ଦାରିଙ୍ଗବାଡ଼ି,୧୦ା୧୧(ଅରୁଣ ସାହୁ): ଥରୁଛି ଦାରିଙ୍ଗବାଡ଼ି। ସୋମବାର ଭୋର ତାପମାତ୍ରା ୧୦ ଡିଗ୍ରୀ ରେକର୍ଡ କରାଯାଇଥିବା ବିଡିଓ ପ୍ରୀତିରଞ୍ଜନ ରଥ କହିଛନ୍ତି। ଶୀତ ବିଳମ୍ବରେ ଆସିଥିଲେ ମଧ୍ୟ ଗତ ୩ ଦିନ ହେଲା ତାପମାତ୍ରା ତଳମୁହାଁ ହୋଇଛି। ବିଳମ୍ବିତ ରାତିଠାରୁ ଘନ କୁହୁଡ଼ି ଆରମ୍ଭ ହୋଇ ସକାଳ ୮ ଟା ପର୍ଯ୍ୟନ୍ତ କୁହୁଡ଼ି ଆଚ୍ଛାଦିତ ହୋଇରହୁଛି। ଦାରିଙ୍ଗବାଡ଼ିର ଆଭ୍ୟନ୍ତରୀଣ ଅଞ୍ଚଳରେ ଏହା ଠାରୁ ଆହୁରି ତାପମାତ୍ରା କମିଥିବା କୁହାଯାଉଛି। ଦୁର୍ଗମ ଅଞ୍ଚଳ ସିର୍କାବର୍ଗ, ସିଆଙ୍ଗବାଲି, ପର୍ତ୍ତମାହା, ସୋନପୁର, ଦନେକବାଡ଼ି, ତାଜୁଙ୍ଗିଆ ଆଦି ଅଞ୍ଚଳରେ ଥିବା ଦୁର୍ଗମ ଗ୍ରାମରେ ଶୀତର ପ୍ରକୋପ ଅଧିକ ରହିଛି। ବିଭିନ୍ନ ସ୍ଥାନରେ ଲୋକ ନିଆଁର ଆଶ୍ରୟ ନେଉଥିବା ଦେଖିବାକୁ ମିଳିଛି। ଦାରିଙ୍ଗବାଡ଼ିର ଶୀତର ମଜା ନେବା ପାଇଁ ଆସିଥିବା ପର୍ଯ୍ୟଟକ ଅତ୍ୟନ୍ତ ଖୁସି ଅନୁଭବ କରୁଛନ୍ତି। ସେହିପରି ସ୍ଥାନୀୟ କ୍ରୀଡ଼ାବିତ୍ ଖେଳ ପଡ଼ିଆରେ ଶୀତର ମଜା ନେଇ ଫୁଟବଲ ଖେଳୁଥିବା ଦେଖିବାକୁ ମିଳିଛି। ସେହିପରି ସକାଳ ଭ୍ରମଣ, ଯୋଗ, କସରତ କରି ଦେହକୁ ଗରମ କରୁଥିବା ଓ ସ୍ବାସ୍ଥ୍ୟ ପାଇଁ ଏହା କରୁଥିବା ଜଣାପଡ଼ିଛି।