ନୂଆଦିଲ୍ଲୀ,୧।୪ : କେନ୍ଦ୍ର ପରିବେଶ ମନ୍ତ୍ରୀ ଭୁପେନ୍ଦ୍ର ଯାଦବ ଶନିବାର କଂଗ୍ରେସକୁ କଡ଼ା ସମାଲୋଚନା କରି କହିଛନ୍ତି ସେମାନେ ସମସ୍ତ ଗଣତାନ୍ତ୍ରିକ ଅନୁଷ୍ଠାନ ଏବଂ ପ୍ରକ୍ରିୟା ଉପରେ ଲୋକଙ୍କ ମଧ୍ୟରେ ସନ୍ଦେହ ସୃଷ୍ଟି କରୁଛନ୍ତି। କଂଗ୍ରେସ ଏକ ଘୃଣ୍ୟ ପ୍ରକଳ୍ପରେ ଜଡିତ ଅଛି। ଜଙ୍ଗଲ ସଂଶୋଧନ ବିଲ ୨୦୨୩କୁ ଏକ କମିଟିକୁ ପଠାଇବା ନିଷ୍ପତ୍ତିକୁ କଂଗ୍ରେସ ବିରୋଧ କରିଥିଲା। ପରିବେଶ ମନ୍ତ୍ରୀ ଏକ ଭିଡିଓ ମଧ୍ୟ ଟୁଇଟ କରିଛନ୍ତି। ଯେଉଁଥିରେ ସେ ଦାବି କରିଛନ୍ତି କଂଗ୍ରେସ ଶାସନ କାଳରେ ମଧ୍ୟ କେତେକ ବିଲକୁ ମିଳିତ କମିଟି ନିକଟକୁ ପଠାଯାଇଛି।
ଯାଦବ ଟୁଇଟ କରି କହିଛନ୍ତି ଜୟରାମ ରମେଶ କହିଥିଲେ ଯେ ଜଙ୍ଗଲ ସଂରକ୍ଷଣ ସଂଶୋଧନ ବିଲକୁ ଏକ ମିଳିତ କମିଟିକୁ ପଠାଇବା ହେଉଛି ପ୍ରକ୍ରିୟାଗୁଡ଼ିକର ଅପମାନ ଏବଂ ଅବମୂଲ୍ୟାୟନ। ଲୋକସଭା ଓ ରାଜ୍ୟସଭାରେ କଂଗ୍ରେସ ଦ୍ୱାରା ଉପସ୍ଥାପିତ ହୋଇଥିବା କେତେକ ବିଲ ମଧ୍ୟ ମିଳିତ କମିଟିକୁ ପଠାଯାଇଛି।
କଂଗ୍ରେସ ସମସ୍ତ ଗଣତାନ୍ତ୍ରିକ ଅନୁଷ୍ଠାନ ଏବଂ ଗଣତାନ୍ତ୍ରିକ ପ୍ରକ୍ରିୟା ବିଷୟରେ ଲୋକଙ୍କ ମନରେ ସନ୍ଦେହ ସୃଷ୍ଟି କରୁଛି। ସେମାନେ କେବଳ ଭାରତରେ ନୁହେଁ ବିଦେଶୀ ମାଟିରେ ମଧ୍ୟ ଦେଶକୁ ବଦନାମ କରୁଛନ୍ତି। ଏହା ବିପଜ୍ଜନକ ଅଟେ । ଏହାକୁ ବନ୍ଦ କରିବା ଉଚିତ। ଗତ ମାସରେ କେମ୍ବ୍ରିଜ ବିଶ୍ୱବିଦ୍ୟାଳୟରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ବିବୃତ୍ତି ଏକ ବିବାଦ ସୃଷ୍ଟି କରିଛି। ଏହି ଧାରା ବନ୍ଦ ହେଲେ ଦେଶର ମଙ୍ଗଳ ହେବ ବୋଲି ଯାଦବ କହିଛନ୍ତି।
