ତରବୋଡ଼/ନୂଆପଡ଼ା ଅଫିସ, ୨୭।୧: କୋଭିଡ୍ ଟିକା କୋଭାକ୍ସିନ ନେବାର ୨ ଦିନ ପରେ ଜଣେ ହସ୍ପିଟାଲ ସୁରକ୍ଷା କର୍ମଚାରୀଙ୍କ ମଙ୍ଗଳବାର ମୃତ୍ୟୁ ଘଟିଛି। ଏଭଳି ଘଟଣା ଓଡ଼ିଶାରେ ପ୍ରଥମ କରି ଘଟିଛି। ମୃତକ ହେଲେ ନୂଆପଡ଼ା ଜିଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟରତ ସୁରକ୍ଷା କର୍ମଚାରୀ ନାନକରାମ କେଉଁଟ (୨୬)। ଟିକା ଯୋଗୁ ହିଁ ନାନକରାମଙ୍କ ମୃତ୍ୟୁ ଘଟିଥିବା ପରିବାର ଲୋକ ଅଭିଯୋଗ କରିଛନ୍ତି। ତେଣୁ ଉପଯୁକ୍ତ କ୍ଷତିପୂରଣ ଦାବିରେ ନାନକରାମଙ୍କ ପରିବାରବର୍ଗଙ୍କ ସହ ଡାକ୍ତରଖାନାରେ କାର୍ଯ୍ୟରତ ସୁରକ୍ଷା କର୍ମୀମାନେ ଜିଲା ମୁଖ୍ୟ ଚିକିତ୍ସାଳୟ ଆଗରେ ଧାରଣା ଦେଇଥିଲେ। ଆଉ ଜଣେ ସୁରକ୍ଷା କର୍ମଚାରୀ ରାଜଶ୍ରୀ ତାଣ୍ଡି ଅସୁସ୍ଥ ହୋଇ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି। ନୂଆପଡ଼ା ମୁଖ୍ୟ ଚିକିତ୍ସା ଅଧିକାରୀ କାଳିପ୍ରସାଦ ବେହେରା କହିଛନ୍ତି ଯେ, ପରିବାର ଲୋକେ କରୋନା ଟିକା ଦେବା ପରେ ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି। କିନ୍ତୁ କେଉଁ କାରଣରୁ ମୃତ୍ୟୁ ଘଟିଛି, ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ଜଣାପଡ଼ିବ। ଅନ୍ୟପକ୍ଷେ ଜିଲା କୋଭିଡ୍ ଟିକାକରଣ କାର୍ଯ୍ୟକମର ମୁଖପାତ୍ର ବିନୋଦ ବିହାରୀ ରଥ କହିଛନ୍ତି ଯେ, ଟିକା ପାଇଁ ମୃତ୍ୟୁ ହୋଇନାହିଁ। ମୃତ ଯୁବକଙ୍କ ରକ୍ତହୀନତା ହେତୁ ରକ୍ତବାନ୍ତି ହୋଇଥିଲା। ତାଙ୍କୁ ଜିଲା ସ୍ବସ୍ଥ୍ୟକେନ୍ଦ୍ରରେ ପ୍ରାଥମିକ ଚିକିତ୍ସା କରାଯାଇ ରକ୍ତ ମଧ୍ୟ ଦିଆଯାଇଥିଲା ବୋଲି ରଥ କହିଛନ୍ତି।
