ନୂଆଦିଲ୍ଲୀ, ୨୬।୨: ଗତ ୧୦ ବର୍ଷ ମଧ୍ୟରେ ବିଭିନ୍ନ କୋର୍ଟ ମାମଲାକୁ ଲଢ଼ିବା ପାଇଁ କେନ୍ଦ୍ର ସରକାର ୪୦୦ କୋଟି ଟଙ୍କାରୁ ଊର୍ଦ୍ଧ୍ୱ ଖର୍ଚ୍ଚ କରିଛନ୍ତି। କେନ୍ଦ୍ର ସରକାରଙ୍କ ପକ୍ଷରୁ ଜାରି ଏକ ଅଫିସିଆଲ ଡେଟା ଅନୁଯାୟୀ, ଆର୍ଥିକ ବର୍ଷ ୨୦୧୪-୧୫ରୁ ୨୦୨୩-୨୪ ମଧ୍ୟରେ ବିଭିନ୍ନ କୋର୍ଟ ମାମଲା ପାଇଁ କେନ୍ଦ୍ର ସରକାର ୪୦୯ କୋଟି ଟଙ୍କା ଖର୍ଚ୍ଚ କରିଛନ୍ତି। ଆର୍ଥିକ ବର୍ଷ ୨୦୧୪-୧୫ଠାରୁ କୋର୍ଟ ମାମଲା ପାଇଁ ଖର୍ଚ୍ଚ ହେଉଥିବା ରାଶିରେ ଲଗାତର ଭାବେ ବୃଦ୍ଧି ଘଟୁଛି।
ତେବେ କେବଳ କୋଭିଡ୍ ମହାମାରୀ ସମୟରେ ୨ଟି ଆର୍ଥିକ ବର୍ଷକୁ ଛାଡ଼ିକରି ଅନ୍ୟ ସମସ୍ତ ବର୍ଷ କେନ୍ଦ୍ର ସରକାରଙ୍କ ପକ୍ଷରୁ ବିଭିନ୍ନ କୋର୍ଟ ମାମଲା ପାଇଁ ଖର୍ଚ୍ଚ ହେଉଥିବା ରାଶିରେ ବୃଦ୍ଧି ଘଟିଥିବା ଏହି ଡେଟା ସ୍ପଷ୍ଟ କରିଛି। ଆର୍ଥିକ ବର୍ଷ ୨୦୧୪-୧୫ରେ କେନ୍ଦ୍ର ସରକାର ବିଭିନ୍ନ କୋର୍ଟ ମାମଲା ପାଇଁ ୨୬.୬୪ କୋଟି ଟଙ୍କା ଖର୍ଚ୍ଚ କରିଥିବାବେଳେ ୨୦୧୫-୧୬ରେ ଏହା ବଢ଼ି ୩୭.୪୩ କୋଟି ହୋଇଯାଇଥିଲା। ସେହିପରି ବିଭିନ୍ନ କୋର୍ଟ ମାମଲା ପାଇଁ କେନ୍ଦ୍ର ସରକାର ଆର୍ଥିକ ବର୍ଷ ୨୦୨୨-୨୩ ଏବଂ ୨୦୨୩-୨୪ରେ ଯଥାକ୍ରମେ ୫୭ କୋଟି ଏବଂ ୬୬ କୋଟି ଟଙ୍କା ଖର୍ଚ୍ଚ କରିଛନ୍ତି।
