ପୁରୁଷୋତ୍ତମପୁର,୮।୩(ସିମାଞ୍ଚଳ ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁରରେ ନୂତନ ଏସ୍ଡିପିଓ ଭାବେ ଡା ଦୀପକ କୁମାର ମିଶ୍ର ଶୁକ୍ରବାର କାର୍ଯ୍ୟରେ ଯୋଗଦେଇଛନ୍ତି। ପୂର୍ବରୁ ସେ ଭୂବନେଶ୍ବର ସ୍ପେସାଲ ବ୍ରାଞ୍ଚରେ ଡିଏସ୍ପି ଭାବେ କାର୍ଯ୍ୟ କରୁଥିଲେ। କାର୍ଯ୍ୟରେ ଯୋଗଦେବା ଅବସରରେ ସେ କହିଛନ୍ତି ଯେ, ଅଞ୍ଚଳରେ ଆପରାଧିକ କାର୍ଯ୍ୟକଳାପ ଓ ନିଶା କାରବାରକୁ କଦାପି ବରଖାସ୍ତ କରାଯିବନାହିଁ । ପୋଲିସ ଲୋକଙ୍କ ବନ୍ଧୁ ଏଣୁ ଲୋକଙ୍କୁ ସମ୍ମାନ ଦେବା ଓ ଉପଯୁକ୍ତ ନ୍ୟାୟପ୍ରଦାନ କରିବା ପ୍ରଥମ କର୍ତ୍ତବ୍ୟ । ସବଡିଭିଜନରେ ରହିଥିବା କୋଦଳା, ପୋଲସରା, କବିସୂର୍ଯ୍ୟନଗର, ବେଗୁନିଆପଡା ଓ ପୁରୁଷୋତ୍ତମପୁର ପାଞ୍ଚଗୋଟି ଥାନା ଅଞ୍ଚଳରେ ଶାନ୍ତି ବଜାୟ ରଖିଥିବା ସହ ରହିଥିବା ଅପରାଧି, ନିଶା କାରବାର, ମାଫିଆମାନଙ୍କୁ ସମ୍ପୂର୍ଣ୍ଣ ରୂପେ ଦମନ କରିବା ସହ ସମସ୍ତ ଗ୍ରାମକୁ ଅପରାଧ ମୁକ୍ତକରି ଭାଇଚାରା ସୃଷ୍ଟି କରିବା ପ୍ରଥମ ଲକ୍ଷ୍ୟ ରହିଛି।
ଏଥିସହ ବରିଷ୍ଠ ନାଗରିକ, ଶିଶୁ ଓ ମହିଳାଙ୍କ ସମେତ ସମସ୍ତ ଜନସାଧାରଣଙ୍କୁ ସୁରକ୍ଷା ଦେବା ଦିଗରେ ପଦକ୍ଷେପ ନେବାର କହି ଅଞ୍ଚଳବାସୀଙ୍କ ସହଯୋଗ ଲୋଡିଛନ୍ତି। ଏପରିକି ସେ ପୂର୍ବରୁ ୨୬.୧୦.୨୦୦୮ରୁ ୧୦.୬.୨୦୦୯ ପର୍ଯ୍ୟନ୍ତ ପୁରୁଷୋତ୍ତମପୁର ଥାନା ଅଧିକାରୀ ଭାବେ ରହିଥିବା ସମୟରେ ଲୋକଙ୍କ ନିକଟତରହୋଇ ଉପଯୁକ୍ତ ନ୍ୟାୟ ଓ ସୁରକ୍ଷାଦେବା ସହ ଅପରାଧୀ ଓ ନିଶା ବେପାରୀଙ୍କୁ ଦମନ କରିଥିବା ବେଳେ ଭୂତସରସିଙ୍ଗି-କୋଦଳା-ବୁଢାମ୍ବ ରାସ୍ତାରେ ଅପରାଧୀଙ୍କ ଦୌରାତ୍ମରୁ ଦିନ ଦ୍ୱିପହରରେ ଲୋକେ ଯାତାୟତ କରିପାରୁ ନ ଥିଲେ ଏହାକୁ ନେଇ ସେତେବେଳେ ସେହି ଅପରାଧି ଗ୍ୟାଙ୍ଗକୁ ଦମନକରି ରାସ୍ତାରେ ପୋଲିସର ସୁରକ୍ଷାଦେଇ ସମ୍ପୂର୍ଣ୍ଣ ରାସ୍ତାକୁ ଅପରାଧ ମୂକ୍ତକରି ଏଠାରେ ଚର୍ଚ୍ଚାକୁ ଆସିଥିଲେ। ଯାହା ଆଜି ପର୍ଯ୍ୟନ୍ତ ସେହି କାର୍ଯ୍ୟକୁ ଲୋକେ ଭୂଲି ପାରିନାହାନ୍ତି।
ଦୀର୍ଘ ୧୬ ବର୍ଷପରେ ସେ ପୁଣି ଫେରିଆସିଥିବାରୁ ପୂର୍ବରୁ କରିଯାଇଥିବା ସେହି କାର୍ଯ୍ୟମାନକୁ ନେଇ ଜନସାଧାରଣଙ୍କ ମଧ୍ୟରେ ଖୁସିର ଲହରି ଦେଖାଦେବା ସହ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି। ଏହାସହ ପୁଣି ମହାବଳ ଫେରିଲା ବୋଲି ଲୋକେ କହିବାରେ ଲାଗିଛନ୍ତି। ଏଠାରେ ଥିବା ଏସଡିପିଓ ରଜନିକାନ୍ତ ସାମଲଙ୍କ ଭୂବନେଶ୍ବର କମିଶନରେଟ ପୋଲିସର କଟକ କ୍ରାଇମଏସିପି ଭାବେ ବଦଳି ହୋଇଛି।
