ଧାମନଗର,୧୮।୧୦(ସ୍ବ.ପ୍ର.): ଉପନିର୍ବାଚନ ପାଇଁ ଧାମନଗର ରାଜନୀତି ସରଗରମ ହୋଇଛି। ନିଜ ସପକ୍ଷରେ ଜନମତ ହାତେଇବା ଲାଗି ଭାଜପା, ବିଜେଡି ଓ କଂଗ୍ରେସ ଜୋରଦାର ଉଦ୍ୟମ ଆରମ୍ଭ କରିଛନ୍ତି। ଘନ ଘନ ବୈଠକ, ସମ୍ମିଳନୀ ଆଦି କରାଯାଇ ନିର୍ବାଚନରେ ଦଳୀୟ ପ୍ରାର୍ଥୀଙ୍କୁ ଜିତାଇବା ନେଇ କର୍ମୀମାନଙ୍କୁ ପରାମର୍ଶ ଦିଆଯାଉଛି। ଏହି ପରିପ୍ରେକ୍ଷୀରେ ଧାମନଗର ବ୍ଲକ ୧୨ ନଂ. ଜୋନ୍ର ଅସୁରାଳି ବଜାର ନିକଟସ୍ଥ ଏକ ସ’ମିଲଠାରେ ସୋମବାର ପୂର୍ବାହ୍ନରେ କଂଗ୍ରେସ ପକ୍ଷରୁ ଜୋନସ୍ତରୀୟ ସାଙ୍ଗଠନିକ ବୈଠକ କରାଯାଇଛି। ରବୀନ୍ଦ୍ର ପରିଡ଼ାଙ୍କ ସଭାପତିତ୍ୱରେ ଆୟୋଜିତ ଏହି ବୈଠକରେ କଂଗ୍ରେସ ପ୍ରାର୍ଥୀ ହରେକୃଷ୍ଣ ସେଠୀଙ୍କ ସହ ବ୍ଲକ ସଭାପତି ପ୍ରସନ୍ନ କୁମାର ଧଳ, ଜୋନ୍ ସଭାପତି ନିମାଇଁ ଚରଣ ଯେନା, ଜିଲା କଂଗ୍ରେସ କମିଟି ସଦସ୍ୟ ଅରବିନ୍ଦ ନାୟକ, ଅସୁରାଳି ପଞ୍ଚାୟତ ସଭାପତି ସୁଧୀର ଖଟୁଆ, ଶ୍ରୀକାନ୍ତ କୁମାର ପଣ୍ଡା, ଆଲୋକ ସ୍ବାଇଁ ପ୍ରମୁଖ ଯୋଗ ଦେଇଥିଲେ। ଏହି ଉପନିର୍ବାଚନ ପାଇଁ ଦଳକୁ କିପରି ସୁଦୃଢ଼ କରାଯାଇ ନିର୍ବାଚନୀ ବୈତରଣୀ ପାର୍ ହେବା ଏବଂ ପଞ୍ଚାୟତ ସ୍ତରରେ ପ୍ରତ୍ୟେକ ୱାର୍ଡକୁ ଯାଇ ଭୋଟରଙ୍କୁ ଆକୃଷ୍ଟ କରିବା ସହ ପ୍ରତିପକ୍ଷ ପ୍ରାର୍ଥୀମାନଙ୍କୁ ପରାଜୟର ସ୍ବାଦ ଦେବା ପାଇଁ ରଣକୌଶଳ ଉପରେ ବୈଠକରେ ଗୁରୁତ୍ୱ ଦିଆଯାଇଛି। ଜିଲା କଂଗ୍ରେସ କମିଟି ପକ୍ଷରୁ ନିଯୁକ୍ତ କରାଯାଇଥିବା ଅସୁରାଳି ଜୋନ୍ର ପର୍ଯ୍ୟବେକ୍ଷକ ସୁଧାଂଶୁ ଶେଖର ନାୟକ ଓ ଆଶୁତୋଷ ପରିଡ଼ା ବୈଠକରେ ଉପସ୍ଥିତ ଥିଲେ। ୮ ପଞ୍ଚାୟତରୁ ବହୁ ଦଳୀୟ କର୍ମୀ ଏଥିରେ ସାମିଲ ଥିଲେ।
