ନୂଆଦିଲ୍ଲୀ, ୯।୯ : ଭିଡିଓକନ-ଆଇସିଆଇସିଆଇ ବ୍ୟାଙ୍କ ଋଣ ଠକେଇ ମାମଲାରେ ଅନ୍ୟତମ ମୁଖ୍ୟ ଅଭିଯୁକ୍ତ ଦୀପକ କୋଚ୍ଚରଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ୧୧ ଦିନିଆ ରିମାଣ୍ଡରେ ନେଇଛି। ମୁମ୍ବାଇର ବେଆଇନ ଅର୍ଥ କାରବାର ନିରୋଧୀ ଆଇନ (ପିଏମ୍ଏଲ୍ଏ) ସ୍ବତନ୍ତ୍ର କୋର୍ଟ ସେପ୍ଟେମ୍ବର ୧୯ ଯାଏ ତାଙ୍କୁ ରିମାଣ୍ଡରେ ନେବା ଲାଗି ଅନୁମତି ଦେଇଛନ୍ତି। ସୋମବାର ସନ୍ଧ୍ୟାରେ ତାଙ୍କୁ ଇଡି ଗିରଫ କରିବା ପରେ ମଙ୍ଗଳବାର କୋର୍ଟରେ ହାଜର କରାଯାଇଥିଲା। ଦୀପକଙ୍କ ସ୍ତ୍ରୀ ଚନ୍ଦା କୋଚ୍ଚର ଆଇସିଆଇସିଆଇ ବ୍ୟାଙ୍କରେ ସିଇଓ ଥିବା ସମୟରେ ୨୦୦୯ରେ ଭିଡିଓକନ୍ ଇଣ୍ଟରନ୍ୟାଶନାଲ ଇଲେକ୍ଟ୍ରୋନିକ୍ସ ଲିମିଟେଡ(ଭିଆଇଇଏଲ୍)କୁ ୩୦୦ କୋଟି ଟଙ୍କାର ଋଣ ମଞ୍ଜୁର କରାଯାଇଥିଲା। ବ୍ୟାଙ୍କର ଋଣ ମଞ୍ଜୁରୀ କମିଟିର ଅଧ୍ୟକ୍ଷ ଭାବେ ଚନ୍ଦା କାର୍ଯ୍ୟ କରୁଥିଲେ। ଭିଆଇଇଏଲ୍ ଭିଡିଓକନ ଗ୍ରୁପ୍ର ଏକ ସହଯୋଗୀ କମ୍ପାନୀ ବୋଲି ଇଡି କହିଛି। ଋଣ ମଞ୍ଜୁର ହେବାର କିଛିଦିନ ପରେ ଭିଆଇଇଏଲ୍ ନ୍ୟୁ ପାଓ୍ବାର ରିନ୍ୟୁଏବଲ୍ସକୁ ୬୪ କୋଟି ଟଙ୍କା ପଠାଇଥିଲା। ଏହି କମ୍ପାନୀଟି ଚନ୍ଦାଙ୍କ ସ୍ବାମୀ ଦୀପକଙ୍କ ଦ୍ୱାରା ପରିଚାଳିତ ଏବଂ ନିୟନ୍ତ୍ରିତ ହେଉଥିଲା ବୋଲି ଇଡି ଏହାର ରିମାଣ୍ଡ ଆବେଦନରେ ଦର୍ଶାଇଛି। ମାମଲାରେ ଅନେକ ହେରଫେର ହୋଇଥିଲେ ମଧ୍ୟ ଦୀପକ ତଦନ୍ତରେ ସହଯୋଗ କରୁ ନ ଥିବା ଇଡି କୋର୍ଟଙ୍କୁ କହିଛି। ଏହାକୁ ନଜରରେ ରଖି ରିମାଣ୍ଡ ଲାଗି ଅଧିକ ସମୟ ଲୋଡିଥିବା ଜଣାପଡିଛି। ଏହା ଏକ ଆପରାଧିକ ମାମଲା ହୋଇଥିବାରୁ ଏହାର ଠିକ୍ ତଦନ୍ତ ହେବା ନେଇ କୋର୍ଟ ଉପଲବ୍ଧ କରି ଏ ଭଳି ନିର୍ଦ୍ଦେଶ ଦେଇଛନ୍ତି। ଇଡି ଅଭିଯୋଗକୁ କୋଚ୍ଚରଙ୍କ ଓକିଲ ଖଣ୍ଡନ କରିଛନ୍ତି। ସେ କହିଛନ୍ତି ଯେ, ଏହା ଏକ ବେଆଇନ ଅର୍ଥ କାରବାର ମାମଲା ନୁହେଁ। ଦୀପକ ୧୨ ଥର ଇଡିରେ ହାଜର ହେବା ସହ ବିଭିନ୍ନ ଦସ୍ତାବିଜ ପଇଠ କରିଛନ୍ତି। ଅଭିଯୁକ୍ତ ପରିବାର ସଦସ୍ୟଙ୍କ ସହ ଦେଖା ହୋଇପାରିବେ ନାହିଁ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି। ମାତ୍ର ଓକିଲଙ୍କ ସହ ଦେଖା ହୋଇପାରିବେ ବୋଲି କୋର୍ଟ ସ୍ପଷ୍ଟ କରିଛନ୍ତି। ଚଳିତ ସପ୍ତାହରେ ପରିବାର ସଦସ୍ୟଙ୍କୁ ଜେରା ହୋଇପାରେ ବୋଲି ପ୍ରକ୍ରିୟା ସହ ଜଡିତ ଜଣେ ବରିଷ୍ଟ ଅଧିକାରୀ ସୂଚନା ଦେଇଛନ୍ତି। ଏହି ମାମଲାରେ ଉଭୟ ଇଡି ଏବଂ ସିବିଆଇ ତଦନ୍ତ କରୁଛନ୍ତି। ଭିଡିଓକନ ଗ୍ରୁପ୍କୁ ୬ଟି କିସ୍ତିରେ ପ୍ରଦାନ କରାଯାଇଥିବା ୧୮୭୫ କୋଟି ଟଙ୍କାର ଋଣ ତଦନ୍ତ ପରିସରଭୁକ୍ତ ହୋଇଛି। ୨୦୦୯ ଜୁନ୍ରୁ ଅକ୍ଟୋବର ୨୦୧୧ ମଧ୍ୟରେ ଭିଡିଓକନ ଗ୍ରୁପ୍ କମ୍ପାନୀକୁ ଏହି ଋଣ ପ୍ରଦାନ କରାଯାଇଥିଲା। ଚନ୍ଦା କୋଚ୍ଚରଙ୍କ ଅଧ୍ୟକ୍ଷତାରେ କନର୍ସୋଟିୟମ ବ୍ୟାଙ୍କ ପ୍ରାୟ ୩୨୫୦ କୋଟି ଟଙ୍କାର ଋଣ ମଞ୍ଜୁର କରିଥିବା ଜଣାପଡିଛି।
