ଜି.ଉଦୟଗିରି,୯।୧୨(ଚିନ୍ମୟ କୁମାର ସେଠୀ): କନ୍ଧମାଳ ଜିଲା ଜି. ଉଦୟଗିରି କଳିଙ୍ଗ ମହାବିଦ୍ୟାଳୟର ଯୁକ୍ତ ଦୁଇ ପ୍ରଥମ ବର୍ଷ ଛାତ୍ରୀଙ୍କୁ ଦୋକାନ ଭିତରକୁ ଭିଡ଼ି ନେଇ ଅସଦାଚରଣ ସହ ଦୁଷ୍କର୍ମ ଉଦ୍ୟମ କରୁଥିବା ଅଭିଯୋଗ ହୋଇଛି। ଘଟଣାବେଳେ ଅନ୍ୟ ଛାତ୍ରଛାତ୍ରୀ ଓ ଜନସାଧାରଣଙ୍କ ଦ୍ଵାରା ଛାତ୍ରୀଙ୍କୁ ଉଦ୍ଧାର କରାଯାଇ ଅଭିଯୁକ୍ତକୁ ପ୍ରବଳ ମାଡ଼ ହେବାରୁ ଘଟଣା ସ୍ଥଳରେ ଚାପା ଉତ୍ତେଜନା ସୃଷ୍ଟି ହୋଇଥିଲା।
ସୂଚନା ଆନୁସାରେ ପୀଡ଼ିତା ଛାତ୍ରୀ ଜି.ଉଦୟଗିରି କଳିଙ୍ଗ ମହାବିଦ୍ୟାଳୟରେ ଯୁକ୍ତ ଦୁଇ ପ୍ରଥମ ବର୍ଷ କଳା ବିଭାଗରେ ପଢ଼ୁଥିବା ପାବୁରିଆ ଅଞ୍ଚଳର ବୋଲି ଜଣାପଡ଼ିଛି। ଛାତ୍ରୀଙ୍କ କହିବା ଅନୁସାରେ ପ୍ରତିଦିନ ଭଳି କଲେଜ କ୍ଲାସ ସାରି ଘରକୁ ଫେରିବା ନିମନ୍ତେ ଜି.ଉଦୟଗିରି ବନ୍ଧଛକ ପାବୁରିଆ ଯିବା ବସ୍ ଷ୍ଟାଣ୍ଡ ଠାରେ ଥିବା କମ୍ପ୍ଲେକ୍ସ ନିକଟରେ ସମୟ ପ୍ରାୟ ୨.୩୦ ମିନିଟ ସମୟରେ ବସ ଅପେକ୍ଷା କରୁଥିଲେ । ସେହି ସମୟରେ ସେଠାରେ ଥିବା କମ୍ପ୍ଲେକ୍ସର ଷ୍ଟେସନାରୀ ଦୋକାନକୁ କିଛି ଜିନିଷ କିଣିବା ପାଇଁ ଯାଇଥିଲେ ।
ସେଠାରେ ଥିବା ଦୋକାନ ମାଲିକ ସନ୍ତୋଷ କୁମାର ସାହୁ ଦୋକାନ ଖାଲି ଥିବା ଦେଖି ଉକ୍ତ ଝିଅକୁ ହାତ ଧରି ଜୋର ଜବରଦସ୍ତ ଉପର ମହଲା କୋଠରୀରେ ଥିବା ନିଜ ବେଡ୍ ରୁମ୍ କୁ ନେଇ ବଳ ପୂର୍ବକ ଦୁଷ୍କର୍ମ କରିବାକୁ ଉଦ୍ୟମ କରିଥିଲା। କବାଟ ବନ୍ଦ କରିଥିଲା ଓ ଝିଅର ମୁହଁ ଚାପି ଶରୀରର ବିଭିନ୍ନ ଅଙ୍ଗ ସ୍ପର୍ଶ କରି ବଳାତ୍କାର ଉଦ୍ୟମ କରୁଥିବା ବେଳେ ଛାତ୍ରୀ ଜଣକ ଚିତ୍କାର କରିବାରୁ ତଳେ ରାସ୍ତାରେ କିଛି ଛାତ୍ରଛାତ୍ରୀ ମାନେ ଚିତ୍କାର ଶୁଣି ଦୋକାନ ଭିତରକୁ ପଶି ଛାତ୍ରୀଙ୍କୁ ଉଦ୍ଧାର କରିଥିବା ପୋଲିସକୁ କହିଛନ୍ତି।
ଘଟଣା ସ୍ଥଳରେ ପୋଲିସ ପହଁଞ୍ଚିବା ପୂର୍ବରୁ ଦୋକାନ ମାଲିକଙ୍କୁ କଲେଜ ଛାତ୍ରଛାତ୍ରୀ ମାନେ ଉତ୍ତମ ମଧ୍ୟମ ଦେଇଥିଲେ। ପୋଲିସ ଅଭିଯୁକ୍ତକୁ ଉଦ୍ଧାର କରି ଥାନାକୁ ନେଇ ଅଟକ ରଖିଥିବା ସୂଚନା ମିଳିଛି। ଛାତ୍ରୀଙ୍କ ମାତା ଓ ସମ୍ପର୍କୀୟ ଘଟଣା ସ୍ଥଳରେ ପହଁଞ୍ଚି ଝିଅ ପ୍ରତି ଦୁଷ୍କର୍ମ ଉଦ୍ୟମ ନେଇ ଥାନାରେ ଅଭିଯୋଗ କରିଥିବା ନେଇ ସୂଚନା ମିଳିଛି। ଖବର ଲେଖିବା ପର୍ଯ୍ୟନ୍ତ ମାମଲା ରୁଜୁ ହୋଇନଥିବା ବେଳେ ଏହିପରି ଘଟଣା ଜି.ଉଦୟଗିରିରେ ପ୍ରଥମ ଥର ଘଟିଥିବା ବେଳେ ରାଷ୍ଟ୍ରୀୟ ଆଦିବାସୀ ଏକତା ମିଶନ,କୁଇ ସମାଜ ପରିଷଦ,ବୁଦ୍ଧିଜିବୀ ସମେତ ଅନ୍ୟମାନେ ତୀବ୍ର ନିନ୍ଦା କରିଛନ୍ତି ଓ ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ପାଇଁ ଦାବି କରିଛନ୍ତି।
