ବ୍ରହ୍ମପୁର ଅଫିସ୍,୧୩।୫: ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା (ବିଏସ୍କେୱାଇ)ରେ ମାଗଣା ସ୍ବାସ୍ଥ୍ୟଗତ ଚିକିତ୍ସା ସେବା ପାଇବା ନିମନ୍ତେ ଅନୁମୋଦନ ପ୍ରଦାନ କରିବା ଦାୟିତ୍ୱରେ ଥିବା ଅଧିକାରୀଙ୍କ ଦାୟିତ୍ୱହୀନତା ଓ ଅବହେଳା ଯୋଗୁଁ ସହରରେ ବିଭିନ୍ନ ରୋଗୀ ସମସ୍ୟାର ସମ୍ମୁଖୀନ ହେଉଥିବା ସହରତଳି ଅଞ୍ଚଳ ମିଳିତ କ୍ରିୟାନୁଷ୍ଠାନ କମିଟି ଅଭିଯୋଗ କରିଛି। ଏ ନେଇ କମିଟି ପକ୍ଷରୁ ଶୁକ୍ରବାର ବ୍ରହ୍ମପୁର ଉପଜିଲାପାଳଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। କମିଟି ପକ୍ଷରୁ କୁହାଯାଇଛି ଯେ, ରାଜ୍ୟ ସରକାର ଦରିଦ୍ର ଓ ଆର୍ଥିକ ଅନଗ୍ରସର ଶ୍ରେଣୀର ଲୋକଙ୍କୁ ଉତ୍ତମ ସ୍ବାସ୍ଥ୍ୟ ଏବଂ ଚିକିତ୍ସା ସେବା ସୁବିଧା ଯୋଗାଇ ଦେବା ନିମନ୍ତେ ବିଭିନ୍ନ ଯୋଜନା ପ୍ରଣୟନ କରିଛନ୍ତି। ନିରାମୟ ଯୋଜନାରେ ମାଗଣା ଔଷଧ ଓ ମମତା ଯୋଜନାଠାରୁ ଆରମ୍ଭ କରି ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା କାର୍ଡ ମାଧ୍ୟମରେ ବିଭିନ୍ନ ଅପରେଶନ, ମାଗଣା ରହିବା ଓ ସ୍ବାସ୍ଥ୍ୟ ସେବା ପାଇବାର ବ୍ୟବସ୍ଥା ରହିଛି। ବିଏସ୍କେୱାଇ କାର୍ଡ ମାଧ୍ୟମରେ ମାଗଣା ସ୍ବାସ୍ଥ୍ୟ ଓ ଚିକିତ୍ସା ସେବା ସୁବିଧା କେବଳ ସରକାରୀ ଡାକ୍ତରଖାନା ନୁହେଁ ବରଂ ସରକାରଙ୍କ ସହ ସହବନ୍ଧିତ କିଛି ଘରୋଇ ଡାକ୍ତରଖାନା ଓ କ୍ଲିନିକରେ ମଧ୍ୟ ଉପଲବ୍ଧ ରହିଛି। କିନ୍ତୁ ଘରୋଇ ଡାକ୍ତରଖାନାରେ କିଛି ରୋଗର ଚିକିତ୍ସା ଓ ଅପରେଶନ ନିମନ୍ତେ ଏଥିପାଇଁ ନିଯୁକ୍ତ କିଛି ଅଧିକାରୀଙ୍କ ଅନୁମୋଦନର ଆବଶ୍ୟକତା ରହିଛି। କାର୍ଡ ମାଧ୍ୟମରେ ଘରୋଇ ଡାକ୍ତରଖାନା ଓ ଚିକିତ୍ସାଳୟରେ ଚିକିତ୍ସା ନିମନ୍ତେ ଅନୁମୋଦନ ଆଣିବା ବାଧ୍ୟତାମୂଳକ ଆବଶ୍ୟକତା ରହିଛି। କିନ୍ତୁ ଅନୁମୋଦନ ଦେବା ନିମନ୍ତେ ଉଦ୍ଦିଷ୍ଟ ଅଧିକାରୀଙ୍କ ଠାରୁ ରୋଗୀଟି ଅନୁମୋଦନ ନେବାକୁ ଗଲା ବେଳେ ସଂପୃକ୍ତ ଅଧିକାରୀମାନେ ଅଧିକାଂଶ ସମୟ ଅନୁପସ୍ଥିତ ରହୁଛନ୍ତି। ଫଳରେ ରୋଗୀ ଓ ତାଙ୍କ ସମ୍ପର୍କୀୟ ଅନେକ ସମୟରେ ହଇରାଣ ହରକତ ହେଉଛନ୍ତି। ଏଥିସହ ଅଧିକାରୀମାନେ ଅନୁମୋଦନ ଦେବାରେ ଟାଳ ଟୁଳ ନୀତି ଆପଣାଇ ପରିଶେଷରେ ବିଭିନ୍ନ ଆଳ ଦେଖାଇ ମନା କରିଦେବାରୁ ସଂପୃକ୍ତ କାର୍ଡରେ ପାଇବାକୁ ଥିବା ସୁବିଧାରୁ ଲୋକଙ୍କୁ ବଞ୍ଚିତ କରୁଥିବା ଅଭିଯୋଗ ହୋଇଛି। ଏଣୁ ଜିଲା ପ୍ରଶାସନ ଏହାର ତଦନ୍ତ କରି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସହର ତଳି ଅଞ୍ଚଳ ମିଳିତ କ୍ରିୟାନୁଷ୍ଠାନ କମିଟି ସଭାପତି ସଞ୍ଜୀବ କୁମାର ପଟ୍ଟନାୟକଙ୍କ ସମେତ ସାଧାରଣ ସମ୍ପାଦକ ଶିବ ପ୍ରସାଦ ମିଶ୍ର, ସଂଗଠନ ସମ୍ପାଦକ ଶ୍ରୀକାନ୍ତ ପଢ଼ିହାରୀ, ସହ ସମ୍ପାଦକ ବି.ଭି ସାଗର, ଉପଦେଷ୍ଟା ଦେବୀ ପ୍ରସାଦ ଦାସ, ଅଜିତ ପଟ୍ଟନାୟକ ଓ କାହୁଚରଣ ପତି ପ୍ରମୁଖ ଉପସ୍ଥିତ ଥିଲେ।
