କରୋନା ସଂକ୍ରମଣ ବାୟୁ ଦ୍ୱାରା ବ୍ୟାପୁ ନଥିବା କୁହାଯାଉଥିଲା। ହେଲେ ଏବେ ବିଶ୍ୱ ସ୍ବାସ୍ଥ୍ୟ ସଂଗଠନ(ଡବ୍ଲୁଏଚ୍ଓ) କରୋନା ଭାଇରସ୍ ବାୟୁରେ ରହୁଥିବା ସ୍ବିକାର କରିଛି। ଏହା ଜଣାପଡ଼ିବା ପରେ କିଛି ବିଶେଷଜ୍ଞ ଲୋକମାନଙ୍କୁ ଘରର ଏସି ବନ୍ଦ କରିବାକୁ କହିଛନ୍ତି। ଯଦି କେଉଁ ସ୍ଥାନରେ କରୋନା ସଂକ୍ରମିତ ଥିବା ସନ୍ଦେହ ଉପୁଜେ, ସେଠାରେ ଥିବା ଏସିକୁ ବନ୍ଦ କରିଦେବାକୁ କୁହାଯାଇଛି। କାରଣ ଏହା ନ କଲେ ସଂକ୍ରମଣ ବ୍ୟାପିବାର ସମ୍ଭାବନା ରହିଛି।
ବ୍ରିଟିଶ ଟେଲିଗ୍ରାଫରେ ଏକ ରିପୋର୍ଟ ପ୍ରକାଶ ପାଇଛି। ସେଥିରେ କୁହାଯାଇଛି ଏସି ଦୁଇ ପ୍ରକାରର ଥାଏ। ଗୋଟିଏ ଯିଏ ବାହାରର ବାୟୁ ଟାଣିଥାଏ ଏବଂ ଅନ୍ୟଟି ପବନକୁ ଚାରିଆଡକୁ ପହଞ୍ଚାଇଥାଏ। ଏଣୁ ବିଶେଷଜ୍ଞମାନେ କହିଛନ୍ତି ସଂକ୍ରମଣ ଆଶଙ୍କା ହେଲେ ଦ୍ୱିତୀୟ ପ୍ରକାର ଏସିକୁ ବନ୍ଦ କରିଦିଅନ୍ତୁ। ଝରକା ଖୋଲି ଦିଅନ୍ତୁ।
ଲଣ୍ଡନର ଚାର୍ଟାର୍ଡ ଇନ୍ଷ୍ଟିଚ୍ୟୁଟ୍ ଅଫ୍ ବିଲ୍ଡିଂ ସର୍ଭିସ ଇଞ୍ଜିନିୟର୍ସ କହିଛନ୍ତି, ଯେଉଁ ଏସି ବାହାରର ପବନ ଟାଣିଥାଏ ତାହା କୋଠରୀରେ ଭାଇରସ୍ ବିସ୍ତାର କରିପାରେ। ଏଣୁ ରେଷ୍ଟୁରାଣ୍ଟ ଆଦିରେ ସଂକ୍ରମଣ ବଢ଼ିବାର ଆଶଙ୍କା ରହିପାରେ।
ଏହି ବିପଦକୁ କମ୍ କରିବା ଲାଗି ଏସି ଅନ୍ ଥିବା ସମୟରେ ଝରକା ଖୋଲିଦେବା ଏକ ଭଲ ବିକଳ୍ପ। ନଚେତ ଥଣ୍ଡା ପବନରେ ବସିବା ଅଭ୍ୟାସ ବଦଳାଇ ଏସି ବନ୍ଦ କରନ୍ତୁ।
ତେବେ କରୋନା ଭୂତାଣୁ ଅଳ୍ପ ସମୟ ପାଇଁ ବାୟୁରେ ରହିବ। ଏହା ଅଳ୍ପ ଦୂର ଯାଏ ଯାଇପାରିବ ବୋଲି ଗବେଷକମାନେ କହିଛନ୍ତି। ପୂର୍ବରୁ ୨୦୦ରୁ ଅଧିକ ବିଶେଷଜ୍ଞ ଡବ୍ଲୁଏଚ୍ଓକୁ ଚିଠି ଲେଖି ବାୟୁରେ କରୋନାର ଉପସ୍ଥିତି ଯୋଗୁ ସଂଗଠନ ଏହାର ନିର୍ଦ୍ଦେଶାବଳୀ ପରିବର୍ତ୍ତନ କରନ୍ତୁ ବୋଲି କହିଥିଲେ।
