ମହାକାଳପଡ଼ା,୧୩ା୧୦(ପ୍ରତାପ ଚନ୍ଦ୍ର ସ୍ବାଇଁ):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ନଦୀ, ନାଳରେ କୁମ୍ଭୀର ଘୂରି ବୁଲୁଛନ୍ତି। ରବିବାର ଅପରାହ୍ନରେ ଏକ ବିଶାଳ କୁମ୍ଭୀର ଲୁଣାନଦୀ କୂଳରେ ଘୂରି ବୁଲୁଥିବା ଦେଖିବାକୁ ମିଳିଛି। ଏହା ଦେଖି ଲୋକେ ବନ ବିଭାଗକୁ ଖବର ଦେଇଥିଲେ। ହେଲେ ବିଭାଗୀୟ ଅଧିକାରୀ ଓ କର୍ମଚାରୀ ନାଚାର ବୋଲି କହିଛନ୍ତି। ଖାଦ୍ୟ ଅଭାବ ଯୋଗୁ କୁମ୍ଭୀରମାନେ କୂଳକୁ ଆସି ନଦୀ,ନାଳରେ ମାଛ କଙ୍କଡ଼ା ଖାଇଥାନ୍ତି। ଏହି ସମୟରେ ମଣିଷଙ୍କୁ ଆକ୍ରମଣ କରୁଛନ୍ତି। ଦୁଇ ସପ୍ତାହ ମଧ୍ୟରେ ଜଣେ ମହିଳାଙ୍କ ମୃତ୍ୟୁ ହୋଇଥିବା ବେଳେ ୫ଜଣ ଗୁରୁତର ହୋଇଛନ୍ତି।
ବେଣାକନ୍ଧା ଅଞ୍ଚଳର ଜଣେ ମହିଳାଙ୍କୁ ଗୋବରୀ ଶାଖା ନାଳରେ କୁମ୍ଭୀର ନଦୀ ମଧ୍ୟକୁ ଟାଣି ନେଇ ବୁଡ଼ାଇ ଦେଇଥିଲା। ପରଦିନ ମୃତଦେହ ଜବତ ହୋଇଥିଲା। ସେହିପରି ଖରିନାସୀ ଗ୍ରାମର ଜଣେ ମତ୍ସ୍ୟଜୀବୀ ଭଉଁରୀ ଜାଲ ପକାଇ ମାଛ ଧରିବା ବେଳେ ଏକ କୁମ୍ଭୀର ଆକ୍ରମଣ କରି ଗୁରୁତର କରିଥିଲା। ପରେ କଟକ ବଡ଼ ଡାକ୍ତରଖାନାରେ ଭର୍ତ୍ତି ହୋଇ ଘରକୁ ଫେରିଛନ୍ତି। ସେହିପରି ବାଘୁଆ ମେଦ ଆଦିବାସୀପଡ଼ା ଗ୍ରାମର ଚାଷୀ ଶୌଚ ହେବାକୁ ଯାଇ କୁମ୍ଭୀର ଆକ୍ରମଣର ଶିକାର ହୋଇଥିଲେ। ଉପସ୍ଥିତ ବୁଦ୍ଧି ଖଟାଇ କୁମ୍ଭୀର ଆଖିରେ ଆଙ୍ଗୁଠି ଗେଞ୍ଜି ଆହତ ଅବସ୍ଥାରେ ଖସି ଆସିଥିଲେ। ସ୍ଥାନୀୟ ଛପାଲୀ କେନାଲ ବନ୍ଧରେ ବିଳମ୍ବିତ ରାତିରେ କୁମ୍ଭୀର ଯାଉଥିବା ଲୋକେ ଦେଖି ଭୟଭୀତ ହୋଇଥିଲେ। ସ୍ଥାନୀୟ ଦତ୍ତପୁର ଗଁା ପୋଖରୀରୁ ଏକ ୧୦ ଫୁଟ ଲମ୍ବ କୁମ୍ଭୀରକୁ ବନ ବିଭାଗ କର୍ମଚାରୀ ଉଦ୍ଧାର କରି ନଦୀରେ ଛାଡିଥିଲେ। ବିଭାଗ ପକ୍ଷରୁ ନଦୀ ନାଳରେ ପ୍ରବେଶ ନ କରିବାକୁ ସଚେତନତା ବାର୍ତ୍ତା ଦେଉଛନ୍ତି। ହେଲେ ଲୋକେ ନଦୀରେ ପ୍ରବେଶ କରିବା ସହ ମାଛ, କଙ୍କଡା ଓ ଗାଧୋଇବା ଯୋଗୁ କୁମ୍ଭୀର ଆକ୍ରମଣର ଶିକାର ହେଉଛନ୍ତି ବୋଲି ବୁଦ୍ଧିଜୀବୀ ବିରଞ୍ଚତ୍ ନାରାୟଣ ଦାସ କହିଛନ୍ତି। ଏ ସଂକ୍ରାନ୍ତରେ ମହାକାଳପଡ଼ା ବନ ବିଭାଗ ରେଞ୍ଜ ଅଧିକାରୀ ଶାନ୍ତନୁ କୁମାର ଦଳାଇଙ୍କୁ ପଚାରିବାରେ ନଦୀ ନାଳକୁ ପ୍ରବେଶ ନ କରିବାକୁ ବାରଣ କରାଯାଇଛି ବୋଲି ସେ କହିଛନ୍ତି।
Dharitri – The Largest & Most Trusted Odia Daily
