ନୂଆଦିଲ୍ଲୀ,୨୭।୨: କଂଗ୍ରେସ ନେତା ରାହୁଲ ଗାନ୍ଧୀ ଏଥର ଲୋକ ସଭା ନିର୍ବାଚନରେ କେରଳକୁ ଅଲବିଦା କହିପାରନ୍ତି। କେରଳରେ ଏଲଡିଏଫ ରାହୁଲ ଗାନ୍ଧୀଙ୍କ ୱାୟନାଡ ଆସନ ସହିତ ଶଶି ଥରୁରଙ୍କ ଥିରୁଭାନନ୍ତପୁରମ ଆସନରୁ ପ୍ରାର୍ଥୀ ଘୋଷଣା କରିଛି। ଏଭଳି ପରିସ୍ଥିତିରେ ରାହୁଲ ଗାନ୍ଧୀ ଏଥର ୱାୟନାଡ ଆସନରୁ ନିର୍ବାଚନ ଲଢିବେ ନାହିଁ ବୋଲି ବିଶ୍ୱାସ କରାଯାଉଛି। ପୂର୍ବରୁ ରାହୁଲ ୱାୟନାଡରୁ ନିର୍ବାଚନ ଲଢିବେନି ବୋଲି ଖବର ଆସିଥିଲା। ଏକ ଗଣମାଧ୍ୟମ ରିପୋର୍ଟରେ କୁହାଯାଇଛି ଯେ ଏଥର ରାହୁଲ ଗାନ୍ଧୀ ତେଲଙ୍ଗାନା ସହିତ ୟୁପିର ରାଏବରେଲି କିମ୍ବା ଆମେଠିରୁ ନିର୍ବାଚନ ଲଢିପାରନ୍ତି । ତେବେ ଏହି ପ୍ରସଙ୍ଗରେ କଂଗ୍ରେସ ଏ ପର୍ଯ୍ୟନ୍ତ ସ୍ପଷ୍ଟ କରିନାହିଁ। ରାହୁଲ ଗାନ୍ଧୀ ମଧ୍ୟ ଆମେଠିରେ ସ୍ମୃତି ଇରାନୀଙ୍କ ବିରୋଧରେ ପ୍ରତିଦ୍ୱନ୍ଦ୍ୱିତା ପ୍ରସଙ୍ଗରେ କିଛି କହି ନାହାଁନ୍ତି।
