ଓ୍ବାଶିଂଟନ, ୧୬।୬ : ବୃଦ୍ଧି ହେଉଥିବା ମୁଦ୍ରାସ୍ଫୀତିକୁ ନିୟନ୍ତ୍ରଣ କରିବା ପାଇଁ ଆମେରିକାର ଫେଡେରାଲ ରିଜର୍ଭ ସୁଧ ହାର ବୃଦ୍ଧି କରିଛି। ଆମେରିକାର ଫେଡେରାଲ ରିଜର୍ଭ ସୁଧ ହାରକୁ ୭୫ ଆଧାର ପଏଣ୍ଟ ଅର୍ଥାତ୍ ୦.୭୫ ପ୍ରତିଶତ ବୃଦ୍ଧି କରିଛି। ଏହା ଦ୍ୱାରା ଭାରତୀୟ ବଜାରକୁ ମଧ୍ୟ ଝଟ୍କା ଲାଗିଛି। ଏହାଦ୍ୱାରା ଭାରତୀୟ ଟଙ୍କା ଆହୁରି ହ୍ରାସ ପାଇବାର ଆଶଙ୍କା ସୃଷ୍ଟି ହୋଇଛି।
ଆମେରିକାର ଫେଡେରାଲ ରିଜର୍ଭ ଦ୍ୱାରା ଗ୍ରହଣ କରାଯାଇଥିବା ପଦକ୍ଷେପ ଗତ ୨୮ ବର୍ଷ ମଧ୍ୟରେ ୧୯୯୪ ପରଠାରୁ ସୁଧ ହାରରେ ସବୁଠାରୁ ବଡ ବୃଦ୍ଧି। ଏହି ଯୋଗୁ ବିଶ୍ୱ ବଜାରରେ ପ୍ରଭାବ ପଡ଼ିବାର ଯଥେଷ୍ଟ ଆଶଙ୍କା ରହିଛି।
ଆମେରିକାରେ ଗ୍ରାହକ ମୂଲ୍ୟ ମୁଦ୍ରାସ୍ଫୀତି ୧୯୮୧ ପରଠାରୁ ସର୍ବୋଚ୍ଚ ସ୍ତରରେ ପହଞ୍ଚିଛି । ଏହା ୮.୬ ପ୍ରତିଶତରେ ପହଞ୍ଚିଛି। ସୁଧ ହାରରେ ବୃଦ୍ଧି ହେବାର ସୂଚନା ପୂର୍ବରୁ ଦିଆଯାଇଥିଲା। ସେହି ଆଧାରରେ ସୁଧ ହାରରେ ବୃଦ୍ଧି କରାଯାଇଛି। ଆମେରିକାର ଷ୍ଟକ ମାର୍କେଟରେ ଏହି ସୁଧ ହାର ବୃଦ୍ଧିର ପ୍ରଭାବ କିପରି ଅନୁଭୁତ ହେଉଛି ତାହା ଊପରେ ନଜର ରଖାଯାଇଥିବା ବୋଲି ଫେଡେରାଲ ରିଜର୍ଭ କହିଛି।
ସୁଧ ହାରକୁ ୦.୭୫ ପ୍ରତିଶତ ବୃଦ୍ଧି କରି ଆମେରିକାର କେନ୍ଦ୍ରୀୟ ବ୍ୟାଙ୍କ ଏହା ସ୍ପଷ୍ଟ କରିଛି ଯେ ବଢୁଥିବା ମୁଦ୍ରାସ୍ଫୀତି ହାରକୁ ହ୍ରାସ କରିବାକୁ ଏହା ପ୍ରତିଶ୍ରୁତିବଦ୍ଧ। ସୁଧ ହାର ବୃଦ୍ଧି ନେଇ ଏହାର ବିବୃତ୍ତିରେ କେନ୍ଦ୍ରୀୟ ବ୍ୟାଙ୍କ ସ୍ପଷ୍ଟ ଭାବେ କହିଛି ଯେ ମୁଦ୍ରାସ୍ଫୀତି ହାରକୁ ୨ ପ୍ରତିଶତକୁ ଆଣିବା ପାଇଁ ଫେଡେରାଲ ରିଜର୍ଭ ପକ୍ଷରୁ କଡା ପଦକ୍ଷେପ ନିଆଯିବ। ଫେଡେରାଲ ରିଜର୍ଭ କହିଛି ଯେ ଏହାୀ ପ୍ରଭାବରେ ଆମେରିକାରେ ଆଗାମୀ ଦିନରେ ଅର୍ଥନୀତି ମନ୍ଥର ହୋଇପାରେ। କେବଳ ସେତିକି ନୁହେଁ ଦେଶର ବେକାରୀ ହାର ଆହୁରି ବୃଦ୍ଧି ପାଇପାରେ।
ଆମେରିକାର ଫେଡେରାଲ ରିଜର୍ଭ ହାରର ବୃଦ୍ଧି ଭାରତୀୟ ବଜାର ଉପରେ ମଧ୍ୟ ଖରାପ ପ୍ରଭାବ ପକାଇବ ବୋଲି ଆଶା କରାଯାଉଛି ଏବଂ ଏହାର ସବୁଠାରୁ ବଡ କାରଣ ହେଉଛି ଡଲାର ତୁଳନାରେ ଟଙ୍କା ହ୍ରାସ ହୋଇପାରେ। ଫେଡେରାଲ ରିଜର୍ଭ ସୁଧ ହାର ବୃଦ୍ଧି ପରେ ଡଲାର ମୂଲ୍ୟରେ ଏକ ବଡ ବୃଦ୍ଧି ଦେଖିବାକୁ ମିଳିବ। ଏହା ଦ୍ୱାରା ଟଙ୍କାର ମୂଲ୍ୟ ପୁଣି କମିବାର ଆଶଙ୍କା ରହିଛି। ଭାରତର କେନ୍ଦ୍ରୀୟ ବ୍ୟାଙ୍କ ରିଜର୍ଭ ବ୍ୟାଙ୍କ ମଧ୍ୟ ସୁଧହାର ବଢ଼ାଇବାର ଚାପ ସୃଷ୍ଟି ହୋଇପାରେ ବୋଲି ଅର୍ଥବିଶେଷଜ୍ଞ ମତପୋଷଣ କରିଛନ୍ତି।
