ଗଞ୍ଜାମ,୭ା୫(ବିଦ୍ୟାଧର ସାହୁ): ଦୁଇ ସପ୍ତାହ ଧରି ପଞ୍ଚାୟତ ଜନପ୍ରତିନିଧି ଓ ପଞ୍ଚୁଦୋଳ ଯାତ୍ରା ପରିଚାଳନା କମିଟି ମଧ୍ୟରେ ଲାଗି ରହିଥିବା ବିବାଦ ବୁଧବାର ସମାଧାନ ହୋଇଛି। ଏସିଆ ମହାଦେଶର ସର୍ବ ବୃହତ ପ୍ରସିଦ୍ଧ ହୁମା ଶୁଖୁଆ ହାଟ ମତ୍ସ୍ୟ ବିଭାଗ ଅଧୀନକୁ ଚାଲିଯିବା ନେଇ ବିଜ୍ଞପ୍ତି ପ୍ରକାଶ ଏବଂ ସରକାର ପଟ୍ଟା ହେବା ପରେ ବିବାଦ ଉପୁଜିଥିଲା। ଏହି ବିବାଦରେ ପୂର୍ଣ୍ଣଚ୍ଛେଦ ପଡ଼ିଥିବା ଜଣାପଡ଼ିଛି l ଏନେଇ ବୁଧବାର ପୂର୍ବାହ୍ନରେ ହାଟପଡ଼ିଆଠାରେ ଜିଲା ଉଚ୍ଚ ପ୍ରଶାସନର ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଉପଜିଲାପାଳ ଦେବାଶିଷ ବରାଳ, ମତ୍ସ୍ୟ ବିଭାଗ ଡେପୁଟି ଡାଇରେକ୍ଟର ସୁରେଶ ଚନ୍ଦ୍ର ବେହେରା, ବିଡିଓ ଅଚ୍ୟୁତାନନ୍ଦ ଯାନୀ, ତହସିଲଦାର ସୁକାନ୍ତ ଚନ୍ଦ୍ର ମିଶ୍ର, ଜିଲା ମତ୍ସ୍ୟ ଅଧିକାରୀ ବିଭୂତି ଭୂଷଣ ଶାହ, ଅତିରିକ୍ତ ମତ୍ସ୍ୟ ଅଧିକାରୀ ସୁବ୍ରତ କୁମାର ପଟ୍ଟନାୟକ, ଅତିରିକ୍ତ ମତ୍ସ୍ୟ ଅଧିକାରୀ ବିଭୂ ପ୍ରସାଦ ସ୍ବାଇଁ, ହୁମା ଫାଣ୍ଡି ଅଧିକାରୀ ଶୁଭ୍ରଜିତ ସାମନ୍ତରାୟ, ହୁମା ସମିତି ସଭ୍ୟ ଧ୍ରୁବ ଚରଣ ପଲାଇ, ପଞ୍ଚୁଦୋଳ ଯାତ୍ରା ପରିଚାଳନା କମିଟି ସଭାପତି ସନ୍ତୋଷ କୁମାର ସାହୁ, ସଂସ୍କୃତିକ ସମ୍ପାଦକ ଯୋଗେଶ ଚନ୍ଦ୍ର ସାହୁ, ସାଧାରଣ ସମ୍ପାଦକ ରାମା ରାଓ ରେଡ୍ଡୀଙ୍କ ସମେତ ଅନ୍ୟାନ୍ୟ କର୍ମକର୍ତ୍ତା, ୮ ଖଣ୍ଡ ଗ୍ରାମର ଭଦ୍ର ବ୍ୟକ୍ତି ଓ ଶୁଖୁଆ ବ୍ୟବସାୟୀ ପ୍ରମୁଖ ଉପସ୍ଥିତ ଥିଲେ।
ହାଟପଡ଼ିଆ ପଟ୍ଟା ଚଞ୍ଚକତାରେ ହୋଇଥିବା ଅଭିଯୋଗକୁ ଖଣ୍ଡନ କରିଥିଲେ ଉପଜିଲାପାଳ। ଏହି ପ୍ରକ୍ରିୟା ଗତ ଦଶ ବର୍ଷ ପୂର୍ବରୁ ଆରମ୍ଭ ହୋଇଥିବା ଏବଂ ଉନ୍ନତିକରଣ ପାଇଁ ମତ୍ସ୍ୟ ବିଭାଗ ଦାୟିତ୍ୱ ନେଇଥିବା ଉପଜିଲାପାଳ ସୂଚନା ଦେଇଥିଲେ। ଏହି ହାଟର ଉନ୍ନତିକରଣ ନିମନ୍ତେ ଏକ କମିଟି ଗଠନ ହେବ। ପ୍ରଥମ ଥର ପାଇଁ ହୁମା ହାଟର ଟେଣ୍ଡର ପ୍ରକ୍ରିୟା ଡାକ ନହୋଇ ବାକ୍ସରେ ଜଉମୁଦ ପ୍ରକ୍ରିୟାରେ ଟେଣ୍ଡର କରାଯିବା ନେଇ ଆଲୋଚନା ହୋଇଥିଲା। ଆଦାୟ ଅର୍ଥର ପଚାଶ ପ୍ରତିଶତ ଅର୍ଥ ପଞ୍ଚାୟତ ଉନ୍ନତିକରଣରେ ଖର୍ଚ୍ଚ ହେବ। ହାଟ ଗୃହର ସଫେଇ, ମରାମତି ଓ ବିଦ୍ୟୁତ ବିଲ୍ ଆଦି ସୋସାଇଟି କମିଟି ନିୟମ ଅନୁସାରେ ଉକ୍ତ ଅର୍ଥ ଖର୍ଚ୍ଚ କରାଯିବ ବୋଲି ଉପଜିଲାପାଳ ସୂଚନା ଦେଇଛନ୍ତି। ମତ୍ସ୍ୟ ବିଭାଗ ଅଧୀନରେ ହାଟ ରହିଲେ ମଧ୍ୟ ପଞ୍ଚୁଦୋଳ ଯାତ୍ରା ପ୍ରଭାବିତ ହେବ ନାହିଁ ବୋଲି ଉପଜିଲାପାଳ କହିଥିଲେ। ଉକ୍ତ ପଡ଼ିଆରେ ରାତ୍ର ରହଣି ପାଇଁ ୪ଟି ନୂଆ ବିଲଡିଂ, ଶୌଚାଳୟ ନିର୍ମାଣ କରାଯିବ ଏବଂ ହୋଲସେଲ ମାର୍କେଟ ସହ ରିଟେଲର ମାର୍କେଟ ବ୍ୟବସ୍ଥା କରାଯିବ ବୋଲି ମତ୍ସ୍ୟ ବିଭାଗ ପକ୍ଷରୁ କୁହାଯାଇଛି।
