ଭୁବନେଶ୍ୱର,୨୨ ।୩ ସେଣ୍ଟ୍ରାଲ୍ ବ୍ୟାଙ୍କ ଅଫ୍ ଇଣ୍ଡିଆ (ସିବିଆଇ)ର ଭୁବନେଶ୍ୱର କ୍ଷେତ୍ର ପକ୍ଷରୁ ସୋମବାର ଏକ ମୁଦ୍ରା ମେଳାର ଆୟୋଜନ କରାଯାଇଥିଲା। ଏହି ପରିପ୍ରେକ୍ଷୀରେ ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ)ର ଓଡ଼ିଶା ଶାଖା ମହାପ୍ରବନ୍ଧକ କେଶବ କୋରକୋରା ମୁଖ୍ୟ ଅତିଥି ଭାବେ ଯୋଗ ଦେଇ ଏହାର ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ସିବିଆଇର ବରିଷ୍ଠ କ୍ଷେତ୍ରୀୟ ପ୍ରବନ୍ଧକ ପ୍ରଦୀପ କୁମାର ସାମନ୍ତରାୟଙ୍କ ସମେତ ବହୁ ବରିଷ୍ଠ ଅଧିକାରୀ ଉପସ୍ଥିତ ଥିଲେ। ବ୍ୟାଙ୍କ ଗ୍ରାହକମାନଙ୍କ ମଧ୍ୟରେ ମୁଦ୍ରା ବାଣ୍ଟିବା ସହ ମୁଦ୍ରା ବ୍ୟବହାରର ସୁବିଧା ଉପରେ କୋରକୋରା ଗୁରୁତ୍ୱାରୋପ କରିଥିଲେ। ସେହିଭଳି ଭୁବନେଶ୍ୱର କ୍ଷେତ୍ରୀୟ କାର୍ଯ୍ୟାଳୟର ମୁଖ୍ୟ ପ୍ରବନ୍ଧକ ମିହିର ତ୍ରିପାଠୀ ଉକ୍ତ ମେଳାର ପରିଚାଳନା ଭାର ଗ୍ରହଣ କରିଥିଲେ। ସେହିପରି ଜଟଣୀ କରେନ୍ସି ଚେଷ୍ଟର ବରିଷ୍ଠ ପ୍ରବନ୍ଧକ ପି.କେ ସାହୁ ଉପସ୍ଥିତ ଅତିଥି ଓ ଗ୍ରାହକଙ୍କୁ ଧନ୍ୟବାଦ ପ୍ରଦାନ କରିଥିଲେ। ଅପରପକ୍ଷେ ମୋଟ ୧୧ଲକ୍ଷ ଟଙ୍କାର ମୁଦ୍ରା ଜଟଣୀ ଏବଂ ମହତାବ ରୋଡ୍ର କରେନ୍ସି ଚେଷ୍ଟର ସକ୍ରିୟ ତତ୍ତ୍ବାବଧାନରେ ବିଭିନ୍ନ ଶାଖାଗୁଡିକ ଦ୍ୱାରା ଗ୍ରାହକମାନଙ୍କୁ ବଣ୍ଟନ କରାଯାଇଥିଲା।
