ନୂଆଦିଲ୍ଲୀ,୨୮।୪: ଦକ୍ଷିଣ-ପୂର୍ବ ଦିଲ୍ଲୀ ବଦରପୁର ଅଞ୍ଚଳର ଏକ ଡ୍ରେନ୍ରୁ ଜଣେ ଛାତ୍ରଙ୍କ ମୃତଦେହ ପୋଲିସ ଜବତ କରିଛି। ସେ ହେଲେ ଦିଲ୍ଲୀର ମୋଲାରବନ୍ଦ ଗାଁର ବିଲାସପୁରର ସୌରଭ। ମିଳିଥିବା ସୂଚନା ମୁତାବକ, ସୌରଭ ତାଜପୁର ପହରୀସ୍ଥିତ ଦିଲ୍ଲୀ ମ୍ୟୁନିସିପାଲିଟି କର୍ପୋରେଶନ (ଏମ୍ସିଡି) ଦ୍ୱାରା ପରିଚାଳିତ ଏକ ବିଦ୍ୟାଳୟର ଛାତ୍ର ବୋଲି ଜଣାପଡିଛି।
ଗୁରୁବାର ରାତିରେ ବଦରପୁର ଥାନାକୁ ଏକ କଲ୍ ଆସିଥିଲା। ଜଣେ ସ୍କୁଲ ଛାତ୍ରଙ୍କୁ ହତ୍ୟା କରି ଫିଙ୍ଗି ଦିଆଯାଇଥିବା ପୋଲିସକୁ ସୂଚନା ମିଳିଥିଲା। ଖବର ପାଇ ପୋଲିସର ଏକ ଟିମ୍ ଖଟୁସିୟମ ପାର୍କ ଏବଂ ତାଜପୁର ରୋଡ ଗାଁ ମଧ୍ୟରେ ପହଞ୍ଚି ସ୍କୁଲ ୟୁନିଫର୍ମରେ ଥିବା ଜଣେ ଛାତ୍ରଙ୍କ ମୃତଦେହ ଡ୍ରେନ୍ରେ ପଡିଥିବା ଦେଖିବାକୁ ପାଇଥିଲା। ଏପରି କି ପୋଲିସ ଘଟଣାସ୍ଥଳରୁ ପାଠ୍ୟପୁସ୍ତକ ଏବଂ ଅନ୍ୟାନ୍ୟ ଅଧ୍ୟୟନ ସାମଗ୍ରୀ ଥିବା ଏକ ସ୍କୁଲ ବ୍ୟାଗ ମଧ୍ୟ ଜବତ କରିଛି। ଡେପୁଟି କମିଶନର(ଦକ୍ଷିଣ ପୂର୍ବ) ରାଜେଶ ଦେଓ କହିଛନ୍ତି, ସ୍କୁଲ ବ୍ୟାଗ୍ଠାରୁ ପ୍ରାୟ କିଛି ମିଟର ଦୂରରେ ୪ରୁ ୫ଟି ରକ୍ତଲଗା ପଥର ଏବଂ ରକ୍ତଭିଜା ସୂତା ଏକ ଟାୱେଲକୁ ପୋଲିସ ଜବତ କରିଛି। ଅନ୍ୟପକ୍ଷେ ଛାତ୍ରଙ୍କୁ ପଥରରେ ଛେଚି ଛେଚିି ହତ୍ୟା କରିବା ପରେ ଡ୍ରେନ୍ରେ ଫିଙ୍ଗି ଦେଇଥିବା ଜଣାପଡିଛି। ହେଲେ କେଉଁ ପରିସ୍ଥିତିରେ ଛାତ୍ରଙ୍କୁ ହତ୍ୟା କରାଗଲା ତାହା ଜଣାପଡିନାହିଁ। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ଲାଗି ପଠାଇଛି।
