ନୂଆଦିଲ୍ଲୀ,୬ା୧୨:ପ୍ରଯୁକ୍ତିର ଅଗ୍ରଗତି ଲୋକଙ୍କୁ ଯେତିକି ସୁବିଧା ଦେଉଛି, ଏହାର ଦୁଷ୍କରିଣାମ ମାନବ ସମାଜ ପାଇଁ ସେତିକି ବିପଦ ଆଣିଦେଇପାରେ। ଡାଟା ସିକ୍ୟୁରିଟି କାଉନ୍ସିଲ ଅଫ୍ ଇଣ୍ଡିଆ ଏବଂ ସେକ୍ୱେରିଟ୍ ପକ୍ଷରୁ କରାଯାଇଥିବା ଏକ ସଦ୍ୟ ଅଧ୍ୟୟନ ଅନୁଯାୟୀ, ୨୦୨୫ରେ ସାଇବର ଆକ୍ରମଣ ବଢ଼ିପାରେ। ଏହାର ପ୍ରଭାବରେ ସ୍ବାସ୍ଥ୍ୟସେବା ଏବଂ ଆର୍ଥତ୍କ କ୍ଷେତ୍ର ସର୍ବାଧିକ କ୍ଷତିଗ୍ରସ୍ତ ହୋଇପାରେ। ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ଏବଂ ଡିପ୍ଫେକ୍ ଟେକ୍ନୋଲୋଜିଜନିତ ବିପଦ ନୂଆବର୍ଷରେ ଏହି ଦୁଇ ସେକ୍ଟର ପାଇଁ ବିପଦ ସାଜିବ ବୋଲି ଇଣ୍ଡିଆ ସାଇବର ଥ୍ରେଟ୍ ରିପୋର୍ଟ-୨୦୨୫ରେ ଉଲ୍ଲେଖ କରାଯାଇଛି।
ପ୍ରକାଶିତ ରିପୋର୍ଟ ପ୍ରସ୍ତୁତି ବେଳେ ମୋଟ ୧୮ଟି ଶିଳ୍ପକୁ ନେଇ ଅଧ୍ୟୟନ କରାଯାଇଥିଲା। ଏଥିରୁ ଜଣାପଡ଼ିଛି ଯେ, ସାଇବର ଅପରାଧୀମାନେ ରଣନୀତି ବଦଳାଇ ବିଭିନ୍ନ ସେକ୍ଟରକୁ ଟାର୍ଗେଟ କରିବା ପାଇଁ ଏଆଇର ବହୁଳ ବ୍ୟବହାର କରୁଛନ୍ତି। ବିଶେଷକରି ଡିପ୍ଫେକ୍ ଟେକ୍ନୋଲୋଜି ଏବଂ ପର୍ସନାଲାଇଜ୍ଡ ଆଟାକ୍ ଭେକ୍ଟର୍ସ ଜରିଆରେ ସେମାନେ ଅର୍ଥଲୁଟ୍ ଉଦ୍ୟମ ଚଳାଇଥିବାରୁ ସରକାରଙ୍କ ପକ୍ଷରୁ ନିଆଯାଉଥିବା ପ୍ରତିକାରମୂଳକ ପଦକ୍ଷେପ ମଧ୍ୟ କାମ କରୁନାହିଁ। ପାରମ୍ପରିକ ସୁରକ୍ଷା, ନିରାପତ୍ତା ଏଆଇ ପରିଚାଳିତ ମାଲ୍ଓ୍ବେର ଆଗରେ ହାର ମାନୁଛି। ସେହିପରି ଡେଟାକୁ ଅସ୍ତ୍ର କରି କରାଯାଉଥିବା ଆକ୍ରମଣ ସମ୍ବେଦନଶୀଳ ଏଆଇ ସିଷ୍ଟମ୍ର ଦକ୍ଷତାକୁ ଊଣା କରିଦେଉଛି। ଏହାର ପ୍ରଭାବରେ ସ୍ବାସ୍ଥ୍ୟସେବା ଓ ସ୍ବୟଂଚାଳିତ ପରିବହନ ବ୍ୟବସ୍ଥା ବିପନ୍ନ ହୋଇପାରେ ବୋଲି ରିପୋର୍ଟରେ ସତର୍କ କରାଯାଇଛି। ଏଥିରେ ଆହୁରି କୁହାଯାଇଛି, ସାଇବର ଅପରାଧୀମାନେ ଡିପ୍ଫେକ୍ ଟେକ୍ନୋଲୋଜି ଉପଯୋଗ କରି ଭିଡିଓ, ଅଡ଼ିଓ କଣ୍ଟେଣ୍ଟ ପ୍ରସ୍ତୁତ କରିବେ। ଏହାଦ୍ୱାରା ସେମାନେ ଲୋକଙ୍କଠାରୁ ସମ୍ବେଦନଶୀଳ ତଥ୍ୟ ହାସଲ କରିବାରେ ସକ୍ଷମ ହେବେ। ଏପରିକି ସାଇବର ଅପରାଧୀମାନେ ରାନ୍ସମ୍ଓ୍ବେର ସୃଷ୍ଟି କରି ଲୋକଙ୍କଠାରୁ ଅର୍ଥ ଅସୁଲି କରିପାରନ୍ତି ବୋଲି ଆଶଙ୍କା ବ୍ୟକ୍ତ କରାଯାଇଛି।
