ପୁଣେ,୬।୩: ଏକ ଛାଡପତ୍ର ମାମଲାର ଶୁଣାଣିବେଳେ କୋର୍ଟ କହିଛନ୍ତି ବଡ଼ କଥା। ଯାହାକୁ ନେଇ ଏବେ ଚର୍ଚ୍ଚା ଜୋର ଧରିବାରେ ଲାଗିଛି। ମହାରାଷ୍ଟ୍ରର ପୁଣେ ଜିଲା କୋର୍ଟ କହିଛନ୍ତି, ଯଦି ମହିଳା ସିନ୍ଦୁର ଓ ମଙ୍ଗଳସୂତ୍ର ନ ପିନ୍ଧିବେ ତେବେ ସ୍ବାମୀ କାହିଁକି ସ୍ତ୍ରୀଙ୍କ ପ୍ରତି ଆଗ୍ରହ ଦେଖାଇବେ। କୋର୍ଟଙ୍କ ଏହି ବୟାନ ଏବେ ଚର୍ଚ୍ଚାର ଖୋରାକ ଯୋଗାଇଛି।
ପୁଣେର ଓକିଲ ଅଙ୍କୁର ଆର ଜାହାଗିରଦାରଙ୍କ ଦ୍ୱାରା ଶେୟାର କରାଯାଇଥିବା ଏକ ଲିଙ୍କଡଇନ ପୋଷ୍ଟରେ କୁହାଯାଇଛି ଯେ ଏହି ଦମ୍ପତି ଏକ ଘରୋଇ ହିଂସା ମାମଲାରେ ମଧ୍ୟସ୍ଥତା ପାଇଁ ବିଚାରପତିଙ୍କ ସମ୍ମୁଖରେ ହାଜର ହୋଇଥିଲେ। ବିଚାରପତି ସେମାନଙ୍କୁ ବିବାଦର ସମାଧାନ ସୌହାର୍ଦ୍ଦ୍ୟପୂର୍ଣ୍ଣ ଭାବରେ କରିବାକୁ ଉତ୍ସାହିତ କରୁଥିଲେ। ବିଚାରପତି ମହିଳାଙ୍କୁ ପଚାରିଲେ, “ମୁଁ ଦେଖିପାରୁଛି ଯେ ତୁମେ Mangalsutra, Bindi ପିନ୍ଧି ନାହଁ। ଯଦି ତୁମେ ଜଣେ ବିବାହିତ ମହିଳାଙ୍କ ପରି ବ୍ୟବହାର କରୁନାହଁ, ତେବେ ତୁମ ସୱାମୀ ତୁମ ପ୍ରତି କାହିଁକି ଆଗ୍ରହ ଦେଖାଇବେ?”
ଏନେଇ ଜାହାଗିରଦାର କହିଛନ୍ତି ଯେ ବିଚାରପତିମାନଙ୍କ ଦ୍ୱାରା ଦିଆଯାଇଥିବା ମନ୍ତବ୍ୟ ବିଷୟରେ ଅଭିଯୋଗ ନ ହେବା ନିରାଶାଜନକ। ଜିଲ୍ଲା କୋର୍ଟଗୁଡ଼ିକରେ ଏପରି ଅନେକ ଘଟଣା ଘଟୁଛି ଯାହା ଯେକୌଣସି ଯୁକ୍ତିଯୁକ୍ତ ଚିନ୍ତାଶୀଳ ଶିକ୍ଷିତ ବ୍ୟକ୍ତିଙ୍କ ବିବେକକୁ ଆଘାତ ଦେବ। ଏପରି ବ୍ୟବହାର ଓ ବିଚାରପତିଙ୍କ ଦ୍ୱାରା ଦିଆଯାଉଥିବା ଏଭଳି ବୟାନକୁ ନେଇ ମହିଳାମାନେ ଅସହଜ ଅନୁଭବ କରୁଛନ୍ତି।
ଶୁଣାଣିବେଳେ ବିଚାରପତି ଆହୁରି କହିଥିଲେ, “ଯଦି ଜଣେ ମହିଳା ଭଲ ରୋଜଗାର କରନ୍ତି, ତେବେ ସେ ସର୍ବଦା ତାଙ୍କଠାରୁ ଅଧିକ ରୋଜଗାର କରୁଥିବା ସ୍ବାମୀ ଖୋଜିବେ ଏବଂ ତାଙ୍କଠାରୁ କମ ରୋଜଗାର କରୁଥିବା ବ୍ୟକ୍ତିଙ୍କ ସହିତ କେବେ ବି ସନ୍ତୁଷ୍ଟ ହେବେ ନାହିଁ। ତଥାପି, ଯଦି ଜଣେ ଭଲ ରୋଜଗାର କରୁଥିବା ପୁରୁଷ ବିବାହ କରିବାକୁ ଚାହାଁନ୍ତି, ତେବେ ସେ ତାଙ୍କ ଘରେ ବାସନ ମାଜିଥିବା ଚାକରାଣୀଙ୍କୁ ମଧ୍ୟ ବିବାହ କରିପାରିବେ। ଦେଖନ୍ତୁ ପୁରୁଷମାନେ କେତେ ନମନୀୟ। ଆପଣ ମଧ୍ୟ କିଛି ନମନୀୟତା ଦେଖାଇବା ଉଚିତ। ଏତେ କଠୋର ହୁଅନ୍ତୁ ନାହିଁ।”
