ବଲାଙ୍ଗୀର,୧ା୮(ସୁନୀଲ ମହାନ୍ତି): ମୃତ୍ୟୁ କେତେବେଳେ କାହାକୁ କେଉଁ ରୂପରେ ଆସିବ ତାହା କେହି କହିପାରିବେନି। ଦାନ୍ତ ଘଷୁଘଷୁ ଆକାଶରୁ ପଡ଼ିଲା ମୃତ୍ୟୁର ଫାଶ ଆଉ ତା’ପରେ ଚାଲିଗଲା ଜଣେ ବୃଦ୍ଧଙ୍କ ଜୀବନ।
ଏପରି ଏକ ଅଭାବନୀୟ ଘଟଣା ଘଟିଛି, ବଲାଙ୍ଗୀର ଜିଲା ତୁଷୁରା ଥାନା ଖକସିକନା ଗାଁରେ। ଏହି ଗାଁର ୬୦ ବର୍ଷୀୟ ବୃଦ୍ଧ ବ୍ରଜବନ୍ଧୁ ପଧାନ। ସବୁଦିନ ଭଳି ଶୁକ୍ରବାର ସକାଳୁ ନିଜ ଘର ପାଖରେ ଥିବା ନଳକୂପକୁ ଦାନ୍ତ ଘଷିବାକୁ ଯାଇଥିଲେ। ଦାନ୍ତ ଘଷୁ ଥିବା ସମୟରେ ହଠାତ୍ ନଳକୂପ ଉପରେ ଯାଇଥିବା ବିଦ୍ୟୁତ୍ ତାର ଛିଣ୍ଡି ବ୍ରଜବନ୍ଧୁଙ୍କ ଉପରେ ପଡ଼ିଥିଲା। ଫଳରେ ଘଟଣାସ୍ଥଳରେ ଚାଲିଯାଇଥିଲା ବ୍ରଜବନ୍ଧୁଙ୍କ ଜୀବନ। ବିଦ୍ୟୁତ୍ ବିଭାଗର ଅବହେଳା ଯୋଗୁ ତାର ଛିଣ୍ଡିଥିବା ଗାଁ ଲୋକେ ଅଭିଯୋଗ କରିଛନ୍ତି। ଏ ନେଇ ଗାଁରେ ଉତ୍ତେଜନା ପ୍ରକାଶ ପାଇଥିବା ଦେଖାଦେଇଛି।
