କାନପୁର,୨୭।୧୧: କାନପୁର ଗ୍ରୀନ୍ ପାର୍କ ଷ୍ଟାଡିୟମରେ ଖେଳାଯାଉଥିବା ପ୍ରଥମ ଟେଷ୍ଟର ତୃତୀୟ ଦିନରେ ନ୍ୟୁଜିଲାଣ୍ଡ ପ୍ରଥମ ଇନିଂସରେ ୨୯୬ ରନ୍ କରି ଅଲ୍ଆଉଟ ହୋଇଯାଇଛି। ଫଳରେ ଭାରତ ପ୍ରଥମ ଇନିଂସରେ ୪୯ରନ୍ରେ ଆଗୁଆ ରହିଛି।
ଭ୍ରମଣକାରୀ ନ୍ୟୁଜିଲାଣ୍ଡ ଲଡୁଆ ବ୍ୟାଟିଂ କରି ଦ୍ୱିତୀୟ ଦିନରେ ଖେଳ ସୁଦ୍ଧା ବିନା ଉଇକେଟରେ ୧୨୯ ରନ୍ କରିଥିଲା। ଶନିବାର ପୁଣି ପଡିଆକୁ ଓହ୍ଲାଇଥିଲା ନ୍ୟୁଜିଲାଣ୍ଡ। ତେବେ ଅଶ୍ବିନ ପ୍ରଥମେ ଓ୍ବିଲ ୟଙ୍ଗଙ୍କ ଉଇକେଟ ନେଇ ଭାରତକୁ ପ୍ରଥମ ସଫଳତା ଦେଇଥିଲେ। ୟଙ୍ଗ ୮୯ ରନ୍ରେ ଆଉଟ ହୋଇଥିଲେ । ଅନ୍ୟତମ ଓପନର ଲଥମ ୯୫ ରନ୍ କରି ଶତକରୁ ବଞ୍ଚିତ ହୋଇଥିଲେ। ସେହିପରି ଅଧିନାୟକ କେନ୍ ଓ୍ବିଲିୟମସନ ମଧ୍ୟ ବିଶେଷ କିଛି କରିପାରି ନ ଥିଲେ। ୧୮ ରନ୍ କରି ସେ ଆଉଟ ହେବା ପରେ ଦଳର ବ୍ୟାଟିଂକ୍ରମ ଭୁଷୁଡ଼ିବାକୁ ଲାଗିଥିଲା। ଦଳର କୌଣସି ବ୍ୟାଟ୍ସମ୍ୟାନ ଭଲ ସ୍କୋର କରିପାରି ନ ଥିଲେ । ଫଳରେ ନ୍ୟୁଜିଲାଣ୍ଡ ପ୍ରଥମ ଇନିଂସରେ ୨୯୬ ରନ୍ କରି ଅଟକି ଯାଇଥିଲା।
ଭାରତର ଅକ୍ଷର ପଟେଲଙ୍କ ଦମଦାର ବୋଲିଂ ଦେଖିବାକୁ ମିଳିଛି । ଅକ୍ଷରଙ୍କୁ ପ୍ରଥମ ଇନିଂସରେ ୫ ଉଇକେଟ ମିଳିଥିବା ବେଳେ ଅଶ୍ୱିନୀଙ୍କୁ ୩ ଉଇକେଟ ମିଳିଛି। ଭାରତ ଦ୍ୱିତୀୟ ଇଂନିସ ଆରମ୍ଭ କରି ତୃତୀୟ ଦିନ ଖେଳ ସୁଦ୍ଧା ୧୪ରନ୍ରେ ୧ ଉଇକେଟ ହରାଇଛି। ଅନ୍ୟପକ୍ଷେ ନ୍ୟୁଜିଲାଣ୍ଡଠାରୁ ଭାରତ ୬୩ ରନ୍ରେ ଆଗୁଆ ରହିଛି।
