ନୂଆଦିଲ୍ଲୀ,୧୯।୧୧ : ଭାରତ ସରକାର ଏକ ନୂତନ ଡାଟା ସୁରକ୍ଷା ବିଲକୁ ନେଇ ପ୍ରସ୍ତାବ ଆଗତ କରିଛନ୍ତି। ଏହି ଆଇନରେ ତଥ୍ୟ ଉଲ୍ଲଂଘନ ମାମଲାରେ ସରକାରଙ୍କୁ ମଧ୍ୟ ଛାଡ ଦିଆଯାଇ ନାହିଁ। ଏହି ସୂତ୍ର ଅନୁଯାୟୀ ତଥ୍ୟ ଉଲ୍ଲଂଘନ ପାଇଁ ସରକାର ମଧ୍ୟ ଦାୟୀ ରହିବେ ବୋଲି ସରକାରୀ ସୂତ୍ରରୁ ପ୍ରକାଶ।
ଏହା ସହିତ ସରକାରଙ୍କୁ ମଧ୍ୟ ଜରିମାନା ଦଣ୍ଡାଦେଶରେ ଦଣ୍ଡିତ କରାଯାଇ ପାରିବ। ନୂତନ ଡିଜିଟାଲ ଡାଟା ସୁରକ୍ଷା ବିଲ ଅଧୀନରେ, ଲୋକଙ୍କ ବ୍ୟକ୍ତିଗତ ତଥ୍ୟ ସଂଗ୍ରହ କରିବା ପୂର୍ବରୁ ସମ୍ମତି ନେବା ବାଧ୍ୟତାମୂଳକ ହେବ। ନୂତନ ପ୍ରସ୍ତାବରେ ନିୟମ ଭାଙ୍ଗିବା ପାଇଁ ୫୦୦ କୋଟିର ଜରିମାନା ଲାଗୁ କରାଯାଇପାରିବ।
ଏକ ସରକାରୀ ସୂତ୍ରରୁ ଶନିବାର ଜଣାପଡ଼ିଛିି ଯେ ଡାଟା ଭଙ୍ଗ ମାମଲାରେ ଡିଜିଟାଲ ପର୍ସନାଲ ଡାଟା ପ୍ରୋଟେକଶନ ବିଲ ମଧ୍ୟ ସରକାରଙ୍କୁ ଉତ୍ତରଦାୟୀ କରିବ। ସୂତ୍ରରୁ ପ୍ରକାଶ ଯେ ଏହି ବିଲ କେବଳ ଡିଜିଟାଲ ତଥ୍ୟର ଦିଗକୁ ଅନ୍ତର୍ଭୁକ୍ତ କରିବ କାରଣ ଇଲେକ୍ଟ୍ରୋନିକ୍ସ ମନ୍ତ୍ରଣାଳୟ ଏବଂ ଆଇଟି ଡିଜିଟାଲ ଏବଂ ସାଇବର ସ୍ପେସ ସହିତ କାର୍ଯ୍ୟ କରିବା ପାଇଁ ଦାୟିତ୍ୱ ପାଇଛି। ଏହି ବିଲ ମୁଖ୍ୟତଃ ସଂସ୍ଥାଗୁଡ଼ିକୁ ଡାଟା ମନିଟାଇଜ କରୁଥିବା ପାଇଁ ଉତ୍ତରଦାୟୀ କରିବା ଏବଂ ଡାଟା ଉଲ୍ଲଂଘନ ହେଲେ ସରକାର ମଧ୍ୟ ଏଥିରୁ ରକ୍ଷା ପାଇପାରିବେ ନାହିଁ।
ସଂସଦର ନିମ୍ନ ଗୃହରୁ ଡିଜିଟାଲ ବ୍ୟକ୍ତିଗତ ତଥ୍ୟ ସୁରକ୍ଷା ବିଲ ପ୍ରତ୍ୟାହାରର ତିନି ମାସ ପରେ ଭାରତ ସରକାର ଶୁକ୍ରବାର ଏକ ନୂତନ ଡାଟା ଗୋପନୀୟତା ଆଇନ ପ୍ରସ୍ତାବ ଦେଇଛନ୍ତି, ଯାହା ଟେକ୍ ତଥା ସୋସିଆଲ ମିଡିଆ କମ୍ପାନୀଗୁଡିକ ଦେଶ ବାହାରକୁ ୟୁଜରଙ୍କ ତଥ୍ୟ ପଠାଇବାକୁ ଅନୁମତି ଦେବ। ପ୍ରସ୍ତାବିତ ନିୟମ ଅନୁଯାୟୀ, ଲୋକଙ୍କ ବ୍ୟକ୍ତିଗତ ତଥ୍ୟ ସଂଗ୍ରହ କରିବା ପୂର୍ବରୁ ସମ୍ମତି ନେବା ବାଧ୍ୟତାମୂଳକ ହେବ। ଭାରତରେ ତଥ୍ୟର ଅପବ୍ୟବହାର କଲେ ଜରିମାନା ଳାଗୁ ହେବ।
କେନ୍ଦ୍ର ସରକାରଙ୍କ ଦ୍ୱାରା ଉପସ୍ଥାପିତ ହୋଇଥିବା ନୂତନ ଡାଟା ସୁରକ୍ଷା ବିଲ, ୨୦୨୨ ର ପ୍ରସ୍ତାବରେ, ଯେଉଁମାନେ ଡକ୍ୟୁମେଣ୍ଟ, ସେବା, ପରିଚୟ ପ୍ରମାଣ କିମ୍ବା ଠିକଣା ଇତ୍ୟାଦି ଆବେଦନ କରିବା ସମୟରେ ଭୁଲ ତଥ୍ୟ ଦେଉଛନ୍ତି ସେମାନଙ୍କ ଉପରେ ୧୦ ହଜାର ଟଙ୍କା ଜରିମାନା ଲାଗୁ କରିବାକୁ ବ୍ୟବସ୍ଥା କରାଯାଇଛି। ଏହା ସହିତ, ଯେଉଁମାନେ ତଥ୍ୟ ସଂଗ୍ରହ କରନ୍ତି ସେମାନଙ୍କ ପାଇଁ ଦଶଟି ଦାୟିତ୍ୱ ମଧ୍ୟ ସ୍ଥିର କରାଯାଇଛି । ସେହିପରି ଆଇନର ଅନୁପାଳନ ଏବଂ ଅଭିଯୋଗର ସମାଧାନ ପାଇଁ ଡାଟା ସୁରକ୍ଷା ବୋର୍ଡ ଗଠନ ପାଇଁ ଏକ ପ୍ରସ୍ତାବ ମଧ୍ୟ ଦିଆଯାଇଛି।
