ଦାରିଙ୍ଗବାଡି,୯।୧୧(ଅରୁଣ ସାହୁ): କନ୍ଧମାଳ ଜିଲାପାଳ ବେଦଭୂଷଣ ଏବଂ ଏଏସପି ହରିଶ ବିସିଙ୍କ ମିଳିତ ଅଭିଯୋଗ ଶୁଣାଣି କାର୍ଯ୍ୟକ୍ରମ ସୋମବାର ଦାରିଙ୍ଗବାଡ଼ି ବ୍ଲକ୍ ସଭାଗୃହ ପରିସରରେ ଅନୁଷ୍ଠିତ ହେବାକୁ ଯାଉଛି। ଏଥିପାଇଁ ଅଞ୍ଚଳବାସୀ ଏବଂ ଲୋକ ପ୍ରତିନିଧିମାନେ ବହୁ ସଂଖ୍ୟାରେ ଅଭିଯୋଗ ନେଇ ପହଞ୍ଚିବାକୁ ପ୍ରସ୍ତୁତ ହୋଇଛନ୍ତି।
ଶିକ୍ଷା, ସ୍ୱାସ୍ଥ୍ୟ, ଗମନାଗମନ, ମୋବାଇଲ୍ ନେଟୱାର୍କ ସମସ୍ୟା, ପିଇବା ପାଣି, ଭତ୍ତା ସମସ୍ୟା, ପ୍ରଧାନମନ୍ତ୍ରୀ ଆବାସ ଯୋଜନାରୁ ବଞ୍ଚିତ ହିତାଧିକାରୀ ଏବଂ ଜମି ବିବାଦ ଭଳି ଗୁରୁତ୍ୱପୂର୍ଣ୍ଣ ସମସ୍ୟାର ସମାଧାନ ପାଇଁ ଲୋକେ ଜିଲାପାଳଙ୍କ ନିକଟରେ ଗୁହାରି କରିବାର ସମ୍ଭାବନା ରହିଛି।
ସ୍ଥାନୀୟ ପ୍ରଶାସନ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଅଭିଯୋଗଗୁଡ଼ିକର ତୁରନ୍ତ ସମାଧାନ କରିବା ପାଇଁ ଜିଲ୍ଲାର ସମସ୍ତ ବିଭାଗର ଅଧିକାରୀମାନେ ଉପସ୍ଥିତ ରହିବେ।
ଦାରିଙ୍ଗବାଡ଼ି ବିଡିଓ ପ୍ରୀତିରଞ୍ଜନ ରଥ ଦୂରଦୂରାନ୍ତରୁ ଆସୁଥିବା ଲୋକମାନେ କିପରି ସୁବିଧାରେ ଅଭିଯୋଗ କରିପାରିବେ, ସେଥିପାଇଁ ସମସ୍ତ ପ୍ରସ୍ତୁତି କରିଛନ୍ତି। ସେ କହିଛନ୍ତି ଯେ ବ୍ଲକ୍ କାର୍ଯ୍ୟାଳୟର କର୍ମଚାରୀମାନେ ଅଭିଯୋଗକାରୀଙ୍କୁ ଆବେଦନପତ୍ର ସଂଗ୍ରହ, ନାମ ପଞ୍ଜୀକରଣ କରିବାରେ ସାହାଯ୍ୟ କରିବେ ଏବଂ ଅଭିଯୋଗ ପ୍ରକୋଷ୍ଠରେ ପହଞ୍ଚାଇବା ପର୍ଯ୍ୟନ୍ତ ସହାୟତା କରିବେ।
ସୂଚନାଯୋଗ୍ୟ ଯେ, ଜିଲାପାଳ ବେଦଭୂଷଣ ଦାୟିତ୍ୱ ନେବା ପରେ ଗତ ଅଗଷ୍ଟ ୧୧ ତାରିଖରେ ଦାରିଙ୍ଗବାଡ଼ିରେ ଅନୁଷ୍ଠିତ ପ୍ରଥମ ଅଭିଯୋଗ ଶୁଣାଣିରେ ସର୍ବାଧିକ ରେକର୍ଡ ୨୫୬ଟି ଅଭିଯୋଗ ଶୁଣିଥିଲେ। ପୂର୍ବରୁ ଆସିଥିବା କିଛି ଅଭିଯୋଗର ସମାଧାନ ହୋଇନଥିବାରୁ ଏଥର ଅଧିକ ଭିଡ଼ ହେବାର ସମ୍ଭାବନା ରହିଛି।
