ନୂଆଦିଲ୍ଲୀ,୧।୯: ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋର କଂଗ୍ରେସରେ ଯୋଗଦେବାର ସମ୍ଭାବନା ବଢିଛି। ଆଶା କରାଯାଉଛି ଯେ ଖୁବ ଶୀଘ୍ର ସେ କଂଗ୍ରେସ ଦଳରେ ଯୋଗ ଦେବେ। କିନ୍ତୁ ଇତି ମଧ୍ୟରେ ଦଳର କିଛି ନେତା ପ୍ରଶାନ୍ତ କିଶୋରଙ୍କୁ କଂଗ୍ରେସରେ ସାମିଲ କରିବାକୁ ଦୃଢ ବିରୋଧ କରୁଛନ୍ତି। ଜନ୍ମାଷ୍ଟମୀ ଦିନ କପିଲ ସିବଲଙ୍କ ଘରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। କଂଗ୍ରେସର ଜି -୨୩ ଗୋଷ୍ଠୀର ନେତାମାନେ ଏହି ସଭାରେ ଯୋଗ ଦେଇଥିଲେ। ଏହି ନେତାମାନଙ୍କ ମଧ୍ୟରୁ ଅଧିକାଂଶ ପ୍ରଶାନ୍ତ କିଶୋରଙ୍କୁ କଂଗ୍ରେସରେ ସାମିଲ କରିବା ସପକ୍ଷରେ ନାହାଁନ୍ତି। ଏହି ସମସ୍ତ ନେତାମାନେ ଖୋଲାଖୋଲି ଭାବେ ପ୍ରଶାନ୍ତ କିଶୋରଙ୍କୁ ବିରୋଧ କରିପାରନ୍ତି। ତେବେ ପ୍ରଶାନ୍ତ କିଶୋରଙ୍କ ସମର୍ଥନରେ କିଛି ନେତା ମଧ୍ୟ ଉପସ୍ଥିତ ହୋଇଥିଲେ।
ସୂଚନାନୁସାରେ, ବୈଠକରେ କିଛି ନେତା ଏହାକୁ ବିରୋଧ କରି କହିଥିଲେ ଯେ କଂଗ୍ରେସ ହେଉଛି ଏକ ୧୩୫ ବର୍ଷ ପୁରୁଣା ଅନୁଷ୍ଠାନ ଏବଂ ଏହା ଏକ ଷ୍ଟାର୍ଟ ଅପ ନୁହେଁ। ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ, ତାମିଲନାଡୁର ମୁଖ୍ୟମନ୍ତ୍ରୀ ଏମ। ଷ୍ଟାଲିନ କିମ୍ବା ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଓ୍ବାଇ.ଏସ. ଜଗନ ମୋହନ ରେଡ୍ଡୀଙ୍କ ବିନା ପ୍ରଶାନ୍ତଙ୍କର ରଣନୀତି କାମ କରିବ ନାହିଁ। ୨୦୧୭ ଉତ୍ତରପ୍ରଦେଶ ବିଧାନସଭା ନିର୍ବାଚନରେ ସେ କଂଗ୍ରେସ-ଏସପି ମିଳିତ ମଞ୍ଚରେ କାର୍ଯ୍ୟ କରୁଥିବାବେଳେ ଆମେ ତାଙ୍କର କାର୍ଯ୍ୟକାରିତା ଦେଖିଛୁ। ସେ ଆହୁରି ମଧ୍ୟ କହିଛନ୍ତି ଯେ ପ୍ରଶାନ୍ତ କିଶୋରଙ୍କୁ ଦଳରେ ଅନ୍ତର୍ଭୁକ୍ତ କରିବା ପାଇଁ କୌଣସି ପ୍ରସ୍ତାବ କଂଗ୍ରେସ ୱାର୍କିଂ ଗ୍ରୁପ ବୈଠକରେ ଆଲୋଚନା ହେବା ଉଚିତ।
ଜି -୨୩ ନେତା କପିଲ ସିବଲଙ୍କ ଘରେ ସାକ୍ଷାତ କରି ପ୍ରଶାନ୍ତ କିଶୋରଙ୍କୁ ସାଧାରଣ ସମ୍ପାଦକ ଭାବରେ ନିଯୁକ୍ତ କରିବାକୁ ଦଳର ନିଷ୍ପତ୍ତି ଉପରେ ଆଲୋଚନା କରିଥିଲେ। କପିଲ ସିବଲଙ୍କ ବ୍ୟତୀତ ଗୁଲାମ ନବୀ ଆଜାଦ, ଆନନ୍ଦ ଶର୍ମା, ଶଶି ଥରୁର, ମନୀଷ ତେୱାରୀ, ଭୁପିନ୍ଦର ସିଂ ହୁଡାଙ୍କ ସହ ଅନେକ ନେତା ଉପସ୍ଥିତ ଥିଲେ। କଂଗ୍ରେସର ବରିଷ୍ଠ ନେତା ଏ.କେ ଆଣ୍ଟୋନି ଏବଂ ଅମ୍ବିକା ସୋନିଙ୍କୁ ପ୍ରଶାନ୍ତ କିଶୋରଙ୍କ ଉପରେ ଦଳର ନେତାଙ୍କ ମତକୁ ଆଧାର କରି ଏକ ରିପୋର୍ଟ ପ୍ରସ୍ତୁତ କରିବାକୁ କୁହାଯାଇଛି।
