ଭଞ୍ଜନଗର,୧୯ା୭(ବାବୁଲା ପ୍ରଧାନ): ଘୁମୁସର ମାଟିରେ ଭଞ୍ଜ ରାଜବଂଶର ଯାହା କିଛି ସ୍ମୃତି ଅଛି ସେଥିମଧ୍ୟରୁ ଚକରାଘାଟି ଅନ୍ୟତମ। ଉକ୍ତ ଘଞ୍ଚ ଜଙ୍ଗଲ ଘାଟିରେ ଘୁମୁସର ବୀର ଚକରା ବିଷୋୟୀ ବ୍ରିଟିଶ ସେନା ବିରୋଧରେ ଲଢ଼େଇ କରୁଥିଲେ। କିନ୍ତୁ ଉକ୍ତ ଘାଟି ଅବହେଳିତ ଅବସ୍ଥାରେ ଥିବା ଯୋଗୁ ତାହା ଲୋକ ଲୋଚନକୁ ଆସିପାରି ନ ଥିଲା। ଘାଟିରେ ଥିବା ଦେବୀ ଠାକୁରାଣୀ ଏକ ଗଛ ମୂଳରେ ପୂଜା ପାଉଥିଲେ। ଏହାପରେ ପ୍ରାୟ ୧୦ ବର୍ଷ ପୂର୍ବେ ସମ୍ପୃକ୍ତ ଅଞ୍ଚଳର ରେଞ୍ଜର ତଥା ବର୍ତ୍ତମାନର ଅବସରପ୍ରାପ୍ତ ଡିଏଫ୍ଓ ଶରତ ଚନ୍ଦ୍ର ମିଶ୍ର ଛୋଟିଆ ମନ୍ଦିର ଘରଟିଏ କରିଥିଲେ। ଇତିମଧ୍ୟରେ ୨୦୨୪ରେ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ନିର୍ବାଚିତ ହେବା ପରେ ଘୁମୁସର ଇତିହାସର ସ୍ମୃତିକୁ ପୁନରୁଦ୍ଧାର କରିବା ପାଇଁ ପଦକ୍ଷେପ ନେଇଥିଲେ। ଏହାପରେ ଉକ୍ତ ଘାଟିର ଉନ୍ନତିକରଣ ପାଇଁ ୬ କୋଟି ଟଙ୍କା ଅନୁମୋଦନ କରାଇଥିଲେ। ଉକ୍ତ ଅର୍ଥରେ ବର୍ତ୍ତମାନ ଘାଟିର ଉନ୍ନତିକରଣ ହୋଇଛି। ଖୁବଶୀଘ୍ର ତାହା ଉଦଘାଟିତ ହେବ।
ଉଦଘାଟନ ପୂର୍ବରୁ ଘାଟିରେ ଶହ ଶହ ପର୍ଯ୍ୟଟକଙ୍କ ଦୈନନ୍ଦିନ ଭିଡ଼ ହେଉଛି। ବିଶେଷ କରି ଯୁବତୀ ଯୁବକଙ୍କ ଭିଡ଼ ଜମୁଛି। ମନୋରଞ୍ଜନ ସହ ଭୋଜି ଭାତର ମଜା ନେଉଛନ୍ତି ଲୋକେ ସେଠୀ। ଘଞ୍ଚ ଜଙ୍ଗଲ ମଧ୍ୟରେ ଯୁବ ଗୋଷ୍ଠୀଙ୍କ ଭିଡ ଜମୁଥିବା ବେଳେ ସେମାନଙ୍କ ସୁରକ୍ଷା ଚିନ୍ତା ଘାରିଛି। ତେଣୁ ତୁରନ୍ତ ଘାଟିରେ ଚାରିଆଡ଼େ ସିସିଟିଭି ଲଗାଇବା ଆବଶ୍ୟକତା ରହିଛି। ନଚେତ୍ ବିଷ୍ୟତରେ କିଛି ଅଘଟଣ ଘଟିବା ଆଶଙ୍କା ରହିଛି। ଏଥିସହ ନିର୍ଦ୍ଦିଷ୍ଟ ସମୟ ମଧ୍ୟରେ ହିଁ ଘାଟିକୁ ପର୍ଯ୍ୟଟକଙ୍କୁ ଯିବାକୁ ଅନୁମତି ଦିଆଯାଉ। ଘାଟିରେ ପର୍ଯ୍ୟଟକିମାନେ ରହିବା ପାଇଁ କଟେଜ, ବିଦ୍ୟୁ୍ ପ୍ରମୁଖ ସୁବିଧା କରାଯାଇଛି।
କେମିତି ଯିବେ?
ଗଞ୍ଜାମ ଜିଲା ଭଞ୍ଜନଗର ସହରରୁ ଦଶପଲ୍ଲା ଜାତୀୟ ରାଜପଥ ରାସ୍ତାରେ ଯିବା ସମୟରେ ସହରଠୁ ୧୬ କିମି ପରେ ଘାଟି ଛକ ପଡ଼େ। ସେଠାରୁ ପ୍ରାୟ ୭ କିମି ଘଞ୍ଚ ଜଙ୍ଗଲ ଭିତରକୁ ଗଲେ ଘାଟି ପଡ଼େ। ଘାଟିର ସୌନ୍ଦର୍ଯ୍ୟକରଣ ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି। ବନ ବିଭାଗ ନିୟନ୍ତ୍ରଣରେ ଘାଟି। ତେଣୁ ବନ ବିଭାଗ ପକ୍ଷରୁ ତୁରନ୍ତ ପର୍ଯ୍ୟଟକଙ୍କ ପାଇଁ ସୁରକ୍ଷା ବ୍ୟବସ୍ଥା ଗ୍ରହଣ କରିବା ଆଶ୍ୟକତା ରହିଛି। ଅନ୍ୟପଟେ ଘୁମୁସର ଇତିହାସର ଆହୁରି ଅନେକ ସ୍ମୃତିର ପୁନରୁଦ୍ଧାର ପାଇଁ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ପଦକ୍ଷେପ ନେଇଛନ୍ତି। ସେଥିମଧ୍ୟରେ ଚକରା ବିଷୋୟୀଙ୍କ ଜନ୍ମ ସ୍ଥାନ ବିଞ୍ଜିଗିରିର ଉନ୍ନତି ପାଇଁ ଇତିମଧ୍ୟରେ ୧୫ କୋଟି ଟଙ୍କା ଅନୁମୋଦନ ହୋଇଛି। ଘୁମୁସର ଭଞ୍ଜ ରାଜବଂଶର ରାଜଧାନୀ କୁଲାଡର ମଧ୍ୟ ବିକାଶ ପାଇଁ ପଦକ୍ଷେପ ନିଆଯାଇଛି।
