ପାରାଦୀପ,୧୧ା୭(ସ୍ବ.ପ୍ର.): ପାରାଦୀପ ବନ୍ଦରରେ ଶନିବାର ପ୍ରଥମ କରି କଣ୍ଟେନର ଆମଦାନୀ-ରପ୍ତାନି ଆରମ୍ଭ ହୋଇଛି। ସାରେ ବନ୍ଦରର ପିଆଇସିଟି (ପାରାଦୀପ ଇଣ୍ଟରନ୍ୟାଶନାଲ କାର୍ଗୋ ଟର୍ମିନାଲ)ବର୍ଥରେ କଣ୍ଟେନର ବୋଝେଇ ଜାହାଜ ଲାଗିଛି। ମାଲେସିଆର ପୋର୍ଟକ୍ଲାଙ୍ଗ ବନ୍ଦରରୁ ଏମ୍ଭି ଦାମୁଭୂମ ନାମକ ଜାହାଜରେ ୧୫୦ ଖାଲି କଣ୍ଟେନର ଆସିଛି। ଏହା ଖଲାସ ହେବାପରେ ୨୩ଟି ମାଲ୍ ବୋଝେଇ କଣ୍ଟେନର ମାଲେସିଆକୁ ଯିବ। ସେଠାରୁ ୟୁରୋପ ଦେଶକୁ ଯିବ ବୋଲି ବନ୍ଦର ଅଧ୍ୟକ୍ଷ ରିଙ୍କେଶ ରାୟ ଉଦ୍ଘାଟନୀ ଅବସରରେ ସୂଚନା ଦେଇଛନ୍ତି। ପାରାଦୀପ ତୈଳ ବିଶୋଧନାଗାରର ପ୍ରଲିପ୍ରପଲିନ ୟୁନିଟରୁ ଉତ୍ପାଦିତ ପଲିମର ଏଥିରେ ରପ୍ତାନି ହେବ ବୋଲି କୁହାଯାଇଛି। ପୂର୍ବରୁ ଏଭଳି ସୁବିଧା ପାରାଦୀପ ବନ୍ଦରରେ ଉପଲବ୍ଧ ନ ଥିଲା। କଣ୍ଟେନର ଜାହାଜ ଅନ୍ୟ ବନ୍ଦରରେ ଲାଗେ। ସେଠାରୁ ଆନ୍ତଃବନ୍ଦର ପରିବହନ ବ୍ୟବସ୍ଥାରେ ପାରାଦୀପକୁ ଆସେ। ଏବେ ସିଧାସଳଖ ପାରାଦୀପକୁ ଆସିବ। ଏହାଦ୍ବାରା କ୍ଷୁଦ୍ର ଉଦ୍ୟୋଗୀ କମ ଖର୍ଚ୍ଚରେ ଉତ୍ପାଦନ କରିପାରିବେ ବୋଲି ଅଧ୍ୟକ୍ଷ ରାୟ କହିଛନ୍ତି। ଏହି ଉଦ୍ଘାଟନୀ ଉତ୍ସବରେ ଅନ୍ୟମାନଙ୍କ ମଧ୍ୟରେ ଉପାଧ୍ୟକ୍ଷ ଏ.କେ. ବୋଷ, ପିଆଇସିଟି ଶାଖା ମୁଖ୍ୟ କ୍ୟାପଟେନ ସତ୍ୟବ୍ରତ ଶତପଥୀ ପ୍ରମୁଖ ଉପସ୍ଥିତ ଥିଲେ। ସୂଚନାଯୋଗ୍ୟ, ଚଳିତ ମାସରେ ପାରାଦୀପ ବନ୍ଦର ୨୫.୭୩ ମିଲିୟନ ଟନ ପଣ୍ୟ କାରବାର କରି ଦେଶର ବୃହତ୍ ବନ୍ଦର କ୍ଷେତ୍ରରେ ପ୍ରଥମ ସ୍ଥାନ ଅଧିକାର କରିଛି।
