ନୂଆଦିଲ୍ଲୀ,୧୫।୧୧: ଆଇପିଏଲ୍ ୨୦୨୫ ପୂର୍ବରୁ ମେଗା ଅକ୍ସନର ଆୟୋଜନ ସାଉଦି ଆରବରେ କରାଯିବ। ନଭେମ୍ବର ୨୪ ଏବଂ ୨୫ ତାରିଖ ଏଥିଲାଗି ଚୟନ କରାଯାଇଛି। ଏଥର ୧୫୭୪ ଖେଳାଳି ନିଜ ନାମ ପଞ୍ଜିକୃତ କରିଥିବା ବେଳେ କିଏ କିଏ ବାଜି ମାରିବେ ତାହା ଉପରେ ସମସ୍ତଙ୍କ ନଜର ରହିଛି। ତେବେ ଏହା ପୂର୍ବରୁ ଭାରତୀୟ ଷ୍ଟାର ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ ନିଜର ୟୁଟ୍ୟୁବ ଚ୍ୟାନେଲରେ ଏକ ମକ୍ ନିଲାମ କରିଥିଲେ। ଏଥିରେ ପ୍ରଶଂସକମାନେ ଆଇପିଏଲ୍ର ସମସ୍ତ ୧୦ ଟିମ୍ ଲାଗି ଦାମ୍ ଲଗାଇଥିଲେ, ଯେଉଁଥିରେ ପଞ୍ଜାବ ଦଳ ଅନେକ ବଡ଼ ଖେଳାଳିଙ୍କ ଉପରେ ନିଲାମ ଡାକିଥିଲା।
ମଙ୍କ ଅକ୍ସନରେ ପଞ୍ଜାବ କିଙ୍ଗ୍ସ ଟିମ୍ ଏଥର ୨ ଖେଳାଳିଙ୍କୁ ରିଟେନ୍ କରିଛି। ଦଳର ସବୁଠାରୁ ମହଙ୍ଗା ରିଟେନଶନ ଶଶାଙ୍କ ସିଂଙ୍କୁ କରାଯାଇଛି। ତାଙ୍କୁ ୫.୫ କୋଟି ଟଙ୍କାରେ କିଣାଯାଇଛି। ପ୍ରଭାସିମରନ ସିଂଙ୍କୁ ରିଟେନ କରିବା ଲାଗି ପଞ୍ଜାବ ୪କୋଟି ଟଙ୍କା ଖର୍ଚ୍ଚ କରିଛି। ସେହିଭଳି ଋଷଭ ପନ୍ତଙ୍କ ଉପରେ ବଡ଼ ଦାମ୍ ଲଗାଯାଇଛି।
ପନ୍ତଙ୍କୁ ଦିଲ୍ଲୀ ଟିମ୍ ଆଇପିଏଲ୍ ୨୦୨୫ ପାଇଁ ରିଟେନ କରିନାହିଁ। ଏମିତିରେ ସେ ଅକ୍ସନରେ ନଜର ଆସିବେ। ପ୍ରାରମ୍ଭିକ ଆକଳନ ଅନୁଯାୟୀ ସେ ଡିମାଣ୍ଡରେ ରହିବେ ବୋଲି ଆଶା କରାଯାଉଛି। ଅଶ୍ୱିନ ପକ୍ଷରୁ କରାଯାଇଥିବା ମକ୍ ଅଡିଶନରେ ମଧ୍ୟ ସେଭଳି କିଛି ନଜର ଆସିଛି। ପଞ୍ଜାବ ତାଙ୍କୁ ଅଧିନାୟକ କରିବା ଲାଗି ୨୦.୫ କୋଟିରେ କିଣିଛି। ଏହାଛଡ଼ା ଅର୍ଶଦୀପ ସିଂହଙ୍କୁ ଦଳ ୧୩.୫ କୋଟିରେ କିଣିଛି।
ଏହି ମକ୍ ଅକ୍ସନରେ ଫାଫ ଡୁ ପ୍ଲେସିସଙ୍କୁ ୫.୫ କୋଟି ଟଙ୍କାରେ ପଞ୍ଜାବ କିଣି ଦଳରେ ସାମିଲ କରିଛି। ସେହିଭଳି ଗ୍ଲେନ ମାକ୍ସଓ୍ବେଲ ମଧ୍ୟ ପଞ୍ଜାବକୁ ୯.୫ କୋଟିରେ ଯାଇଛନ୍ତି। ଦ୍ରୁତ ବୋଲର କାଗିସୋ ରବାଡ଼ାଙ୍କ ପାଇଁ ଦଳ ୧୦ କୋଟିର ଦାମ୍ ଲଗାଇଛି। ଯୁଜବେନ୍ଦ୍ର ଚହଲଙ୍କ ପାଇଁ ଅନେକ ଦଳ ଆଶାୟୀ ଥିବା ବେଳେ ପଞ୍ଜାବ ୧୧ କୋଟିରେ କିଣିଥିବା ଦେଖାଯାଇଛି।
