୟକେନ୍ଦ୍ର ପରିସରରେ ଉତ୍ତେଜନା ପ୍ରକାଶ ପାଇଛି। ମୃତକଙ୍କ ସମ୍ପର୍କୀୟ ଓ ଡାକ୍ତରଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ଦେଖିବାକୁ ମିଳିଥିଲା। ମୃତକ ଜଣକ ହେଉଛନ୍ତି ଘଟଗାଁ ବ୍ଲକ ରାମଚନ୍ଦ୍ରପୁର ଗ୍ରାମର ଭୂୟାଁ ମୁଣ୍ଡା। ସେ ଜ୍ୱରରେ ପୀଡ଼ିତ ହୋଇ ଗୁରୁତର ହେବାରୁ ପାଟଣା ମେଡିକାଲ ଆଣିଥିଲେ ପରିବାର ଲୋକେ। କେନ୍ଦୁଝର ରେଫର ପରେ ଆମ୍ବୁଲାନ୍ସ ବିଳମ୍ବରେ ଆସିବାରୁ ରୋଗୀଙ୍କ ମୃତ୍ୟୁ ହୋଇଥିଲା। ବିଳମ୍ବିତ ରାତିରେ ରେଫର ହେବା ପରେ ଆମ୍ବୁଲାନ୍ସ ପହଞ୍ଚି ନ ଥିଲା। ଡାକ୍ତରଖାନା କର୍ତ୍ତୃପକ୍ଷଙ୍କ ଅବହେଳା ଯୋଗୁ ରୋଗୀଙ୍କ ମୃତ୍ୟୁ ହୋଇଥିବା ଅଭିଯୋଗ ଆଣିଛନ୍ତି ପରିବାର ଲୋକେ।
ଅନ୍ୟପକ୍ଷରେ ଚିକିତ୍ସା କରିଥିବା ଡାକ୍ତର ନିରଞ୍ଜନ ସାହୁ କହିଛନ୍ତି ଆମେ ଚିକିତ୍ସାରେ କୌଣସି ଅବହେଳା କରିନାହୁଁ। ଗତକାଲି ଆମ୍ବୁଲାନ୍ସ ବିଳମ୍ବରେ ମିଳିଥିଲା। ମୁଁ କାହାରିକୁ ଦୁର୍ବ୍ୟବହାର କରିନାହିଁ। ରାତି ୧୨ଟାରେ ୨ଜଣ ନିଶାସକ୍ତ ଯୁବକ ଆସି ଓଲଟି ପ୍ରଥମେ ସିକ୍ୟୁରିଟି ପରେ ଆମକୁ ଦୁର୍ବ୍ୟବହାର କରିଥିଲେ। ମୁଁ ନିଜକୁ ସୁରକ୍ଷା ଦେବାକୁ ଯାଇ କେବଳ ମୋ ପକ୍ଷ ରଖୁଥିଲି। ଏନେଇ ମୁଁ ପାଟଣା ଥାନାରେ ଅଭିଯୋଗ କରିଛି। ଦିନ ୧୨.୩୦ ପର୍ଯ୍ୟନ୍ତ ମୃତଦେହ ବ୍ୟବଚ୍ଛେଦ ହୋଇନାହିଁ। ଘଟଣାସ୍ଥଳରେ ପାଟଣା ପୋଲିସ ପହଞ୍ଚି ସ୍ଥିତି ନିୟନ୍ତ୍ରଣ କରିଥିବା ପର୍ଯ୍ୟନ୍ତ ଘଟଗାଁ ପୋଲିସ ପହଞ୍ଚି ନାହିଁ।
