ନୂଆଦିଲ୍ଲୀ, ୫।୧୦(ଆଇଏଏନ୍ଏସ୍): କେନ୍ଦ୍ର ଗାଇଡ୍ଲାଇନ ଅନୁଯାୟୀ କୋଭିଡ୍-୧୯ରେ ପ୍ରାଣ ହରାଇଥିବା ଲୋକଙ୍କ ପରିବାରକୁ ୫୦ ହଜାର ଟଙ୍କା ଲେଖାଏଁ କ୍ଷତିପୂରଣ ଯୋଗାଇଦେବାକୁ ସୁପ୍ରିମକୋର୍ଟ ସୋମବାର ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ଆବେଦନର ୩୦ ଦିନ ମଧ୍ୟରେ ସହାୟତା ରାଶି ସେମାନଙ୍କ ପାଖରେ ପହଞ୍ଚତ୍ବା ଆବଶ୍ୟକ। କ୍ଷତିପୂରଣ ଯୋଜନାର ଉପଯୁକ୍ତ ପ୍ରଚାର ପ୍ରସାର କରିବା ପାଇଁ ଅଦାଲତ କେନ୍ଦ୍ର ଓ ରାଜ୍ୟ ସରକାରଙ୍କୁ କହିଛନ୍ତି। ତେବେ ମୃତ୍ୟୁ ପ୍ରମାଣପତ୍ରରେ ମୃତ୍ୟୁର କାରଣ କୋଭିଡ୍-୧୯ ଲେଖାଯାଇ ନ ଥିବା ଦର୍ଶାଇ ରାଜ୍ୟ ସରକାର ସହାୟତା ରାଶିକୁ ଅଟକାଇପାରିବେ ନାହିଁ ବୋଲି ଜଷ୍ଟିସ୍ ଏମ୍.ଆର୍. ଶାହାଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ସ୍ପଷ୍ଟ କରିଛନ୍ତି। ମୃତ୍ୟୁ ପ୍ରମାଣପତ୍ରରେ ସଂଶୋଧନ ପାଇଁ ରାଜ୍ୟ ପ୍ରଶାସନ ଆବଶ୍ୟକ ପଦକ୍ଷେପ ନେବାକୁ କୁହାଯାଇଛି। ରାୟ ପ୍ରଦାନ ତାରିଖ ପରେ ଯେଉଁମାନଙ୍କର କୋଭିଡ୍ରେ ମୃତ୍ୟୁ ହେବ ସେମାନଙ୍କୁ ମଧ୍ୟ ଏହି ସହାୟତା ରାଶି ମିଳିବ। ଅଭିଯୋଗ ସମାଧାନ କମିଟି ମୃତ ରୋଗୀଙ୍କ ମେଡିକାଲ ରେକର୍ଡ ଯାଞ୍ଚ କରି ଆବେଦନର ୩୦ ଦିନ ମଧ୍ୟରେ ସମସ୍ୟାର ସମାଧାନ କରିବେ। ମିଳିଥିବା ମୃତ୍ୟୁ ପ୍ରମାଣପତ୍ରରେ ମୃତ୍ୟୁର କାରଣକୁ ନେଇ ପରିବାରର ଆପତ୍ତି ଥିଲେ, ସେମାନେ କମିଟିର ଦ୍ୱାରସ୍ଥ ହୋଇପାରିବେ।
