ମାଲକାନଗିରି,୨୪।୬(ଦୁର୍ଯ୍ୟୋଧନ ପାତ୍ର): ମାଲକାନଗିରି ଜିଲା ତତ୍କାଳୀନ ଜିଲାପାଳ ମନିଷ ଅଗ୍ରଓ୍ବାଲଙ୍କ ବ୍ୟକ୍ତିଗତ ସହାୟକ ଦେବନାରାୟଣ ପଣ୍ଡାଙ୍କ ମୃତ୍ୟୁ ଘଟଣାକୁ ନେଇ ତାଙ୍କ ସ୍ତ୍ରୀ ବନଜା ପଣ୍ଡା ଓ ପରିବାର ବର୍ଗ ଜିଲାପାଳଙ୍କ ନାମରେ ହାଇକୋର୍ଟରେ ଏକ ମାମଲା ଦାଏର କରିଥିଲେ। ଶୁକ୍ରବାର ହାଇକୋର୍ଟ ଏହି ମାମଲାରେ ଲଗାଯାଇଥିବା ସମସ୍ତ ଦଫା ମିଥ୍ୟା ବୋଲି ପ୍ରକାଶ କରି ତତ୍କାଳୀନ ଜିଲାପାଳଙ୍କ ସହ ମାଲକାନଗିରି ଜିଲାର ଅନ୍ୟ କର୍ମଚାରୀଙ୍କ ବିରୋଧରେ ଲାଗିଥିବା ସବୁ ମାମଲାରୁ ସେମାନଙ୍କୁ ମୁକ୍ତ କରିଛନ୍ତି।
ଗତ ୨୦୧୯ ଡିସେମ୍ବର ୨୬ ତାରିଖରେ ତତ୍କାଳୀନ ଜିଲାପାଳ ଅଗ୍ରଓ୍ବାଲଙ୍କ ବ୍ୟକ୍ତିଗତ ସହାୟକ ପଣ୍ଡାଙ୍କ ମୃତଦେହ ମାଲକାନଗିରି ସଦର ମହକୁମାସ୍ଥିତ ସତୀଗୁଡା ଜଳଭଣ୍ଡାରରୁ ମିଳିଥିଲା । ସେ ଏହି ଜଳଭଣ୍ଡାରରେ ବୁଡି ମୃତ୍ୟୁବରଣ କରିଥିଲେ। ତେବେ ଏହାକୁ ନେଇ ତାଙ୍କ ସ୍ତ୍ରୀ ବନଜା ଏହା ଆତ୍ମହତ୍ୟା ନୁହେଁ, ହତ୍ୟା ଏବଂ ଏଥିରେ ତତ୍କାଳୀନ ଜିଲାପାଳ ଅଗ୍ରଓ୍ବାଲଙ୍କ ସମ୍ପୃକ୍ତି ଅଛି ବୋଲି ଦାବି କରି ଜିଲପାଳଙ୍କ ସହ ଅନ୍ୟ କେତେକ କର୍ମଚାରୀଙ୍କ ନାମରେ ହାଇକୋର୍ଟରେ ମାମଲା ଦାଏର କରିଥିଲେ। ଏହି ମାମଲା ଦୀର୍ଘ ୪ ବର୍ଷ ହେଲା ବିଚାରାଧୀନ ଥିଲା। ଏବେ ତତ୍କାଳୀନ ଜିଲାପାଳ ଅଗ୍ରଓ୍ବାଲ ଓ ତାଙ୍କ କର୍ମଚାରୀଙ୍କ ଉପରେ ଲାଗିଥିବା ସମସ୍ତ ଦଫା ମିଥ୍ୟା ବୋଲି ହାଇକୋର୍ଟ ଘୋଷଣା କରିବା ସହ ଜିଲାପାଳ ଓ କର୍ମଚାରୀଙ୍କ ଉପରେ ଲାଗିଥିବା ଦଫାଗୁଡିକ ରଦ୍ଦ କରିଦେଇଛନ୍ତି। ଏହି ଖବର ପାଇବା ପରେ କର୍ମଚାରୀମାନେ ଖୁସି ପ୍ରକଟ କରିବା ସହ ସତ୍ୟର ଜୟ ବୋଲି କହିଛନ୍ତି।
