ନୂଆଦିଲ୍ଲୀ,୧୮।୩: ୨୦୨୬ ମାର୍ଚ୍ଚ ମାସର ସଦ୍ୟତମ ‘ନମ୍ବିଓ’ ରିପୋର୍ଟ ଅନୁଯାୟୀ, ଭାରତରେ ଜୀବନଶୈଳୀ ଏବଂ ସହର ଅନୁସାରେ ରହିବା ଖର୍ଚ୍ଚରେ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ବର୍ତ୍ତମାନର ଆକଳନ ଅନୁସାରେ, ଭାରତରେ ଜଣେ ବ୍ୟକ୍ତିଙ୍କୁ ମାସିକ ପ୍ରାୟ ୨୭,୩୦୦ ଟଙ୍କା ଏବଂ ଚାରିଜଣିଆ ପରିବାର ପାଇଁ ପ୍ରାୟ ୯୮,୦୦୦ ଟଙ୍କା ଖର୍ଚ୍ଚ କରିବାକୁ ପଡ଼ୁଛି, ଯେଉଁଥିରେ ଘରଭଡ଼ା ଅନ୍ତର୍ଭୁକ୍ତ ନାହିଁ।
ଦେଶର ମହାନଗରଗୁଡ଼ିକ ମଧ୍ୟରେ ମୁମ୍ବାଇ ସବୁଠାରୁ ବ୍ୟୟବହୁଳ ସହର ଭାବେ ଉଭା ହୋଇଥିବାବେଳେ ଏଠାରେ ଜଣେ ବ୍ୟକ୍ତିଙ୍କ ମାସିକ ଖର୍ଚ୍ଚ ୩୦,୦୦୦ ରୁ ୬୦,୦୦୦ ଟଙ୍କା ମଧ୍ୟରେ ରହୁଛି। ଅନ୍ୟପଟେ କୋଲକାତା ଏବଂ ଚେନ୍ନାଇ ପରି ସହରଗୁଡ଼ିକ ତୁଳନାତ୍ମକ ଭାବେ ଶସ୍ତା ରହିଛି। ବିଶେଷ କରି ଘରଭଡ଼ା ଏବଂ ପରିବହନ ଖର୍ଚ୍ଚ ଯୋଗୁଁ ମୁମ୍ବାଇ ଓ ଦିଲ୍ଲୀରେ ରହିବା କଷ୍ଟକର ହେଉଥିବାବେଳେ ହାଇଦ୍ରାବାଦ ଏବଂ ପୁଣେ ପରି ସହରଗୁଡ଼ିକରେ ଲୋକଙ୍କ କ୍ରୟ ଶକ୍ତି ଅଧିକ ରହୁଥିବାରୁ ଏହା ରହିବା ପାଇଁ ଉତ୍ତମ ବିକଳ୍ପ ସାଜିଛି।
ସାଧାରଣ ଖର୍ଚ୍ଚକୁ ଦେଖିଲେ, ସହରର ମୁଖ୍ୟାଞ୍ଚଳରେ ଏକ ଭଲ ଘରଭଡ଼ା ପ୍ରାୟ ୧୪,୦୦୦ ଟଙ୍କା ଥିବାବେଳେ ବାହାର ଅଞ୍ଚଳରେ ଏହା ୯,୦୦୦ ଟଙ୍କା ମଧ୍ୟରେ ମିଳୁଛି। ଦୈନନ୍ଦିନ ବ୍ୟବହୃତ ସାମଗ୍ରୀ ଯଥା କ୍ଷୀର ଲିଟର ପିଛା ୬୧ ଟଙ୍କା, ଚାଉଳ କିଲୋ ପ୍ରତି ୫୬ ଟଙ୍କା ଏବଂ ପେଟ୍ରୋଲ ଲିଟର ପିଛା ୧୦୨ ଟଙ୍କା ରହିଛି।
ବିଶେଷ କରି ଦିଲ୍ଲୀ ମେଟ୍ରୋ ବିଶ୍ୱର ଶସ୍ତା ମେଟ୍ରୋ ସେବା ମଧ୍ୟରେ ସ୍ଥାନ ପାଇଥିଲେ ମଧ୍ୟ ସେଠାରେ ବିଜୁଳି ଓ ପାଣି ବିଲ୍ ପ୍ରାୟ ୪,୦୦୦ ଟଙ୍କା ପର୍ଯ୍ୟନ୍ତ ଆସୁଛି। ସମୁଦାୟ ଭାବେ ଦେଖିଲେ, ୨୦୨୬ରେ ଜଣେ ବ୍ୟକ୍ତିଙ୍କ ଖର୍ଚ୍ଚ ସେ ରହୁଥିବା ସହର, ଘରଭଡ଼ା ଏବଂ ବ୍ୟକ୍ତିଗତ ଜୀବନଶୈଳୀ ଉପରେ ସମ୍ପୂର୍ଣ୍ଣ ନିର୍ଭର କରୁଛି।
