ରାୟପୁର,୨୬।୨ : ରାୟପୁରରେ ୮୫ ତମ କଂଗ୍ରେସ ସମ୍ମିଳନୀର ଏକ ବିଜ୍ଞାପନ ନେଇ ବିବାଦ ସୃଷ୍ଟି ହୋଇଛି। ପାର୍ଟିର ଏହି ବିଜ୍ଞାପନ ସୋସିଆଲ ମିଡିଆରେ ଭାଇରାଲ ହେଉଛି ତାହା ଉପରେ ଅନେକ ଆଲୋଚନା ହେଉଛି। ଏହି ବିଜ୍ଞାପନରେ ଦେଶର ସ୍ବାଧୀନତା ସମୟରେ କଂଗ୍ରେସର ଅଧ୍ୟକ୍ଷ ଥିବା ମୌଲାନା ଅବୁଲ କଲାମ ଆଜାଦଙ୍କ ଫଟୋ ନାହିଁ।
ତେବେ ଏହି ବିଜ୍ଞାପନରେ ମହାତ୍ମା ଗାନ୍ଧୀ, ଜବାହରଲାଲ ନେହେରୁ, ଭୀମରାଓ ଆମ୍ବେଡକର, ସୁଭାଷ ଚନ୍ଦ୍ର ବୋଷ, ସର୍ଦ୍ଦାର ବଲ୍ଲଭଭାଇ ପଟେଲ, ସରୋଜିନୀ ନାଇଡୁ, ଲାଲ ବାହାଦୂର ଶାସ୍ତ୍ରୀ, ଇନ୍ଦିରା ଗାନ୍ଧୀ, ରାଜୀବ ଗାନ୍ଧୀ ଏବଂ ପି.ଭି ନରସିଂହ ରାଓଙ୍କ ଫଟୋ ରହିଛି।
ଏଥି ସହିତ କଂଗ୍ରେସ ଏହି ବିଜ୍ଞାପନକୁ ଗମ୍ଭୀରତାର ସହ ନେଇଛି। ଦଳର ମହାସଚିବ ଜୟରାମ ରମେଶ ତାଙ୍କ ଟୁଇଟରେ ଲେଖିଛନ୍ତି, ଆଜି କଂଗ୍ରେସ ଦ୍ୱାରା ପ୍ରକାଶିତ ଏକ ବିଜ୍ଞାପନରେ ମୌଲାନା ଆଜାଦଙ୍କ ଫଟୋ ନାହିଁ। ଏହା ଏକ କ୍ଷମା ଯୋଗ୍ୟ ଭୁଲ ନୁହେଁ। ଏନେଇ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଆମେ ଏନେଇ ହୃଦୟରୁ କ୍ଷମା ପ୍ରାର୍ଥନା କରୁଛୁ। ମୌଲାନା ଆମ ତଥା ସମଗ୍ର ଭାରତ ପାଇଁ ଏକ ପ୍ରତୀକାତ୍ମକ ଏବଂ ପ୍ରେରଣାଦାୟକ ବ୍ୟକ୍ତିତ୍ୱ ହୋଇ ରହିବେ ।
ଜଣେ ୟୁଜର୍ ୱାସିମ ଆକ୍ରାମ ତ୍ୟାଗି ଏହି ବିଜ୍ଞାପନକୁ ତାଙ୍କ ଟୁଇଟରେ ପୋଷ୍ଟ କରିଥିଲେ। ଏହା ସହିତ ସେ ଲେଖିଛନ୍ତି, ରାହୁଲ, ଆପଣ ମୌଲାନା ଆଜାଦଙ୍କ ବିନା ୧୩୭ ବର୍ଷର କଂଗ୍ରେସ ଯାତ୍ରା ସମାପ୍ତ କରିଛନ୍ତି କି? ମୌଲାନା ଆଜାଦ କଂଗ୍ରେସର ପ୍ରଥମ ଅଧ୍ୟକ୍ଷ ଥିଲେ। କଂଗ୍ରେସକୁ ନିଜର ରକ୍ତରେ ଛିଞ୍ଚି ଥିଲେ ଏବଂ ରାହୁଲ ଗାନ୍ଧୀ ଆପଣ ଭାବୁଛନ୍ତି କି ମୌଲାନାଙ୍କ ବିଷୟରେ ଉଲ୍ଲେଖ ନକରି ଆପଣ ୨୦୨୪ରେ କ୍ଷମତାକୁ ଆସିବେ?
ସେ ଆହୁରି ମଧ୍ୟ କହିଛନ୍ତି, ଅସଂଖ୍ୟ ନାମ ଅଛି ଯେଉଁମାନେ କଂଗ୍ରେସ ଗଠନ କରିଥିଲେ। କିନ୍ତୁ ଆଜି କଂଗ୍ରେସ ସମସ୍ତଙ୍କୁ ଭୁଲି ଯାଇଛନ୍ତି। କଂଗ୍ରେସ ଦ୍ୱାରା ପ୍ରକାଶିତ ବିଜ୍ଞାପନରେ ଜଣେ ବି ମୁସଲମାନ ନାହାଁନ୍ତି। ୧୩୭ ବର୍ଷର ଯାତ୍ରା ସମୟରେ କଂଗ୍ରେସର ଆଠଜଣ ଅଧ୍ୟକ୍ଷ ମୁସଲମାନ ଥିଲେ।
