ଭୁବନେଶ୍ୱର, ୧୨ା୧୦(ଅନୁରାଧା ମହାରଣା): ପ୍ରାୟ ୨ ବର୍ଷର ବ୍ୟବଧାନ ପରେ ଚଳିବର୍ଷ ଅଗଷ୍ଟ ମାସରେ ଦେଶର ଶିଳ୍ପ ଉତ୍ପାଦନ ହ୍ରାସ ପାଇଛି। ଖଣି ଏବଂ ବିଦ୍ୟୁତ୍ କ୍ଷେତ୍ରଗୁଡିକ ଖରାପ ପ୍ରଦର୍ଶନ ସହ ଉତ୍ପାଦନ କ୍ଷେତ୍ରରେ ସ୍ଥିରତା କାରଣରୁ ଅଗଷ୍ଟରେ ଶିଳ୍ପ ଉତ୍ପାଦନ ୦.୧% ହ୍ରାସ ପାଇଛି। ଜାତୀୟ ପରିସଂଖ୍ୟାନ କାର୍ଯ୍ୟାଳୟ (ଏନ୍ଏସ୍ଓ) ଶୁକ୍ରବାର ୨୦୨୪ ଅଗଷ୍ଟର ଏହି ଶିଳ୍ପ ଉତ୍ପାଦନ ତଥ୍ୟ ପ୍ରକାଶ କରିଛି। ତେବେ ୨୦୨୩ ଅଗଷ୍ଟରେ ଶିଳ୍ପ ଉତ୍ପାଦନ ୧୦.୯% ବୃଦ୍ଧି ପାଇଥିଲା।
ଇଣ୍ଡେକ୍ସ ଅଫ୍ ଇଣ୍ଡଷ୍ଟ୍ରିଆଲ ପ୍ରଡକ୍ସନ (ଆଇଆଇପି) ଉପରେ ଆଧାରିତ ଶିଳ୍ପ ଉତ୍ପାଦନ ଅଭିବୃଦ୍ଧି ଜୁଲାଇ ପାଇଁ ୪.୭ ପ୍ରତିଶତକୁ ସଂଶୋଧିତ ହୋଇଛି। ପୂର୍ବରୁ ଏହା ୪.୮% ହେବ ବୋଲି ଆକଳନ କରାଯାଇଥିଲା। ଚଳିତ ଆର୍ଥିକ ବର୍ଷର ପ୍ରଥମ ୫ ମାସ (ଏପ୍ରିଲ-ଅଗଷ୍ଟ)ରେ ଶିଳ୍ପ ଉତ୍ପାଦନ ୪.୨ ପ୍ରତିଶତ ବୃଦ୍ଧି ପାଇଛି। ପୂର୍ବ ଆର୍ଥିକ ବର୍ଷର ସମାନ ଅବଧିରେ ଶିଳ୍ପ ଉତ୍ପାଦନର ଅଭିବୃଦ୍ଧି ହାର ୬.୨ ପ୍ରତିଶତ ଥିଲା। ସରକାରୀ ତଥ୍ୟ ଦର୍ଶାଇଛି ଯେ ଖଣି, ଉତ୍ପାଦନ ଏବଂ ଶକ୍ତି କ୍ଷେତ୍ରର ଖରାପ ପ୍ରଦର୍ଶନ ଯୋଗୁ ଅଗଷ୍ଟରେ ସାମଗ୍ରିକ ଶିଳ୍ପ ଉତ୍ପାଦନ ହ୍ରାସ ପାଇଛି। ଏହି ଅବଧିରେ ଖଣି କ୍ଷେତ୍ରରେ ୪.୩% ଏବଂ ବିଦ୍ୟୁତ୍ କ୍ଷେତ୍ରରେ ୩.୭% ହ୍ରାସ ଘଟିଥିବାବେଳେ ଉତ୍ପାଦନ କ୍ଷେତ୍ରର ଅଭିବୃଦ୍ଧି ହାର ମାତ୍ର ୧% ଥିଲା। ଅଗଷ୍ଟରେ ପ୍ରବଳ ବର୍ଷା ହେତୁ ଖଣି କ୍ଷେତ୍ରରେ ଉତ୍ପାଦନ ପ୍ରଭାବିତ ହୋଇଥାଇପାରେ ବୋଲି ଏନ୍ଏସ୍ଓ କହିଛି। ଦେଶର ଶିଳ୍ପ ଉତ୍ପାଦନ କ୍ଷେତ୍ରରେ ୨୦୨୨ ଅକ୍ଟୋବରରେ ଶେଷ ଥର ପାଇଁ ହ୍ରାସ ଘଟିଥିଲା। ସେହି ସମୟରେ ଆଇଆଇପିରେ ୪.୧% ହ୍ରାସ ରେକର୍ଡ କରାଯାଇଥିଲା। ଏନ୍ଏସ୍ଓ ଦ୍ୱାରା ପ୍ରକାଶିତ ଉପଯୋଗ ଆଧାରିତ ବର୍ଗୀକରଣ ଅନୁଯାୟୀ, ୨୦୨୪ ଅଗଷ୍ଟରେ ପୁଞ୍ଜିଗତ ଉତ୍ପାଦ ବିଭାଗର ଅଭିବୃଦ୍ଧି ହାର ୦.୭ ପ୍ରତିଶତକୁ ହ୍ରାସ ପାଇଛି। ପୂର୍ବବର୍ଷ ସମାନ ଅବଧିରେ ଏହା ୧୩.୧% ରହିଥିଲା। ଅଣ ସ୍ଥାୟୀ ଉପଭୋକ୍ତା ସାମଗ୍ରୀର ଉତ୍ପାଦନ ୪.୫% ହ୍ରାସ ପାଇଥିବାବେଳେ ୨୦୨୩ ଅଗଷ୍ଟରେ ଏହା ୯.୯ ପ୍ରତିଶତ ଅଭିବୃଦ୍ଧି ପଞ୍ଜୀକୃତ ହୋଇଛି। ଉପଭୋକ୍ତା ସ୍ଥାୟୀ ଉତ୍ପାଦନର ଅଭିବୃଦ୍ଧି ମଧ୍ୟ ୫.୨%କୁ ହ୍ରାସ ପାଇଥିବାବେଳେ ୨୦୨୩ ଅଗଷ୍ଟରେ ଏହା ୬% ବୃଦ୍ଧି ପାଇଥିଲା। ତଥ୍ୟ ଅନୁଯାୟୀ, ଭିତ୍ତିଭୂମି / ନିର୍ମାଣ ସାମଗ୍ରୀ ୧.୯% ଅଭିବୃଦ୍ଧି ରେକର୍ଡ କରିଛି, ଯାହା ପୂର୍ବ ବର୍ଷ ୧୫.୭% ବୃଦ୍ଧି ହୋଇଥିଲା। ଗତବର୍ଷ ପ୍ରାଥମିକ ଦ୍ରବ୍ୟର ଉତ୍ପାଦନ ୧୨.୪ ପ୍ରତିଶତ ବୃଦ୍ଧି ପାଇଥିବାବେଳେ ଚଳିତବର୍ଷ ଅଗଷ୍ଟରେ ଏହାର ଉତ୍ପାଦନ ୨.୬% ହ୍ରାସ ପାଇଛି।
