କାମାକ୍ଷାନଗର, ୨।୬(ଡି.ଏନ୍.ଏ.): ତହସିଲ ପ୍ରଶାସନ ପକ୍ଷରୁ ପ୍ରଦାନ କରାଯାଇଥିବା ରସିଦ ବହି (ଓ୍ବାଇ-ଫର୍ମ) ନକଲ କରି ବାଲିଘାଟରୁ ବାଲି ଚାଲାଣ କରିବା ମହଙ୍ଗା ପଡ଼ିଛି। ଏଭଳି ବାଲି ଚାଲାଣ କରୁଥିବା ଦୁଇଟି ଟ୍ରକ୍ (ନଂ. ଓଆର୍ ୦୪ ଇ ୦୦୯୭ ଏବଂ ଓଆର୍ ୧୯ ବି ୧୨୨୮)କୁ ଜବତ କରିଛନ୍ତି କାମାକ୍ଷାନଗର ସହକାରୀ ଜିଲାପାଳ ମଦନମୋହନ ଜେନା। ସମ୍ପୃକ୍ତ ଗାଡ଼ି ମାଲିକଙ୍କ ନିକଟରୁ ୫୦ ହଜାର ଟଙ୍କା ଜରିମାନା ଆଦାୟ କରାଯାଇଛି।
ମିଳିଥିବା ସୂଚନା ଅନୁଯାୟୀ, ଭୁବନ ରାଜସ୍ବ ସର୍କଲର ଜୟପୁର ବାଲିଘାଟକୁ ୨୦୨୦-୨୧ ବର୍ଷ ପାଇଁ ନିଲାମ ନେଇଥିଲେ ମନୋଜ କୁମାର ପୋଥାଳ। ଉକ୍ତ ଘାଟରୁ ବେଆଇନ ଭାବେ ବାଲି ଚାଲାଣ ହେଉଥିବା ସୂଚନା ମିଳିବା ପରେ ବୁଧବାର ପୂର୍ବାହ୍ନ ପ୍ରାୟ ସାଢ଼େ ୯ଟାରେ ଭୁବନ ପୋଲିସ ସହାୟତାରେ ସହକାରୀ ଜିଲାପାଳ ଚଢ଼ାଉ କରିଥିଲେ। ବାଲିଘାଟରୁ ବାଲି ପରିବହନ ପାଇଁ ତହସିଲ ପକ୍ଷରୁ ରସିଦ୍ ବହି (ଓ୍ବାଇ ଫର୍ମ) ପ୍ରଦାନ କରାଯାଇଥାଏ। ତଦନୁଯାୟୀ ଗୋଟିଏ ଗାଡ଼ି ଦିନକୁ ଥରେ ବାଲି ପରିବହନ କରିବାକୁ ଅନୁମତି ରହିଛି। ହେଲେ ଓ୍ବାଇ-ଫର୍ମ ରସିଦ୍ର ନକଲ କରି ଗୋଟିଏ ଗାଡ଼ିରେ ଏକାଧିକ ଥର ବାଲିଚାଲାଣ କରାଯାଉଥିବା ତଦନ୍ତ ବେଳେ ଜଣାପଡ଼ିଛି।
ସେହିପରି ଅଁଳାବେରେଣୀରେ ଲିଜ୍ଧାରୀ ଉମାକାନ୍ତ ସାହୁଙ୍କ ପଥର ଖାଦାନରେ ତୁମୁସିଙ୍ଗା ଆର୍ଆଇଙ୍କ ସହଯୋଗରେ ଚଢ଼ାଉ କରି ଏକ ବେଆଇନ ମାଙ୍କଡ଼ା ପଥର ବୋଝେଇ ଟ୍ରାକ୍ଟର ଜବତ କରାଯାଇଛି। ଗାଡ଼ି ମାଲିକଙ୍କ ନିକଟରୁ ୩୦ ହଜାର ଟଙ୍କା ଜରିମାନା ଆଦାୟ କରାଯାଇଛି। ବିଭିନ୍ନ ଲଘୁ ଖଣିଜ ଉତ୍ସରୁ ବେଆଇନ ଭାବେ ଖଣିଜ ପଦାର୍ଥ ଚୋରାଚାଲାଣ ହେଉଛି। ଏଭଳି କାର୍ଯ୍ୟରେ ଲିପ୍ତଥିବା ବ୍ୟବସାୟୀଙ୍କଠାରୁ ଆଇନ ଅନୁଯାୟୀ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସହକାରୀ ଜିଲାପାଳ ସତର୍କ କରାଇଛନ୍ତି। ଚଢ଼ାଉରେ ଗଡ଼ନୃସିଂହପ୍ରସାଦ, ଭୁବନ ରାଜସ୍ବ ନିରୀକ୍ଷକଙ୍କ ସମେତ ତୁମୁସିଙ୍ଗା ଏବଂ ଭୁବନ ପୋଲିସ ସହାୟତା କରିଥିଲେ।