ସଦର ଥାନା ଟାନୱାଟ ପଞ୍ଚାୟତ ଦିଆନମୁଣ୍ଡା ଗାଁର ନାନକରାମ ଗତ ୨ ମାସ ହେଲା ନୂଆପଡା ମୁଖ୍ୟ ଚିକିତ୍ସାଳୟରେ କାର୍ଯ୍ୟ କରୁଥିଲେ। ଗତ ୨୩ ତାରିଖରେ ନୂଆପଡ଼ା ସ୍ବାସ୍ଥ୍ୟକେନ୍ଦ୍ରରେ ନାନକରାମ କୋଭାକ୍ସିନ ଟିକା ନେଇଥିଲେ। ପୂର୍ବରୁ ତାଙ୍କର କିଛି ରୋଗ ଜଣା ପଡୁ ନ ଥିଲା। ଟିକା ନେବାଦିନଠାରୁ ସ୍ବାସ୍ଥ୍ୟାବସ୍ଥା ଧୀରେ ଧୀରେ ବିଗିଡ଼ିବାରେ ଲାଗିଲା ବୋଲି ପରିବାର ଲୋକେ ଅଭିଯୋଗ କରିଛନ୍ତି। ସେ ଅସୁସ୍ଥ ଅନୁଭବ କରିଥିଲେ ମଧ୍ୟ ଡ୍ୟୁଟି କରୁଥିଲେ। ସୋମବାର ଡ୍ୟୁଟି ସମୟରେ ସେ ହଠାତ୍ ଅସୁସ୍ଥ ହୋଇପଡ଼ିଥିଲେ। ତାଙ୍କୁ କେତେଜଣ କର୍ମଚାରୀ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ରକ୍ତବାନ୍ତି ହେବାରୁ ଡାକ୍ତର ତାଙ୍କୁ ଶୀଘ୍ର ବୁର୍ଲା ବଡ଼ ଡାକ୍ତରଖାନା ନେବାକୁ କହିଥିଲେ। ପରିବାର ଲୋକେ ତାଙ୍କୁ ବୁର୍ଲା ନେଇଥିଲେ। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିବା ଡାକ୍ତର ଘୋଷଣା କରିଥିଲେ। ମୃତଦେହ ନୂଆପଡ଼ା ପହଞ୍ଚତ୍ବା ପରେ କ୍ଷତିପୂରଣ ନ ମିଳିବା ଯାଏ ବ୍ୟବଚ୍ଛେଦ କରାଇ ଦେବୁ ନାହିଁ ବୋଲି ନାନକରାମଙ୍କ ପରିବାରବର୍ଗ, ସୁରକ୍ଷା କର୍ମଚାରୀ ସଂଘ ଓ କେତେଜଣ ସାମାଜିକ କର୍ମୀ ଧାରଣା ଦେଇଥିଲେ। ନୂଆପଡ଼ା ବିଧାୟକ ରାଜେନ୍ଦ୍ର ଢୋଲକିଆ ପହଞ୍ଚତ୍ ରେଡକ୍ରସ ପାଣ୍ଠିରୁ ୨୫ ହଜାର ଓ ସିକ୍ୟୁରିଟି ସଂସ୍ଥାରୁ ୨୫ ହଜାର ଟଙ୍କା ପରିବାର ଲୋକଙ୍କୁ ଦେଇଥିଲେ। ଶବ ବ୍ୟବଚ୍ଛେଦ ପରେ ମୁଖ୍ୟମନ୍ତ୍ରୀ ରିଲିଫ ଫଣ୍ଡରୁ ସହାୟତା ଦେବାକୁ ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା।
ଅନ୍ୟପକ୍ଷରେ ନାନକରାମଙ୍କ ରକ୍ତହୀନତା ଯୋଗୁ ମୃତ ହୋଇଛି ବୋଲି ଡାକ୍ତର କହୁଥିବା ବେଳେ ତାହାକୁ ନେଇ ପ୍ରଶ୍ନ ଉଠିଛି। ଯଦି ସେ ରୋଗରେ ପୀଡ଼ିତ ଥିଲେ, ତେବେ କାହିଁକି ବିନା ଚେକଅପ୍ରେ ଟିକା ଦିଆଗଲା ବୋଲି ଆନ୍ଦୋଳନକାରୀମାନେ ପ୍ରଶ୍ନ କରିଛନ୍ତି। ସୂଚନାଯୋଗ୍ୟ ଯେ, ନାନକରାମଙ୍କ ବିବାହ ଆସନ୍ତା ଫେବୃୟାରୀ ୧୯ରେ ହେବାକୁ ସ୍ଥିର ହୋଇଥିଲା ବୋଲି ତାଙ୍କ ବଡ଼ଭାଇ ରୋହିତ କେଉଁଟ କହିଛନ୍ତି।
