ନୂଆଦିଲ୍ଲୀ,୪।୭: ଭାରତୀୟ ଚେସ୍ ବିଶ୍ୱ ଚାମ୍ପିଅନ୍ ଡି. ଗୁକେଶ କ୍ରୋଏସିଆର ଜାଗ୍ରେବରେ ଚାଲିଥିବା ଗ୍ରାଣ୍ଡ ଚେସ୍ ଟୁର୍ର ସୁପରଇଉନାଇଟେଡ୍ ରାପିଡ୍ ଓ ବ୍ଲିଟ୍ଜ ଟୁର୍ଣ୍ଣାମେଣ୍ଟରେ ବିଶ୍ୱର ନମ୍ବର ଓଲ୍ ଖେଳାଳି ମାଗନସ୍ କାର୍ଲସେନଙ୍କୁ ପୁଣିଥରେ ପରାସ୍ତ କରି ଚମକ ସୃଷ୍ଟି କରିଛନ୍ତି। ଏହା ତାଙ୍କର କ୍ରମାଗତ ପଞ୍ଚମ ବିଜୟ ଏବଂ ଦ୍ୱିତୀୟ ଦିନ ଶେଷରେ ସେ ୧୦ ପଏଣ୍ଟ ସହ ଟୁର୍ଣ୍ଣାମେଣ୍ଟରେ ଏକମାତ୍ର ଅଗ୍ରଣୀ ଭାବେ ଉଭା ହୋଇଛନ୍ତି।
ଷଷ୍ଠ ରାଉଣ୍ଡରେ ଗୁକେଶ କଳା ଗୋଟି ନେଇ ଖେଳିଥିବା ଏହି ମୁକାବିଲାରେ କାର୍ଲସେନଙ୍କୁ ୪୯ ଚାଲରେ ପରାସ୍ତ କରିଥିଲେ। ଏହା ପୂର୍ବରୁ ନରୱେ ଚେସ୍ ୨୦୨୫ରେ ମଧ୍ୟ ଗୁକେଶ କାର୍ଲସେନଙ୍କୁ ହରାଇଥିଲେ, ଯାହା ତାଙ୍କ ପାଇଁ ଏକ ବଡ଼ ସଫଳତା ଥିଲା। ଏହି ବିଜୟ ଗୁକେଶଙ୍କୁ କେବଳ ଟୁର୍ଣ୍ଣାମେଣ୍ଟରେ ଆଗରେ ରଖିନାହିଁ, ବରଂ କାର୍ଲସେନଙ୍କର ପ୍ରାଧାନ୍ୟକୁ ପ୍ରଶ୍ନବାଚୀ କରିଛି, ଯେଉଁଥିପାଇଁ ଚେସ୍ ଲିଜେଣ୍ଡ ଗ୍ୟାରି କାସ୍ପାରୋଭ ମଧ୍ୟ ମନ୍ତବ୍ୟ ଦେଇଛନ୍ତି ଯେ, “ଏବେ ଆମେ ମାଗନସ୍ଙ୍କ ଆଧିପତ୍ୟକୁ ପ୍ରଶ୍ନ କରିପାରିବା।”
ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ କାର୍ଲସେନ ଗୁକେଶଙ୍କୁ “ଟୁର୍ଣ୍ଣାମେଣ୍ଟର ସମ୍ଭାବ୍ୟ ଦୁର୍ବଳ ଖେଳାଳିମାନଙ୍କ ମଧ୍ୟରୁ ଜଣେ” ବୋଲି ମନ୍ତବ୍ୟ ଦେଇଥିଲେ। କିନ୍ତୁ ଗୁକେଶ ଏହି ମନ୍ତବ୍ୟର ଦମଦାର ଜବାବ ଦେଇ ପ୍ରଥମ ଦିନରେ ଅନ୍ୟ ଦୁଇଟି ଗୁରୁତ୍ୱପୂର୍ଣ୍ଣ ମ୍ୟାଚରେ ଆଲିରେଜା ଫିରୋଜା ଓ ପ୍ରଜ୍ଞାନନ୍ଦଙ୍କୁ ହରାଇ କାର୍ଲସେନଙ୍କ ସହ ଯୁଗ୍ମ ଶୀର୍ଷ ସ୍ଥାନ ହାସଲ କରିଥିଲେ। ଦ୍ୱିତୀୟ ଦିନରେ ସେ କାର୍ଲସେନଙ୍କୁ ପରାସ୍ତ କରି ଏକ ୨ ପଏଣ୍ଟର ଅଗ୍ରଣୀ ପାଇଁ ଏକାକୀ ଶୀର୍ଷରେ ପହଞ୍ଚିଛନ୍ତି।
ଏହି ବିଜୟ ଗୁକେଶଙ୍କ ରାପିଡ୍ ଓ ବ୍ଲିଟ୍ଜ ଫର୍ମାଟରେ ସାମର୍ଥ୍ୟକୁ ପ୍ରମାଣ କରିଛି, ଯେଉଁଥିରେ କାର୍ଲସେନ ପୂର୍ବରୁ ତାଙ୍କୁ ଦୁର୍ବଳ ବୋଲି ଭାବିଥିଲେ। ଏହା ଗୁକେଶଙ୍କ କ୍ୟାରିଅରରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ, ଯିଏକି ନିକଟରେ ନରୱେ ଚେସ୍ରେ ମଧ୍ୟ କାର୍ଲସେନଙ୍କୁ ପ୍ରଥମଥର ପାଇଁ କ୍ଲାସିକାଲ ଫର୍ମାଟରେ ହରାଇଥିଲେ।
