ଚେନ୍ନାଇ,୩୦।୯: କରୁର ଦଳାଚକଟା ଦୁର୍ଘଟଣାରେ ୪୧ ଜଣଙ୍କ ମୃତ୍ୟୁ ଘଟଣାରେ ଚାପା ରାଜନୈତିକ ଷଡ଼ଯନ୍ତ୍ର ଥିବା ଇଙ୍ଗିତ ଦେଇ ଅଭିନେତା-ରାଜନେତା ବିଜୟ ମଙ୍ଗଳବାର ନିଜର ପ୍ରଥମ ଭିଡିଓ ବାର୍ତ୍ତାରେ ଗଭୀର ଦୁଃଖ ପ୍ରକାଶ କରିଛନ୍ତି। ସେ କହିଛନ୍ତି, “ମୋ ଜୀବନରେ ଏପରି ଦୁଃଖଦାୟୀ ପରିସ୍ଥିତି ଦେଖି ନାହିଁ। ଜନସାଧାରଣଙ୍କ ସୁରକ୍ଷା ପାଇଁ ମୁଁ ରାଜନୀତିକୁ ଦୂରେଇ ରଖି ନିରାପଦ ସ୍ଥାନ ବାଛି ପୋଲିସକୁ ଅନୁରୋଧ କରିଥିଲି। କିନ୍ତୁ ଯାହା ହେବା ଉଚିତ ନ ଥିଲା, ତାହା ଘଟିଲା।”
ପାଞ୍ଚଟି ଜିଲାରେ ପ୍ରଚାର ସଫଳ ହେବା ପରେ କରୁରରେ ଏପରି କାହିଁକି ଘଟିଲା ବୋଲି ପ୍ରଶ୍ନ ଉଠାଇ ବିଜୟ କହିଛନ୍ତି, “ଜନତା ସତ୍ୟ ଜାଣିଛନ୍ତି ଓ ସବୁ ଦେଖୁଛନ୍ତି। ଶୀଘ୍ର ସତ୍ୟ ପ୍ରକାଶ ପାଇବ।” ସେ ନିଜ ସମର୍ଥକଙ୍କ ଉପରେ ଲାଗିଥିବା ଅଭିଯୋଗକୁ ଖଣ୍ଡନ କରି ମୁଖ୍ୟମନ୍ତ୍ରୀ ଏମ.କେ. ଷ୍ଟାଲିନଙ୍କୁ ଅନୁରୋଧ କରିଛନ୍ତି, “ଯଦି ପ୍ରତିଶୋଧ ନେବାର ଇଚ୍ଛା ଅଛି, ମୋ ସମର୍ଥକଙ୍କୁ ନୁହେଁ, ମୋ ଉପରେ କାର୍ଯ୍ୟାନୁଷ୍ଠାନ ନିଅନ୍ତୁ।”
