ନୂଆଦିଲ୍ଲୀ,୯।୧୧: କେନ୍ଦ୍ର ସରକାର ବର୍ତ୍ତମାନ ଆର୍ଥତ୍କ ଅନ୍ତର୍ଭୁକ୍ତୀକରଣକୁ ଗୁରୁତ୍ୱ ଦେଉଛନ୍ତି। ଏହି ପଦକ୍ଷେପ ଅନ୍ତର୍ଗତ ରାଜ୍ୟ ସ୍ତରରେ ଜନଧନ ଯୋଜନା ଦ୍ୱାରା ଲୋକଙ୍କ ବ୍ୟାଙ୍କ ଖାତା ଖୋଲାଯାଉଛି। ଯେଉଁ ରାଜ୍ୟଗୁଡ଼ିକରେ ଏଭଳି ଆକାଉଣ୍ଟ ଖୋଲାଯାଇଛି ଉକ୍ତ ସ୍ଥାନଗୁଡ଼ିକରେ ଅପରାଧ, ମଦ, ତମାଖୁର ଚାହିଦା କମିଛି। ଜନଧନ-ଆଧାର-ମୋବାଇଲ ଯୋଗୁ ଏଭଳି ହୋଇଥାଇପାରେ ବୋଲି ରିପୋର୍ଟରେ କୁହାଯାଇଛି। ଲୋକଙ୍କ ନିକଟକୁ ବ୍ୟବସ୍ଥିତ ଢଙ୍ଗରେ ସବ୍ସିଡି ଅର୍ଥ ଯୋଗାଣ ଲାଗି ଏହି ଖାତାଗୁଡିକ ବିଶେଷ ଯୋଗଦାନ ରଖୁଛନ୍ତି।
ଉଲ୍ଳେଖଯୋଗ୍ୟ, ଜନଧନ ଯୋଜନାରେ ୪୩.୭୬ କୋଟି ଆକାଉଣ୍ଟ ଖୋଲାଯାଇଥିବା ଅର୍ଥ ମନ୍ତ୍ରଣାଳୟ ପକ୍ଷରୁ ସୂଚନା ରହିଛି। ବ୍ୟାଙ୍କଗୁଡ଼ିକ ଜନଧନ ଯୋଜନା ଅନ୍ତର୍ଗତ ଆକାଉଣ୍ଟଧାରୀଙ୍କୁ ମାଗଣା ଦୁର୍ଘଟଣା ବୀମା ସୁବିଧା ପ୍ରଦାନ କରୁଛନ୍ତି। ଏହି ସୁବିଧା ଥିବା ୩୧.୬୭ କୋଟି କାର୍ଡ ଜାରି କରାଯାଇଛି। ରୁପେ ଡେବିଟ କାର୍ଡରେ ୨ ଲକ୍ଷ ଟଙ୍କାର ମୁକ୍ତ ବୀମା ପ୍ରଦାନ କରାଯାଉଛି। ୨୦୧୫ ମାର୍ଚ୍ଚ ସୁଦ୍ଧା ଏହି ଯୋଜନାରେ ୧୪.୭୨ କୋଟି ଖାତା ଖୋଲିଥିଲା। ୨୦୨୧ରେ ଏହା ବୃଦ୍ଧି ଘଟି ୪୩.୭୬ କୋଟି ଛୁଇଁଛି। ଏହା ମଧ୍ୟରେ ୫୫% ଆକାଉଣ୍ଟ ମହିଳାଙ୍କର ବୋଲି ଜଣାପଡ଼ିଛି।
ସେହିଭଳି ଦେଶ ମଧ୍ୟରେ ବ୍ୟାଙ୍କ ଶାଖା ମଧ୍ୟ ବଢ଼ିଛି। ୨୦୧୫ରେ ପ୍ରତି ୧ ଲକ୍ଷ ଜନସଂଖ୍ୟା ପିଛା ଏହା ୧୩.୬ ଥିବା ବେଳେ ୨୦୨୧ରେ ଏହା ୧୪.୭ ଛୁଇଁଛି। ଜର୍ମାନୀ, ଚାଇନା ଏବଂ ଦକ୍ଷିଣ ଆଫ୍ରିକା ତୁଳନାରେ ଏହା ଅଧିକ ରହିଛି। ୨୦୧୪ ଅଗଷ୍ଟ ୧୮ରେ ପ୍ରଧାନମନ୍ତ୍ରୀ ଜନ ଧନ ଯୋଜନାକୁ ଶୁଭାରମ୍ଭ କରାଯାଇଥିଲା। ଲୋକଙ୍କୁ ବ୍ୟାଙ୍କ ସହ ଯୋଡ଼ିବା ଦିଗରେ ଏହି ଯୋଜନା ବିଶେଷ ଭାବେ ସହାୟକ ହୋଇଛି। ଏଥିରେ ପ୍ରତି ପରିବାର ପିଛା ଆକାଉଣ୍ଟ ଖୋଲିବା ଲକ୍ଷ୍ୟ ରଖାଯାଇଥିଲା। ଏହି ଯୋଜନାରେ ୧୦ ବର୍ଷରୁ କମ୍ ସମୟର ପିଲାଙ୍କ ଖାତା ମଧ୍ୟ ଖୋଲାଯାଇପାରିବ। ଏଥିରେ ରୁପେ ଏଟିଏମ୍ କାର୍ଡ, ୨ ଲକ୍ଷ ଟଙ୍କାର ଦୁର୍ଘଟଣା ବୀମା, ୩୦ ହଜାର ଟଙ୍କାର ଜୀବନ ବୀମା ଏବଂ ଜମା ରାଶି ଉପରେ ସୁଧ ମିଳୁଛି। ଯେକୌଣସି ବ୍ୟାଙ୍କରେ ଏହି ଖାତା ଖୋଲିପାରିବେ। ସର୍ବନିମ୍ନ ବାଲାନ୍ସ ରଖିବାର ମଧ୍ୟ କୌଣସି ନିୟମ ରଖାଯାଇନାହିଁ।
