ନୂଆଦିଲ୍ଲୀ,୬।୭: କୋଭିଡ୍-୧୯ ଯୋଗୁ ବଜାର ବର୍ତ୍ତମାନ ପ୍ରଭାବିତ ହୋଇ ରହିଛି। ଘରୋଇ ବଜାରର ପ୍ରମୁଖ ୫୦୦ କମ୍ପାନୀ ନେଇଥିବା ୧.୬୭ ଲକ୍ଷ କୋଟିର କର୍ପୋରେଟ ଋଣ ବ୍ୟାଙ୍କଗୁଡିକ ଲାଗି ସମସ୍ୟା ସୃଷ୍ଟି କରିପାରେ। ମାର୍ଚ୍ଚ ୨୦୨୨ ଯାଏ ଏ ନେଇ ବ୍ୟାଙ୍କଗୁଡିକର ଚିନ୍ତା ବଢ଼ିବ ବୋଲି କୁହାଯାଉଛି। ବର୍ତ୍ତମାନ କାରବାର ଠିକ୍ ନ ଥିବା ଯୋଗୁ କମ୍ପାନୀଗୁଡିକ ଋଣ ପଇଠ କରିବାରେ ବିଭିନ୍ନ ସମସ୍ୟା ସାମ୍ନା କରିବେ ବୋଲି ଆଶଙ୍କା କରାଯାଉଛି। ଏହି ଋଣ ଏନ୍ପିଏ ହେବାର ସମ୍ଭାବନା ରହିଛି। ଇଣ୍ଡିଆ ରେଟିଂ ଆଣ୍ଡ ରିସର୍ଚ୍ଚ ପକ୍ଷରୁ ଏ ନେଇ ଏକ ରିପୋର୍ଟ ପ୍ରକାଶ ପାଇଛି। ବର୍ତ୍ତମାନ ସ୍ଥିତି ଯୋଗୁ ଫସିଥିବା ମୋଟ ଋଣ ପରିମାଣ ୪.୨୧ ଲକ୍ଷ କୋଟି ଟଙ୍କାରେ ପହଞ୍ଚିପାରେ। ଏହା ମୋଟ ଋଣର ୧୧% ହେବ। କରୋନା ମାମଲା ବଢୁଥିବାରୁ ବଜାର ଏତେ ଶୀଘ୍ର ଭଲ ସ୍ଥିତିକୁ ଫେରି ନ ପାରେ। ଏଣୁ ବ୍ୟାଙ୍କର ଋଣ ସ୍ଥିତି କ୍ଷତିଗ୍ରସ୍ତ ରହିବ ବୋଲି ଆଶଙ୍କା ପ୍ରକଟ କରାଯାଇଛି।
